Ingibjörg Benediktsdóttir setti Hamingjudaga 2018 og á sama tíma opnaði formlega ljósmyndasýning dóttur hennar Brynhildar Sverrisdóttur sem er enn opin í Hnyðju.

Jón Alfreðsson og María Játvarðsdóttir mættu fyrir hönd Lionsklúbbsins á Hólmavík á setningarathöfnina. Þau kynntu starf Lions þar sem samtökin eru 100 ára á þessu ári og veittu Strandabyggð tvo mjög veglega bekki að gjöf. Bekkjunum verða komið fyrir á góðum stað á Hólmavík þar sem þeir eiga að nýtast sem áningastaður í gönguferðum fólks og eiga þannig að hvetja til gönguferða fyrir fólk á öllum aldri.

Aðalbjörg Signý Sigurvaldadóttir veitti Menningarverðlaun Strandabyggðar.
Ásu Ketilsdóttur var veitt sérstök viðurkenning vegna menningarmála í Strandabyggð. Ása Ketilsdóttir fædd 1935 að Ytra-Fjalli í Aðaldal hefur alla ævi haft áhuga á kveðskap og ýmsum fornum og þjóðlegum fróðleik. Hún lærði ung af foreldrum sínum og ömmum lausavísur, munnmælasögur, rímur og að kveða en á þeim tíma var sá siður að tapast og orðinn sjaldgæfur. Þessi hefð og áhugi hennar á efninu hefur orðið til þess að hún yrkir, kveður og segir sögur og ævintýri. Framlag hennar er því mikilvægur menningararfur á sviði kveðskapar og sagnhefðar.

Náttúrubarnaskólinn á Ströndum hlaut Menningarverðlaun Strandabyggðar fyrir eftirtektarvert menningarframtak í sveitarfélaginu. Náttúrubarnaskólinn stendur fyrir námskeiðum á Sauðfjársetrinu sem byggist á hugmyndafræðinni um náttúrutúlkun. Lögð er áhersla á fjölbreytileika og skemmtun í vali á námskeiðum ásamt fróðleik um nánasta umhverfi. Námskeiðin eru fyrir náttúrubörn á öllum aldri, þar sem þú lærir með því að sjá, snerta, gera og upplifa.

Er við hæfi að ljúka þessari frétt með Hamingjusamþykktinni okkar:

Hamingjan er eitt af leiðarljósum í áframhaldandi uppbyggingu í Strandabyggð. Lífsgæði íbúa á Ströndum skipta miklu máli og þau þarf að efla með fjölbreyttum ráðum.