Fundur nr. 1223 var haldinn í sveitarstjórn Strandabyggðar föstudaginn 23. maí  2014 í Hnyðju, Höfðagötu 3. Fundurinn hófst kl. 16:00. Jón Gísli Jónsson oddviti sveitarstjórnar, bauð fundarmenn velkomna og setti fundinn. Einnig sátu fundinn Jón Jónsson, Ásta Þórisdóttir, Viðar Guðmundsson og Bryndís Sveinsdóttir. Auk þess komu Þorsteinn Paul Newton og Ingibjörg Benediktsdóttir inn sem varamenn undir  lið 1. Andrea Kristín Jónsdóttir sveitarstjóri ritaði fundargerð. 

Jón Gísli leitar afbrigða við dagskrá og óskar eftir að taka eftirfarandi mál á dagskrá:

• Undir lið 7 – Erindi frá nemendum og starfsfólki Grunnskólans á Hólmavík, ósk um áheit frá sveitarstjórn Strandabyggðar vegna samfélagsverkefnisins „Hrein og fögur Hólmavík“, dagsett 20/05/2014
• Undir lið 8 – Erindi frá Sævari Benediktssyni, fyrirspurn um fæðiskostnað, dagsett 06/02/2014
• Undir lið 9 – Samanburður á fjárhagsáætlun, fyrsti ársfjórðungur.
• Undir lið 10 – Erindi frá Jóni Jónssyni: Börn og ungmenni í Strandabyggð til fyrirmyndar, dagsett 23/05/2014

Fundardagskrá er svohljóðandi:

1. Umboð til sveitarstjóra vegna undirritunar og frágangs skjala og láns vegna byggðasögu Stranda
2. Undirbúningur vegna sveitarstjórarkosninga 2014
3. Stjórnskipulagsúttekt KPMG – kynning á stöðu verkefnis
4. Staðardagskrá 2020 – kynning á stöðu verkefnis
5. Fundargerð Tómstunda-, íþrótta- og menningarnefnda frá 21/05/2014
6. Fundargerð Umhverfis- og byggingarnefndar frá 22/05/2014

Þá var gengið til dagskrár.

1. Umboð til sveitarstjóra vegna undirritunar og frágangs skjala og láns vegna byggðasögu Stranda

Jón Gísli Jónsson og Jón Jónsson víkja af fundi og Þorsteinn Paul Newton og Ingibjörg Benediktsdóttir koma inn sem varamenn.

Sveitarstjórn Strandabyggðar veitir Andreu K. Jónsdóttur sveitarstjóra Strandabygðar fullt og ótakmarkað umboð til að undirrita fyrirliggjandi kaupsamning og samkomulag vegna Byggðasögu Stranda.  Jafnframt veitir sveitarstjórn Andreu fullt og ótakmarkað umboð til að undirrita og ganga frá láni hjá Sparisjóði Strandamanna að fjárhæð 3.342.000 kr. og undirrita alla lántökupappíra vegna þess. Til nánari skýringar er vísað í bókun sveitarstjórnar frá fundi 1220 þann 15. apríl 2014, 1. dagskrárlið, þar sem fjallað var um samkomulag og útgáfu á Byggðasögu Stranda og minnisblaðs sem lagt var fyrir þann dagskrárlið og samþykkt.

Sveitarstjórn Strandabyggðar tilnefnir sveitarstjóra sem fulltrúa í ritnefnd verksins f.h. sveitarfélagsins.

Sveitarstjórn samþykkir umboðið með fjórum atkvæðum gegn einu.

Þorsteinn og Ingibjörg víkja af fundi og Jón Gísli og Jón taka sæti sín á ný.

2. Undirbúningur vegna sveitarstjórarkosninga 2014

Sveitarstjórn samþykkir fyrirliggjandi kjörskrárstofn sem kjörskrá og felur sveitarstjóra að undirrita kjörskrá í samræmi við 7. gr. laga nr. 5/1998.

3. Stjórnskipulagsúttekt KPMG – kynning á stöðu verkefnis

Drög að skýrslu KPMG lögð fram til kynningar. Sveitarstjórn samþykkir að halda áfram vinnu við úttektina og að KPMG kynni niðurstöður hennar fyrir nýrri sveitarstjórn.

4. Staðardagskrá 21 – kynning á stöðu verkefnis

Jón Jónsson fór yfir vinnu við Staðardagskrá 21. Stefnt er að því að núverandi sveitarstjórn ljúki við uppfærslu á Staðardagskrá 21 og afhendi uppfærða dagskrá nýrri sveitarstjórn.

5. Fundargerð Tómstunda-, íþrótta- og menningarnefndar frá 21/05/2014

Sveitarstjórn samþykkir fundargerð Tómstunda-, íþrótta- og menningarnefndar í heild sinni.

6. Fundargerð Umhverfis- og byggingarnefndar frá 22/05/2014

Varðandi lið 1 samþykkir sveitarstjórn að véla- og verkfærageymsla við bæinn Hnitbjörg verði færð á nafn Áskels Benediktssonar.

Varðandi lið 5b hafnar sveitarstjórn erindinu.

Að öðru leyti samþykkir sveitarstjórn fundargerð Umhverfis- og byggingarnefndar í heild sinni.

7. Erindi frá nemendum og starfsfólki Grunnskólans á Hólmavík, ósk um áheit frá sveitarstjórn Strandabyggðar vegna samfélagsverkefnisins „Hrein og fögur Hólmavík“, dagsett 20/05/2014

Sveitarstjórn Strandabyggðar samþykkir að heita 100 kr á hvert kíló sem safnast í samfélagsverkefninu „Hrein og fögur Hólmavík“.

8. Erindi frá Sævari Benediktssyni, fyrirspurn um fæðiskostnað, dagsett 06/02/2014

Sveitarstjórn felur sveitarstjóra að svara fyrirspurn Sævars Benediktssonar.

9. Samanburður á fjárhagsáætlun, fyrsti ársfjórðungur.

Samanburður á fjárhagsáætlun lögð fram til kynningar.

10. Börn og ungmenni í Strandabyggð til fyrirmyndar, erindi frá Jóni Jónssyni dagsett 23/05/2014

Jón Jónsson sveitarstjórnarmaður leggur fram eftirfarandi tillögu að bókun:

„Sveitarstjórn Strandabyggðar vill vekja athygli á því að síðustu misseri hafa börn og ungmenni í Strandabyggð hvað eftir annað staðið sig afburða vel á opinberum vettvangi og verið sveitarfélaginu til sóma. Margt mætti nefna í þessu sambandi, meðal annars frábæra frammistöðu ungmenna í elstu bekkjum Grunnskólans sem tóku þátt í verkefni og samkeppni Landsbyggðarvina í vetur. Þau kynntu hugmyndir sínar um betra samfélag á skemmtilegri kynningu á Hólmavík fyrr í mánuðinum og eitt verkefnið um bókmennta- og ljóðaviku á Hólmavík vann síðan fyrstu verðlaun í samkeppninni á landsvísu.

Eins er mjög minnisstæð frábærlega vel heppnuð uppsetning á leikritinu Skilaboðaskjóðunni sem sýnd var í vetur og var öllum aðstandendum og þátttakendum til sóma. Margt fleira mætti nefna, s.s. starfsemi Félagsmiðstöðvarinnar Ozon og þátttöku í söngkeppni Samfés á Vestfjörðum, góðan árangur í Skólahreysti, Nótunni og í stærðfræðikeppni FNV og 9. bekkjar, auk góðrar frammistöðu unga fólksins á margvíslegum íþróttamótum. Starfsemi ungmennaráðs Strandabyggðar hefur verið öflug og með uppbyggingu dreifnámsins á Hólmavík sem hefur nú starfað í einn vetur hefur nýr aldurshópur tækifæri til náms í heimabyggð og hefur jákvæð og hvetjandi áhrif á samfélagið.

Börn og unglingar í Grunn- og Tónskólanum og dreifnámi FNV á Hólmavík taka virkan þátt í uppákomum og skemmtunum, tónleikum og öðrum viðburðum. Með sama hætti eru þau sjálfum sér og Strandamönnum öllum til sóma, hvar sem þau koma á ferðalögum á vegum skólanna og sveitarfélagsins.

Það er sérstakt fagnaðarefni að börn og ungmenni í Strandabyggð setji mark sitt á mannlífið á Ströndum með jafn jákvæðum hætti og raun ber vitni.

Sveitarstjórn Strandabyggðar felur tómstundafulltrúa að stuðla að því að vinningshugmyndin í samkeppni Landsbyggðarvina um bókmennta- og ljóðaviku á Hólmavík geti orðið að veruleika, í samvinnu við hugmyndasmiðina. Í því skyni verði virkjaður samtakamáttur unga fólksins og annarra íbúa, mennta- og menningarstofnanna, félaga og fyrirtækja í Strandabyggð.“

Sveitarstjórn Strandabyggðar tekur heilshugar undir orð Jóns og samþykkir bókun og tillöguna samhljóða.

Sveitarstjórn Strandabyggðar vill koma á framfæri þökkum til starfsmanna sveitarfélagsins og nefndarmanna fyrir frábært samstarf á kjörtímabilinu. Íbúum sveitarfélagsins eru þökkuð ánægjuleg samskipti og nýrri sveitarstjórn óskað velfarnaðar á komandi árum.

 
Fundargerð yfirfarin og undirrituð og fundi slitið kl. 17:58.

Jón Gísli Jónsson                                                                     
Jón Jónsson

Ásta Þórisdóttir                                                                       
Bryndís Sveinsdóttir

Viðar Guðmundsson                                                                            
Þorsteinn Paul Newton

Ingibjörg Benediktsdóttir

23. maí 2014
Andrea Kristín Jónsdóttir
sveitarstjóri Strandabyggðar