Landsleikurinn ALLIR LESA er nú í fullum gangi og hafa þátttakendur lesið í samtals 850 daga á þeim 14 dögum sem liðnir eru af keppninni. Sveitarfélögin keppast við að hvetja bæjarbúa áfram og víða keppa sjálfir bæjarstjórarnir til sigurs, enda heiður sveitarfélagsins í húfi!

Strandabyggð ber höfuð og herðar yfir önnur sveitarfélög og er þessa stundina í 1. sæti! Þegar tölfræðin er skoðuð kemur í ljós að lestrarhestar Strandabyggðar hafa lesið í 26,7 klukkustundir að meðaltali frá frá upphafi landsleiksins. Nú er tilvalið að blása enn frekar í seglin og taka þátt í stórskemmtilegu bókabingói sem aðstaðandendur Allir lesa hafa sett saman.

Hægt er að skrá sig til leiks fram á síðasta dag landsleiksins, sem er þann 19. febrúar. Skráning fer fram á allirlesa.is auk þess sem hægt er að fylgjast með fréttum og skemmtilegu efni á facebook-síðu leiksins. Aðstandendur Allir lesa eru Reykjavík, bókmenntaborg Unesco og Miðstöð íslenskra bókmennta með stuðningi frá Mennta- og menningarmálaráðuneytinu og Heimili og skóla.