Nú er heilsueflingu í Strandabyggð formlega lokið, enda septembermánuður liðinn. Nokkrir dagskrárliðir eru eftir, t.d. lokapunkturinn sem er veglegt hlaup á vegum Umf. Geislans sem fer fram þann 6. október (sjá nánar með því að smella hér). Þá verða sundleikfimi (mánudagar kl. 17:00) og sundkennsla (miðvikudagar kl. 17:00) í boði næstu tvær vikur. Ef þátttaka verður næg mun sundleikfimin halda áfram svo lengi sem veður leyfir.  Á morgun hefst átak í Grunnskólanum á Hólmavík tengt verkefninu Göngum í skólann. Í skólanum verður áfram hafragrautur í boði í nestistíma út októbermánuði, en hann sló sannarlega í gegn í september.

Að sögn Ingibjargar Benediktsdóttur, umsjónarmanns átaksins, var þátttaka í heilsueflingunni nokkuð góð. Einna best var hún í barnaleikfimi á laugardögum, en þar mætti fjöldi barna í skemmtilega hreyfingu ásamt foreldrum sínum. Stöðvaþjálfun í Íþróttamiðstöð tókst afar vel og verður áfram í gangi í vetur. Fremur fámennt var í hádegisröltum, en þeir sem mættu í þau fengu svo sannarlega frískt loft og dagsbirtu. Það er gaman að segja frá því að frést hefur að önnur sveitarfélög hafa hug á því að taka Strandabyggð til fyrirmyndar og leggja í heilsueflingu á vormánuðum.