Í dag er bóndadagur og af því tilefni héldum við á Lækjarbrekku þorrablótið okkar. Börnin voru búin að skreyta hjálma sem þau settu upp og svo fengum við að bragða á alls kyns þorramat. Misjafnt var hvað hver lét ofan í sig af góðgætinu en öllum var boðið að smakka.
Marteinn Aldar og Guðný komu með dásemdar hákarl að heiman og buðu öllum að fá sér. Kærar þakkir fyrir það. :)

Jökull Ingimundur hélt upp á tveggja ára afmælið sitt í dag. Hann fékk afmæliskórónu og var sunginn fyrir hann afmælissöngurinn. Innilega til hamingju með afmælið Jökull!

Hún Marín Arnars varð þriggja ára þann 30.des. Í dag hélt hún uppá afmælið, hún fékk kórónu og við sungum fyrir hana afmælissönginn. Til hamingju með afmælið Marín Arnars.

Hún Eva Lara er þriggja ára í dag. Hún fékk kórónu og við sungum fyrir hana afmælissönginn. Til hamingju með afmælið Eva Lara.

Aðalbjörg Guðbrandsdóttir hefur verið ráðin til starfa. Hún vinnur í Tröllakoti og er vinnutími hennar 8:00-13:00. Við bjóðum hana hjartanlega velkomna til starfa.

Þann 14. desember komu þær Heiða og Jóhanna í stjórn foreldrafélagsins og færðu leikskólanum gjafir. Foreldrafélagið gaf leikskólanum Kapla kubba og nýja myndavél. Komu þessar gjafir sér sérlega vel þar sem myndavél leikskólans var orðin töluvert þreytt. Þess má til gamans geta að Kapla kubbarnir eru búnir að vera í nánast stanslausri notkun síðan þeir komu í hús.
Við viljum koma á framfæri þökkum til stjórnar foreldrafélagsins okkar fyrir gjafirnar og ötult starf í þágu barnanna.

Jólaballið okkar var haldið þann 14. desember. Dagurinn byrjaði á því elsti árgangurinn setti upp jólatréð inni í Tröllakoti og skreytti það. Þegar búið var að skreyta jólatréð var hafist handa við að skreyta Tröllakotið og leikskólann allan. Kl. 10:00 var byrjað að dansa í kringum jólatréð og mætti Viðar með harmonikkuna og spilaði undir dansi. Börnin sungu hástöfum og árangurinn lét ekki á sér standa. Tveir rauðklæddir náungar birtust fljótlega við leikskólagirðinguna. Þeir stukku yfir girðinguna og lentu í hinum furðulegustu vandræðum í leiktækjunum. Að lokum tóku þeir eftir krökkunum sem fylgdust dolfallin með atgangnum. Kom þá í ljós að þetta voru þeir Ketkrókur og Giljagaur. Þeir dönsuðu í kringum jólatréð með krökkunum og gáfu þeim svo öllum jólagjafir áður en þeir héldu áfram för sinni.

Elsti árgangur leikskólans fór í jólaseríurúnt að morgni dags þann 11. desember ásamt þeim Rúnu og Alfreð skólabílstjóra. Tilgangur ferðarinnar var að skoða jólaskreytingar bæjarins og velja síðan skemmtilegast skreytta hús bæjarins. Húsið sem varð fyrir valinu að þessu sinni er að Vitabraut 3. Íbúarnir þar eru Júlli og Gunna og óskum við þeim til hamingju með jólahúsið sitt. Húsráðendur voru ekki heima og var því brugðið á það ráð að finna Júlla í Orkubúinu. Þar var vel tekið á móti mannskapnum og fengu allir kakóbolla í lok ferðar.

Þann 11. desember var farið í kaffihúsaferð á Cafe Riis til hennar Báru okkar. Frábær mæting var í þessa ferð og skundaði saman stór hópur af börnum, foreldrum og starfsfólki yfir á Cafe Riis. Þar tók Bára á móti okkur með rjúkandi kakó og piparkökur. Börnin sungu nokkur jólalög fyrir viðstadda og svo gæddum við okkur á veitingunum. Þetta var frábær heimsókn á Cafe Riis sem lauk með því að öll börnin fengu afhenta jólagjöf frá Báru. Kærar þakkir fyrir okkur!!!