Mynd: JJ.

Sveitarfélagið Strandabyggð leggur áhersla á að halda áfram þróun og uppbyggingu á þeirri þjónustu sem sveitarfélagið býður upp á til eflingar lífsgæða íbúa Strandabyggðar. Til að svo megi vera reynir á skapandi hugsun og aðhaldssemi sveitarstjórnar, nefnda og alls þess öfluga fólks sem starfar hjá sveitarfélaginu. Sveitarstjórn Strandabyggðar hefur einnig eftirfarandi að leiðarljósi við gerð fjárhagsáætlunar 2012:

-Viðhalda þjónustustigi grunnþjónustu sveitarfélagsins
-Halda áfram að ná niður rekstrarkostnaði starfseininga Strandabyggðar
-Halda yfirvinnu í lágmarki í starfseiningum Strandabyggðar

Rekstur sveitarfélagsins skiptist í A- og B-hluta sem verða að standa undir kostnaði. Í A-hluta er aðalsjóður sveitarfélagsins og þjónustustofnanir er sinna starfsemi sem fjármögnuð er með skatttekjum (útsvari, framlagi frá Jöfnunarsjóði, fasteignaskatti og lóðarleigu). Í B-hluta eru stofnanir sveitarfélagsins sem eru í þess eigu en verða að vera reknar sem fjárhagslega sjálfstæðar einingar eins og hafnarsjóður, vatnsveita, fráveita og íbúðarhúsnæði.

Svigrúm í rekstri sveitarfélagsins Strandabyggðar er lítið. Jöfnunarsjóður gefur seint út heildaráætlun framlaga til sveitarfélaga og hafa sú vinnubrögð verið harðlega gagnrýnd af bæði sveitarfélögum og Sambandi íslenskra sveitarfélaga. Jöfnunarsjóður hefur ekki skilað af sér endanlegri áætlun fyrir árið 2011 og enn ekki ljóst hver endanleg rekstrarniðustaða verður á því ári. Það er þar af leiðandi erfitt að gera raunhæfa áætlun um tekjur sveitarfélagsins árið 2012 en tekjur frá Jöfnunarsjóði er stór hluti af tekjum sveitarfélagsins. 

Verðlagsþróun - gjaldskrárbreytingar
Í fjárhagsáætlun Strandabyggðar árið 2012 er gert ráð fyrir 4,2% verðbólgu sem er áætlað út frá spám fimm greiningaraðila; Hagstofu Íslands, Hagspá AGS, ASÍ, Greiningardeild Íslandsbanka og Seðlabanka Íslands. Hækkun á gjaldskrám 1. janúar mun almennt taka mið af þessari verðlagsþróun auk þess sem sveitarstjórn mun ákvarða frekari gjaldskrárbreytingar á næsta sveitarstjórnarfundi, 13. desember 2011.

Hugmyndir frá íbúum
Sveitarstórn Strandabyggðar óskar eftir hugmyndum og ábendingum frá íbúum um sparnað og hagræðingu sem og nýsköpun í rekstri sveitarfélagsins. Hugmyndirnar má senda á netfangið sveitarstjori@strandabyggd.is eða senda hugmyndir á skrifstofu Strandabyggðar að Höfðagötu 3 merkt Fjárhagsáætlun 2012 fyrir kl. 12:00 á hádegi mánudaginn 5. desember 2011.