Íþróttamaður ársins 2015 í Strandabyggð var valinn í gær en Íþróttamaður ársins  skal valinn í janúar ár hvert.  Hann/hún þarf ekki að vera bundinn íþrótta- eða ungmennafélagi og er valið í höndum Tómstunda -íþrótta og menningarnefndar að undangengnum tilnefningum frá almenningi.  Á sama hátt og nefndin velur íþróttamann ársins er heimilt að velja einstakling eldri en 12 ára sem hlýtur hvatningarverðlaun en þau eru veitt íþróttamanni sem sýnir ríkan áhuga á sinni íþróttagrein, er góður félagi og góð fyrirmynd. Hvor um sig slítur viðurkenningarskjal og blómvönd en auk þess veitir Íþróttafélag lögreglumanna á Hólmavík Íþróttamanni ársins farandbikar. 

Íþróttastarf hefur verið í blóma á árinu. Skíðafélagið er alltaf jafn kraftmikið og hefur að auki sett alla umframorkuna í byggingu skíðaskála í Selárdal. Taekwondodeildin hefur unnið öflugt starf og bætt við sig beltum og verðlaunum. Frjálsíþróttahópurinn stóð sig vel og keppendur hafa keppt á nokkrum mótum á árinu og Strandamet  slegin. Hópur ungmenna keppti á Unglingalandsmóti með góðum árangri.  Víðavangshlaup er vinsælt sem aldrei fyrr og Íþróttamiðstöðin vel nýtt til íþróttaiðkunar. Þetta er þó bara brot af því sem gert er í íþróttastarfi.

Vala Friðriksdóttir hlaut hvatningarverðlaun Strandabyggðar en hún hefur unnið mikilvægt starf í þágu íþróttahreifingarinnar og íþróttaeflingar.  Hún er áberandi dugleg, hvetjandi og jákvæð í íþróttastarfi og sterkur íþróttamaður í skíðagöngu, hlaupi og taekwondo og hefur meðal annars hlaupið hálfmaraþon undanfarin ár í Reykjavíkurmaraþoni. Hún sér um Taekwondo deild Geislans, sinnir því af lífi og sál og sýnir mikinn metnað við kennslu og undirbúning nemenda sinna og hvetur þá áfram. Hún er fyrirmynd í heilbrigðum lífstíl og og hreyfingu.

Íþróttamaður ársins er Rósmundur Númason. 

Rósmundur hefur í áraraðir stundað skíðagöngu og víðavangshlaup með góðum árangri.  Hann hljóp 10 km í Reykjavíkurmaraþoni síðasta sumar og keppti á flestum skíðagöngumótum með góðum árangri.  Á síðasta ári varð hann síðan Landvættur en þann titil hlýtursá einstaklingur sem lýkur keppni í eftirtöldum greinum á 12 mánaða tímabili:  Vesturhluti-50 km í Fossavatnsgöngu, Norðurhluti-Jökulsárhlaup 32.7 km hlaup, Austurhluti-Urriðavatnssundið 2,5 km og Suðurhluti-Blue Lagoon Challenge-60 km hjólreiðar frá Hafnarfirði.  Þetta tók Rósmund ekki nema 14 tíma.  Rósmundur er jákvæður íþróttamaður, hvetjandi, mikil fyrirmynd  og svo sannarlega vel að þessari viðurkenningu kominn.

Strandabyggð sendir verðlaunahöfum innilegar hamingjuóskir.