Þau ánægjulegu tíðindi bárust í vikunni að Grunnskólinn á Hólmavík hefði farið með sigur af hólmi í eldri flokki kvikmyndakeppni 66°NORÐUR og Grunnskólanna árið 2011. Sérstök dómnefnd valdi sigurvegara, en í niðurstöðu hennar skipti netkosning fyrir almenning einnig talsverðu máli. Dómnefndin var skipuð Katrínu Jakobsdóttur menntamálaráðherra, Hilmari Oddssyni, rektor Kvikmyndaskóla Íslands, Sigurjóni Sighvatssyni kvikmyndagerðarmanni og Sverri Þór Sverrissyni (Sveppa).

Verðlaunaafhending fór fram í verslun 66°NORÐUR Faxafeni 12, núna á laugardaginn kl 11:00 og fjölmenntu nemendur og aðstandendur þeirra sem að sigurmyndbandinu unnu auk Arnars S. Jónssonar tómstundafulltrúa og stundarkennara og Hildar Guðjónsdóttur aðstoðarskólastjóra. Unnu nemendur hver fyrir sig 20 þúsund króna úttekt í verlsun 66°NORÐUR ásamt því að vinna veglega Sony myndbandsupptökuvél og blómvönd fyrir skólann. Stöð 2 var á staðnum og tók viðtöl sem sjá má hér. Einnig mátti lesa fréttir um þetta á hinum ýmsu vefmiðlum. Myndin fjallar á gamansaman hátt um raunir ungs bensínafgreiðslumanns sem þarf að berjast við kuldabola, skrítna viðskiptavini og latan samstarfsmann. Hægt er að sjá sigurmyndbandið með því að smella hér.

Við erum afar stolt af okkar fólki og óskum öllum innilega til hamingju með sigurinn!