Sveitarstjórn Strandabyggðar auglýsir hér með opið hús í félagsheimilinu, miðvikudaginn 19. febrúar n.k. kl 17.30-19:00, þar sem íbúar geta kynnt sér tillögu að heildarendurskoðun á aðalskipulagi, sem nú er til auglýsingar skv. 1. mgr. 31. gr. skipulagslaga með athugasemdarfresti til 28. febrúar 2025.

 

Í tillögu að aðalskipulagi Strandabyggðar 2021-2033 er sett fram stefna sveitarstjórnar um landnotkun, byggðaþróun, samgöngur og þjónustukerfi í sveitarfélaginu í heild sinni ásamt stefnu um atvinnu- og umhverfismál.

 

Aðalskipulagið skal haft til grundvallar við gerð annarra áætlana er snerta ráðstöfun lands og umhverfismál í sveitarfélaginu og aðrar skipulagsáætlanir.

 

Á fundinum munu fulltrúar Landmótunar kynna Aðalskipulagið og fulltrúar frá Fasteignaumsýslunni munu kynna áform um hótelbyggingu á Hólmavík.  Að kynningum loknum mun gestum gefast kostur á að skoða teikningar og önnur gögn og ræða við fulltrúa sveitarfélagsins, Landmótunar og Fasteignaumsýslunnar.

 

Við hvetjum íbúa til að mæta og kynna sér nýtt skipulag og þau jákvæðu áhrif sem það mun hafa á samfélagið.

Hér má finna tengingu inn á Skipulagsgáttina til að lesa nánar um aðalskipulagstillöguna: https://skipulagsgatt.is/issues/2024/675

Hér má finna tengingu við gögn varðandi tillögu að deildiskipulagi Kvíslatunguvirkjunar, mál nr. 1134/2024 í Skipulagsgátt: https://skipulagsgatt.is/issues/2024/1134  

Hér má finna tengingu við gögn varðandi tillögu að deiliskipulagi íbúðarbyggðar í Brandskjóli, mál nr. 97/2025 í Skipulagsgátt: 
https://skipulagsgatt.is/issues/2025/97

Hér má finna tengingu við gögn varðandi tillögu að deiliskipulagi Jakobínutúns, mál nr. 95/2025 í Skipulagsgátt: https://skipulagsgatt.is/issues/2025/95  
 

Rannsóknarmiðstöð Háskólans á Akureyri hefur undanfarna daga haft samband við íbúa Strandabyggðar vegna könnunar um viðhorf íbúa til verkefnisins Sterkar Strandir sem Byggðastofnun er í forsvari fyrir á landsvísu.

Mikilvægt er að ná sem mestu svarhlutfalli í könnuninni til að varpa ljósi á stöðu byggðarlagsins í lok verkefnis að mati íbúa. Ekki er hægt að rekja svör til einstaklinga.

Ef það er ekki búið að hafa samband við þig en þú vilt taka þátt þá má hafa samband við Helgu Einarsdóttur hjá Rannsóknarmiðstöð Háskólans á Akureyri.

Netfang: helga.einarsdottir@unak.is
S: 4608911

Lokaíbúafundur Sterkra Stranda verður haldinn í Félagsheimilinu á Hólmavík fimmtudaginn 20. febrúar nk. kl. 18:00. Ráðgert er að fundi verði slitið um kl 20:40. Fundarstjóri verður Aðalsteinn Óskarsson, sviðsstjóri byggðamála, hjá Vestfjarðastofu. Boðið verður upp á súpu, brauð og kaffi á fundinum. 

Á fundinum verður farið yfir það helsta í verkefninu. Verkefnisstjórn Sterkra Stranda hvetur íbúa til góðrar mætingu á fundinum. 

Verkefnisstjórn Sterkra Stranda

Sveitarstjórn Strandabyggðar samþykkti á fundi sínum 14. janúar 2025 að auglýsa tvær tillögur að deiliskipulagi á Hólmavík, skv. 1. mgr. 41. gr. skipulagslaga, sbr. samþykkt Umhverfis- og skipulagsnefndar þann 9. janúar 2025.

Um er að ræða eftirtaldar tillögur:

Tillaga að deiliskipulagi Jakobínutúns

Um er að ræða deiliskipulag fyrir hluta miðsvæðis (M2) á Hólmavík, sbr. samþykkt Aðalskipulag Strandabyggðar 2021-2033 sem er í kynningu. Á svæðinu er nú íþróttahús, sundlaug, félagsheimili, verslun og tjaldsvæði en ráðgert er að auka þjónustu á svæðinu m.a. með byggingu hótels í góðum tengslum við núverandi byggingar og starfsemi. Einnig er svigrúm til breytinga á núverandi byggingum og nýbyggingum sem falla að nýtingu svæðisins.

Tillagan er aðgengileg hér í Skipulagsgátt, mál nr. 95/2025

Tillaga að deiliskipulagi íbúðarbyggðar í Brandskjóli

Um er að ræða deiliskipulag fyrir nýtt íbúðarsvæði (ÍB5) og svæði fyrir samfélagsþjónustu (S3), sbr. samþykkta tillögu að Aðalskipulagi Strandabyggðar 2021-2033 sem er til kynningar. Deiliskipulagstillagan gerir ráð fyrir að á íbúðarsvæðinu rísi lágreist byggð með fjölbreyttum húsagerðum þ.e. einbýlis, par- og raðhús á einni hæð. Lögð er áhersla á góðar göngutengingar bæði innan svæðisins og við aðliggjandi svæði, og sérstaklega til og frá skóla- og íþróttasvæðum þéttbýlisins.

Tillagan er aðgengileg hér í Skipulagsgátt – mál nr. 97/2025  

Athugasemdir við ofangreindar tillögur skulu vera skriflegar og berast gegnum Skipulagsgátt eða til skipulagsfulltrúa í netfangið skipulag@dalir.is  eigi síðar en 14. mars 2025.

 

Skipulagsfulltrúi Strandabyggðar

Í dag voru afhent íþróttaverðlaun Strandabyggðar fyrir árið 2024 en þau eru valin af Tómstunda, íþrótta- og menningarnefnd eftir innsendum tillögum og mati nefndarinnar.

Hvatningarverðlaun Strandabyggðar fyrir árið 2024, sem veitt eru fyrir aldurshópinn 12 til 15 ára, hlaut Matas Zalneravicius.

Matas hefur æft skíðagöngu hjá Skíðafélagi Strandamanna frá barnsaldri og sýnt einstaka samviskusemi, dugnað og metnað. Hann er góð fyrirmynd fyrir iðkendur á öllum aldri, bæði innan og utan SFS. Matas hefur sýnt ótrúlega seiglu með því að æfa allan ársins hring, óháð veðri og aðstæðum. Hann leggur sig fram við hlaup, hjólreiðar, skíðaiðkun og styrktaræfingar sem endurspeglar árangur hans og einbeitingu. Auk þess hefur hann verið ómetanlegur stuðningur í þjálfun og kennslu innan Skíðafélagsins. 

Íþróttamaður Strandabyggðar árið 2024 er Benedikt Gunnar Jónsson. 

Benedikt er bikar- og Íslandsmeistari í sínum aldursflokki bæði í kúluvarpi og kringlukasti og setti alls 5 Íslandsmet á árinu. Benedikt vann gullverðlaun á Gautaborgarleikunum í Svíðþjóð og er talinn vera með 15 bestu kúluvörpurum heims í sínum flokki. Benedikt er í unglingalandsliðinu í frjálsum íþróttum og hefur náð lágmörkum fyrir landsliðshóp 19 ára. Benedikt er jákvæður keppandi og góð fyrirmynd og sannarlega með sínum bestu í sinni grein.