Annað ungmennaþing Strandabyggðar fer fram í félagsheimilinu á Hómavík þann 22. febrúar kl 12:15. Ungmennaráð skipuleggur þingið með aðstoð tómstundafulltrúa og býður upp á heimabakaðar pizzur að þessu tilefni. Þingið sækja vonandi allir íbúar sveitarfélagsins á aldrinum 14-25 ára í góðu samstarfi við skóla, stofnanir og fyrirtæki.

Á þinginu verður einblýnt á komandi breytingar í félagsheimilnu og flutning tómstundastarfs í húsið. Settar verða upp starfsstöðvar þar sem farið verður í hugmyndavinnu í tengslum við tómstundastarf fyrir ungt fólk í sveitarfélaginu en þess á milli eru skemmtistöðvar þar sem farið verður í ýmsar þrautir. Þingið tekur loks ákvörðun um hvað eigi að gera við þær upplýsingar sem safnast og hvernig eigi að vinna úr niðurstöðunum.

Gert er ráð fyrir að ungmennaráð skipuleggi fjögur ungmennaþing á ári hverju en áherslurnar, aðferðirnar og innihaldið geta verið mismunandi hverju sinni. Þess á milli vinnur ungmennaráð úr niðusrstöðum ungmennaþinga ásamt því að sinna nefdarsetu og sinna ýmsum erindum. Í ungmennaráði sitja Guðrún Júlíana, Kristbergur Ómar, Máney Dís, Birna Karen og Kristín Lilja.