Fimmtudaginn 28. og föstudaginn 29. maí  mun Strandabyggð standa fyrir hreinsunarátaki með íbúum sveitarfélagsins.  Íbúar Strandabyggðar taki saman höndum við fegrun og snyrtingu þannig að ásýnd sveitarfélagins verði hrein og snyrtileg fyrir sumarið.   Íbúar eru hvattir til að hafa samráð innan sinna hverfa um hvað má fegra og bæta.  Kl. 19:00 á föstudeginum hittast svo allir upp við Félagsheimilið þar sem starfsmenn sveitarfélagsins munu hafa heitt grill til staðar.  Fólk þarf að hafa  með sér mat á grillið, tjaldborð, stóla (ef veður leyfir til að borða úti), drykkjarföng og góða skapið. 

 

Starfsmenn áhaldahúss munu um og eftir helgina hirða rusl og garðaúrgang sem er settur út við lóðamörk.  Mikilvægt er að halda öllu járnarusli sér.  Eigendur fyrirtækja og stofnana eru einnig hvött til að taka þátt í átakinu þannig að Strandabyggð verði orðin hrein og snyrtileg fyrir Hvítasunnuhelgina. 

 

Íbúar í dreifbýli geta haft samband við starfsmenn áhaldahúss vegna hreinsunarátaks þó ekki sé reiknað með að sækja rusl í miklu magni á sveitabæi.

 

Eigendur fyrirtækja og stofnana eru einnig hvött til að taka þátt í átakinu og koma úrgangi sjálfir á viðeigandi stað í samráði við starfsmenn áhaldahúss.  Tökum nú höndum saman og gerum Strandabyggð enn fegurri!!  Hægt verður að ná í starfsmenn áhaldahúss í símum 861-4806 og 894-4806

 

 

 

 

 

 

Haldinn verður íbúafundur í Félagsheimilinu á Hólmavík í kvöld, mánudaginn 25. maí kl. 20:00, og eru það framkvæmdastjóri Hamingjudaga og menningarmálanefnd sem boða til fundarins.  Markmiðið með fundinum er að kynna þá atburði sem þegar eru komin á dagskrá Hamingjudaga og kalla eftir hugmyndum hjá íbúum um efni og skemmtiatriði.  Er vonast til að sem flestir sjái sér fært að mæta og komi sínum skoðunum og hugmyndum á framfæri.

Haldið verður á Ísafirði, Hólmavík, Patreksfirði og Reykhólum námskeið í markaðssetningu undir leiðsögn Jóns Páls Hreinssonar og hefst það 26. maí n.k. og steindur frá kl. 17:00 -21:00 en umsóknarfrestur er til 25. maí.  Er hér um að ræða hagnýtt námskeið fyrir fólk í ferðaþjónustu og aðra þá sem þurfa að koma sér á framfæri.  Verður lögð áhersla á heimasíður, bæklinga og "facebook".  Farið verður í grunnatriði í markaðssetningu og hvernig hægt sé að nýta þessa miðla sem best.  Tekin verða dæmi um hveð er vel gert sem og hvað er síður að virka og þátttakendur aðstoðaðir við að greina sínar áherslur í markaðsmálum.  Námskeiðið verður kennt í gegnum fjarfundabúnað til Hólmavíkur, Patreksfjarðar og Reykhóla og kostar 5.000 kr.  Hægt er að skrá sig hjá Fræðslumiðstöð Vestfjarða, í síma 451-0080 og á eftirfarandi slóð http://www.frmst.is/index.php/namskeid/texti/markasetning_ertu_a_gera_rett/ .  

Í dag hófust norrænir samspilsdagar hér á Hólmavík á vegum Tónskólans en 11 nemendur frá vinabæjum okkar í Hole í Noregi og Aarslev í Danmörku taka þátt í samspilinu ásamt 19 börnum frá Hólmavík.  Munu börnin æfa saman næstu tvo daga vítt og breitt um bæinn en búið er að leggja Café Riis, Braggann, Félagsheimilið og Grunnskólann undir spilverkið.  Næstkomandi laugardag munu síðan þessir ungu tónlistarmenn bjóða upp á tónleika í Félagsheimilinu á Hólmavík og hefjast þeir kl. 17:00.   Verður ókeypis aðgangur fyrir alla þá sem áhuga hafa á að njóta afraksturs samspilsins.  Með börnunum í för eru 6 fullorðnir sem dvelja hér á meðan og ekki ætti veðráttan að spilla fyrir hópnum, sumarblíða eins og hún gerist best.  Það er Bjarni Ó. Haraldsson tónlistarkennari sem hefur haft veg og vanda við undirbúning og framkvæmd daganna en fjölmargir aðrir hafa lagt hönd á plóginn til að gera samspilsdagana skemmtilega og lærdómsríka.  Í Tónskólanum á Hólmavík eru nú 57 nemendur á grunnskólaaldri í tónlistarnámi eða nærri 80% allra grunnskólanema í Strandabyggð.   

Strandabyggð vill óska íbúm sem og öllum landsmönnum gleðilegs sumars og þakkar fyrir veturinn.  Að baki er langur og strangur vetur en vonandi veit hækkandi sól á betri tíma fyrir íslenska þjóð.