Anna Lena Victorsdóttir 16 ára Hólmavíkurmær hefur lokið grunnprófi í rafbassaleik frá Tónskólanum á Hólmavík. Prófið tók Anna í húsnæði tónlistarskóla Félags íslenskra hljómlistarmanna þann 10. júní s.l. og var það hinn þekkti bassaleikari Gunnar Hrafnsson sem prófdæmdi. Anna Lena er fyrst nemenda Tónskólans á Hólmavík sem lýkur námi samkvæmt nýrri ryþmískri námsskrá en nemendum íslenskra tónlistarskóla stóð í fyrsta sinn til boða að taka ryþmískt hljóðfærapróf samkvæmt íslenskum viðmiðum í maí 2010.

Bjarni Ómar Haraldsson, skólastjóri Grunn - og Tónskólans á Hólmavík afhenti Önnu Lenu prófskírteini þessu til staðfestingar frá prófanefnd tónlistarskóla í dag 12. júlí. Þess hefur lengi verið beðið við Tónskólann á Hólmavík að nemendur geti þreytt áfangapróf í ryþmísku hljóðfæranámi enda byggir skólinn starfsemi sína að stórum hluta á hugmyndafræði ryþmatónlistar. Sjötíu nemendur Grunnskólans hafa þegar skráð sig í tónlistarnám á haustönn 2010 og hafa þeir aldrei verið fleiri.