Bókavíkurhelgin verður sannarlega stútfull af herlegheitum.

Í kvöld sýnir Leikfélag Hólmavíkur einþáttunginn sMal á Sauðfjársetrinu en þar verður einnig hægt að fá dýrindis súpu og hlusta á gamansögur af leiksviðinu.

Á morgun, laugardag, sjá Gönguhópurinn Gunna fótalausa og Dreifnám FNV um göngu um söguslóðir Stefáns frá Hvítadal en lagt verður af stað frá Hafnarbraut 17 kl. 13. Hljóðbækurnar halda áfram að spilast í heita pottinum og á morgun verður komið að Þjóðsögum af Ströndum í upplestri Elfars Loga. Annað kvöld kl. 20 stendur Leikfélag Hólmavíkur svo fyrir upplestri á kaffihúsinu á Finna Hótel.

Viðburður laugardagsins er þó án efa upplestur Auðbókarinnar en hana hafa íbúar Strandabyggðar, frá 8 ára til áttræðs, skrifað í sameiningu síðan í byrjun nóvember. Sagan er samfelld, fjölbreytt og æsispennandi og býður upp á fjölbreyttan ritstíl og skemmtilega frásögn sem hentar öllum aldurshópum. Auðbókin verður lesin við kertaljós í Kirkjuhvamminum 22. nóvember kl. 18 og boðið verður upp á kakó og piparkökur. Athugið að farið verður inn í kirkju ef veður verður vont.

Sunnudagurinn 23. nóvember er síðan lokadagur Bókavíkur. Þann daginn verður börnum boðið í Fjósið, ungmennahúsið sem er staðsett að Hafnarbraut 19, kl. 13 en unga fólkið ætlar þá að eiga huggulega stund með börnunum og lesa fyrir þau bækur og sögur.

Klukkan 15 þann daginn verður svo lokahátíð Bókavíkur á Kaffi Galdri. Að því tilefni verður haldið útgáfuhóf bókarinnar Rún sem Galrasýningin á Ströndum gaf nýverið út, skipuleggjendur Bókavíkur þakka fyrir sig og síðast en ekki síst verður tilkynnt um sigurvegara í ljóða- og smásagnasamkeppni Bókavíkur og þeim veitt verðlaun fyrir glæstan árangur en alls bárust 28 ljóð og 15 smásögur í keppnina.