Jólalestin er nýtt og spennandi frumkvöðlaverkefni á Vestfjörðum. Verkefnið snýst um að gefa af sér til samfélagsins og er unnið í samvinnu við FabLab nýsköpunarsmiðju á Ísafirði og stutt af fjölmörgum fyrirtækjum á Vestfjörðum. Smíðaðir hafa verið 12 jólapóstkassar og 12 jólasleðar.

Börn í Strandabyggð og annars staðar á Vestfjörðum fá tækifæri til að skrifa jólasveininum bréf og fá svar og óvæntan glaðning til baka. Bréfin eru skrifuð á sérstakt bréfsefni og þar er meginhugmyndin að allir geti látið gott af sér leiða og gert góðverk.

Einar Mikael Sverrisson stýrir verkefninu. Einar Mikael er einnig þekktur töframaður og hefur komið á Strandir sem slíkur.
Næstu daga verður póstkassinn til skiptis í Leikskólanum Lækjarbrekku og Grunn- og Tónskólanum á Hólmavík.

 

 

Leik-, grunn- og tónskóli á Hólmavík verður lokaður mánudag 22. nóvember og þriðjudag 23. nóvember á meðan starfsfólk og nemendur fara í sýnatöku og fá svör og framhaldið er undirbúið.

Sýnatakan fer þannig fram að þeir sem eru í smitgát fara í hraðpróf og þeir sem eru í sóttkví fara í pcr-próf.
Hafið samband við heilsugæslu ef þið finnið fyrir einkennum. Sjá https://www.covid.is/

Almannavarnir hafa ekki samband við skóla til að setja af stað smitrakningu nema smit séu eru rakin beint til einstaklinga innan skólans og aðrir einstaklingar hafa verið útsettir þar. Þannig er til dæmis ekki haft samband við skólann þegar smit fjölskyldumeðlima í einangrun eru rakin til þess að smit og útsetning eigi sér stað innan fjölskyldunnar.

Foreldrar hafa verið duglegir að hafa samband við skólann til að fá leiðbeiningar. Skólinn hefur verið í góðu sambandi við smitrakningarteymi Almannavarna og starfsfólk heilsugæslustöðvar HVE á Hólmavík hefur svör á reiðum höndum. Einnig er hægt að hafa samband og leita ráða hjá Læknavaktinni í síma 1700 og í gegnum spjallið á https://www.covid.is/

Grunn- og tónskólinn á Hólmavík verður opnaður aftur 16. nóvember eftir eins dags lokun og neikvæða niðurstöðu úr sýnatöku dagsins. Mikil áhersla verður lögð á persónulegar sóttvarnir, handþvott, spritt og grímunotkun meðal fullorðinna.
Foreldraviðtölum í grunnskóla verður frestað um viku. 

Starfsfólk, foreldrar og nemendur hafa fengið nánari upplýsingar. 

Grunn- og tónskólinn á Hólmavík verður lokaður á morgun mánudaginn 15. nóvember. Staðfest hefur verið smit Covid-19 í skólanum. Unnið er að smitrakningu en þegar hefur verið ákveðið að starfsfólk fari í sóttkví og sýnatöku.

Sömuleiðis hefur smitrakningarteymi sóttvarnalæknis og almannavarna ákveðið að nemendur á miðstigi; í 4.-6. bekk þurfi að viðhafa smitgát.

Til foreldra vegna smitgátar:
Þið þurfið að fara inn á https://smitgat.covid.is/ til þess að skrá barnið í smitgát og fá strikamerki til að komast í hraðpróf, en þau eru tekin á fyrsta og fjórða degi. Athugið að einungis á að skrá barnið sjálft í smitgát en ekki foreldra/forráðamenn.
Börn sem þurfa að fara í smitgát geta haldi áfram að mæta í skólann sé hann opinn en verða að fara í fyrrnefnd tvö hraðpróf.

Ef einstaklingur greinist jákvæður í hraðprófi fær viðkomandi strikamerki og boðun í PCR próf. Smitrakning hefst ef niðurstaða PCR prófs er jákvæð en einstaklingurinn er í einangrun frá niðurstöðu hraðprófs.
Einstaklingar í smitgát eru frjálsir ferða sinna en þurfa sérstaklega að fara gætilega m.t.t sóttvarna, mega mæta í skólann sé hann opinn en þurfa að forðast umgengni við viðkvæma einstaklinga.

Inni á Covid.is er að finna hvers kyns upplýsingar 

Aðalfundur

Foreldrafélag Grunnskólans á Hólmavík og Foreldrafélag leikskólans Lækjarbrekku boða til sameiginlegs aðalfundar miðvikudaginn 27. október 2021.

Fundurinn verður haldinn í Hnyðju kl. 20:00.

Dagskrá fundar:

• Skýrsla stjórnar og reikningar foreldrafélags leikskólans Lækjarbrekku
• Kosið um slit á Foreldrafélagi leikskólans Lækjarbrekku
• Skýrsla stjórnar og reikningar Foreldrafélags Grunnskólans á Hólmavík
• Kosið um breytingar á lögum Foreldrafélags Grunnskólans á Hólmavík
• Kosning stjórnar
• Önnur mál

Sýnum lit og fjölmennum á fundinn. Stuðningur foreldra við skólastarfið er dýrmætur og til góðs fyrir alla nemendur skólans. 

Bestu kveðjur

Stjórn foreldrafélags leikskólans Lækjarbrekku og
Stjórn foreldrafélags Grunnskólans á Hólmavík

Hinsegin fræðsla verður í Leikskólanum Lækjarbrekku og Grunnskólanum á Hólmavík dagana 18.- 19. október nk. 
Fræðari kemur frá Samtökunum78 en þau halda úti umfangsmikilli fræðslu um hinseginleikann fyrir alla aldurshópa. Fræðslan fer fram bæði í leikskólanum og grunnskólanum.

Hinsegin fræðsla fyrir öll áhugasöm verður í félagsheimilinu klukkan 18:00-19:00 mánudaginn 18. október. 
Um samtökin78 og starfsemi þeirra er hægt að fræðast á https://samtokin78.is/

 

Aukafundur nr. 1323, í sveitarstjórn Strandabyggðar verður haldinn miðvikudaginn 29.september 2021 kl. 16.00 í Hnyðju Höfðagötu 3, Hólmavík.

 

Fundardagskrá er svohljóðandi:

 

1. Forsendur fjárhagsáætlunar 2022
2. Hagræðingaraðgerðir frá ráðgjöfum sveitarfélagsins - Trúnaðarmál

 

Gert er ráð fyrir að eftirtaldir sveitarstjórnarmenn sitji fundinn:

Jón Gísli Jónsson

Ásta Þórisdóttir

Guðfinna Lára Hávarðardóttir

Pétur Matthíasson

Jón Jónsson

 

 

Strandabyggð 28.september 2021

Jón Gísli Jónsson oddviti

Ólympíuhlaup ÍSÍ 2021 fer fram á Hólmavík fimmtudaginn 23. september klukkan 10:10. Þátttakendur verða ræstir frá Íþróttamiðstöðinni og hlaupa einn, tvo eða fjóra hringi innanbæjar á Hólmavík.

Með Ólympíuhlaupi ÍSÍ er leitast við að hvetja nemendur skólanna til að hreyfa sig reglulega og stuðla þannig að betri heilsu og vellíðan. Hlauparar geta valið á milli vegalengdanna 2,5 km, 5 km og 10 km.

Lögð er áhersla á holla hreyfingu og að allir taki þátt. Þátttakendur fá viðurkenningarskjal.
Foreldrum og öðru áhugasömu fólki er sérstaklega boðið að taka þátt í hlaupinu. Klæðum okkur eftir veðri.

Skólasetning Grunn- og Tónskóla verður við Grunnskólann á Hólmavík, þriðjudaginn 24. ágúst klukkan 8:30 en skólasetning verður með lágstemmdu sniði líkt og síðastliðið haust. Nýjum nemendum og foreldrum þeirra verður boðið í heimsókn áður en skóli hefst.