A A A

Valmynd

Fréttir

Skólastarf

Alþjóðlegt þaraverkefni í Strandabyggð

23. mars 2025 | Þorgeir Pálsson

Verkefni fyrirtækisins Fine Foods Íslandica ehf hlýtur rúmar 10.2 milljón íslenskra króna fjárstyrk fyrir EU Horizon Project.

Fine Foods Íslandica ehf og samstarfsaðilar hafa hlotið 70.000 € styrk frá Evrópusambandinu til að styðja við framkvæmd IceKelp verkefnisins 2024-2026. Verkefnið er samstarf Fine Foods Íslandica ehf., Háskólaseturs Vestfjarða og Strandabyggðar, sem kemur að verkefninu sem opinber ábyrgðaraðili. Markmiðið er að hanna líkan fyrir sjálfbæra þararækt og blátt hagkerfi í dreifbýli.

Atlantic-Arctic AGORA (A-AAGORA), er hluti af mun stærra verkefni, EU Horizon Project sem styður við markmið framkvæmdarstjórnar Evrópu um verndum og uppbyggingu haf- og vatnasvæða fyrir árið 2030 og er þar heildar fjárhæðin 9.778.174,76 € eða rúmur 1.4 milljarður íslenskra króna. Þar er markmiðið hjá A-AAGORA að þróa nýstárlegar lausnir til að virkja bláa hagkerfið í sjávarbyggðum. Í ferlinu er lögð áhersla á þátttöku nærsamfélagsins og hagsmunaaðila á sama tíma og tryggja þarf umhverfisvernd og stuðla að félagslegri seiglu.

Helstu samstarfsaðilar A-AAGORA eru sveitarfélög í Noregi, Írlandi, Portúgal og á Íslandi tekur Strandabyggð þátt, eins og fyrr segir. Allir þessir aðilar eru í samstarfi við rannsóknarhópa og sérstaklega Trøms-sveitarfélagið í Noregi, sem prófar og metur lausnir fyrir sveitarfélög á Norður-Íshafssvæðinu.

Verkefnaáætlunin var kynnt af Fine Foods Íslandica ehf fyrir sveitarstjórn Strandabyggðar í nóvember 2024 sem samþykkti að styðja við verkefnið. Meðal markmiða verkefnisins eru:

  • Að eiga samskipti við hagsmunaaðila á staðnum með upplýsingafundum og opnum vinnustofum um þararækt.
  • Að miðla fræðslu og þekkingu varðandi þararækt í Strandabyggð.
  • Að stunda rannsóknir á líffræðilegum fjölbreytileika í tengslum við þararæktun.

Þorgeir Pálsson sveitarstjóri er fulltrúi Strandabyggðar. Jamie Lee hjá Fine Foods Íslandica ehf. er framkvæmdastjóri verkefnisins og ber rekstrarlega ábyrgð á verkefninu. Hún, ásamt Bergsveini Reynissyni hjá Nesskel ehf. munu miðla sinni þekkingu, og veita þjálfun í verklegri framkvæmd. Háskólasetur Vestfjarða stendur fyrir rannsóknum á líffræðilegum fjölbreytileika í kringum þararæktun og mun Alexandra Tyas, fjórða árs Ph.D. nemandi í fornleifafræði við Háskóla Íslands stýra rannsóknum á líffræðilegri fjölbreytni. Dr. Catherine Chambers er fulltrúi Háskólaseturs Vestfjarða og sér um að upplýsa hagsmunaaðila varðandi þær rannsóknir.  Fine Foods Íslandica hefur unnið mikla rannsólknarvinnu að undanförnu og verður sú vinna notuð sem grunnur í rannsóknir Háskólaseturs Vestfjarða.

Fulltrúum hvers hóps er skylt að mæta á mánaðarlega netfundi og þrjá staðfundi/vinnustofu. Fjárhagsleg umsýsla er í höndum skrifstofu- og fjármálastjóra Strandabyggðar, Salbjörgu Engilbertsdóttur í samstarfi við Fine Foods Íslandica ehf. Endanleg skýrsla um fjárhag verkefnisins verður verður gerð opinber eftir að verkefninu lýkur í maí 2026.

Styrkurinn mun standa undir mestum kostnaði við verkefnið og Fine Foods Íslandica ehf. mun einnig leggja fram um 2,5 milljónir króna til að mæta ófyrirséðum útgjöldum sem geta komið upp. 

Íbúum Strandabyggðar verður boðið á opinn fund í Hnyðju fimmtudaginn 27. mars kl 16.00-17.30, þar sem verkefnið í heild sinni verður kynnt fyrir áhugasömum. Þar munu aðstandendur þess svara öllum þeim spurningum sem geta legið á fólki, og þeir sem vilja skrá sig til að taka þátt í verkefninu geta gert það á fundinum. 

Fyrir hönd aðstandenda verkefnisins
Þorgeir Pálsson

Samgöngur á Vestfjörðum - Opinn íbúafundur á Patreksfirði

14. mars 2025 | Heiðrún Harðardóttir
Vegagerðin, í samstarfi við Vestfjarðastofu, býður til opins íbúafundar í Félagsheimilinu á Patreksfirði þriðjudaginn 18. mars klukkan 17:30.

Fulltrúar frá Vegagerðinni munu fjalla um ýmis samgöngumál sem tengjast svæðinu og boðið verður upp á spurningar og umræður.

Vegagerðin vill eiga opið og hreinskilið samtal við íbúa á Vestfjörðum um samgöngumál svæðisins. Markmiðið með fundinum er að veita íbúum upplýsingar um yfirstandandandi og fyrirhugaðar framkvæmdir, fá innsýn í starfsemi Vegagerðarinnar á svæðinu og koma sínum sjónarmiðum á framfæri.


Til að tryggja að sem flestir geti fylgst með verður fundinum einnig streymt á netinu, auk þess sem hægt verður að senda inn spurningar í gegnum Slido.com.


Allir eru velkomnir, og að sjálfsögðu verður heitt á könnunni.


Dagskrá
  • Ávarp – Páll Vilhjálmsson, formaður innviðanefndar Fjórðungssambands Vestfirðinga.
  • Nýframkvæmdir – yfirstandandi framkvæmdir og hvað er fram undan. Sigurþór Guðmundsson, verkefnastjóri á framkvæmdadeild.
  • Samgönguáætlun og jarðgangakostir á Vestfjörðum Guðmundur Valur Guðmundsson, framkvæmdastjóri þróunarsviðs.
  • Staða vegakerfisins. Pálmi Þór Sævarsson, svæðisstjóri Vestursvæðis.
  • Vetrarþjónusta – hvernig er þjónustunni háttað? Bergþóra Kristinsdóttir, framkvæmdastjóri þjónustusviðs.

Gerður Sveinsdóttir, bæjarstjóri Vesturbyggðar, verður fundarstjóri


Fundinum verður streymt beint í gegnum þessa slóð: https://youtube.com/live/CT28JO3Fu3o?feature=share


Hægt er að senda inn spurningar á Slido með þessum kóða #samgongur

Sjá frétt hjá Vegagerðinni: Samgöngur á Vestfjörðum – opinn íbúafundur á Patreksfirði – Vegagerðin

Starfsmenn óskast í félagslega liðveislu á félagssvæði félagsþjónustu Stranda og Reykhólahrepps.

14. mars 2025 | Heiðrún Harðardóttir

Starfsmenn óskast í félagslega liðveislu á félagssvæði félagsþjónustu Stranda og Reykhólahrepps.


Um er að ræða störf á Drangsnesi og á Hólmavík.


Markmið starfsins er að styðja við félagslega þátttöku og daglegt líf.


Laun eru samkvæmt kjarasamningum sambands íslenskra sveitarfélag og viðkomandi stéttarfélaga.


Upplýsingar eru veittar í síma 451-3510 og fyrirspurnir og umsóknir má einnig senda á felagsmalastjori@strandabyggd.is


Umsóknir sendist á Hlíf Hrólfsdóttur, félagsmálastjóra. Hafnarbraut 25.510 Hólmavík.

Sveitarstjórnarfundur nr. 1374 í Strandabyggð, 11.mars 2025

07. mars 2025 | Salbjörg Engilbertsdóttir

Fundur nr. 1374 í sveitarstjórn Strandabyggðar verður haldinn þriðjudaginn 11. mars kl. 16.00 í Hnyðju, Höfðagötu 3, Hólmavík.

 

Fundardagskrá er svohljóðandi:

  1. Lántaka Strandabyggðar hjá Lánasjóði sveitarfélaga nr. 2503 14 og nr. 2503 15
  2. Lántaka Sorpsamlags Strandasýslu ehf nr. 2503 13
  3. Samþykkt um meðhöndlun úrgangs í Strandabyggð, seinni umræða
  4. Samþykkt um stjórn og fundarsköp Strandabyggðar, seinni umræða
  5. Staðfesting á skipan í stýrihóp vegna gerðar skóla/menntastefnu
  6. Vinnumálastofnun, beiðni um skráningu tengiliðar fyrir fjölmenningu, 6.3.25
  7. Velferðarnefnd Vestfjarða, tilnefning í fulltrúaráð og framkvæmdaráð, 11.10.23
  8. Innviðaráðuneytið, beiðni um umsögn vegna frumvarpsdrög um Jöfnunarsjóð sveitarfélaga
  9. Erindi til sveitarstjórnar frá siðanefnd Sambands íslenskra sveitarfélaga, 28.2.25
  10. Jarðhitaboranir á Gálmaströnd
  11. Heilsársstörf við fiskvinnslu í Strandabyggð
  12. Endurbætur við Grunnskólann á Hólmavík
  13. Erindi til sveitarstjórnar, Sinfóníuhljómsveit Íslands, 28.2.25
  14. Erindi til sveitarstjórnar, Landsbyggðin lifir, LBL, 4.3.25
  15. Erindi til sveitarstjórnar, Gefum íslensku séns, 6.3.25
  16. Ísafjarðarbær, beiðni um umsögn vegna máls nr. 0170/2025 í Skipulagsgátt
  17. Ísafjarðarbær, beiðni um umsögn vegna máls nr. 0173/2025 í Skipulagsgátt
  18. Vinnuskýrsla sveitarstjóra
  19. Forstöðumannaskýrslur
  20. Velferðarnefnd, fundargerð 17.2.25
  21. Heilbrigðisnefnd Vestfjarðasvæðis, fundargerð 151 fundar, 20.2.25
  22. Svæðisskipulagsnefnd Vestfjarða, fundargerð 13. Fundar, 10.2.25 og 14. Fundar 27.2.25
  23. Samtök sjávarútvegssveitarfélaga, fundargerð 84. fundar stjórnar, 24.1.25
  24. Samband íslenskra sveitarfélaga, fundargerðir 963., 965., 966., 967., 968., 969. og 970. fundar stjórnar, 31.1.25, 18.2.25, 19.2.25, 20.2.25, 21.2.25, 24.2.25 og 25.2.5

 Hljóðupptaka verður birt með fundargerð á vef Strandabyggðar 

 

Gert er ráð fyrir að eftirtaldir sveitarstjórnarmenn sitji fundinn:

Þorgeir Pálsson

Grettir Örn Ásmundsson

Júlíana Ágústsdóttir

Matthías Sævar Lýðsson

Hlíf Hrólfsdóttir

 

Strandabyggð 7. mars

       Þorgeir Pálsson oddviti

Félagsþjónusta Stranda og Reykhólahrepps auglýsir eftir starfsfólki

27. febrúar 2025 | Heiðrún Harðardóttir

Félagsþjónusta Stranda og Reykhólahrepps auglýsir eftir starfsfólki  í vaktavinnu í skammtímavistun og stuðningsþjónustu á Reykhólum. Mjög skemmtilegt og krefjandi starf í fallegu og rólegu umhverfi.


Starfshlutfall 50-100% og um er að ræða allar tegundir vakta.


Um framtíðarstörf er að ræða og stöður eru lausar strax eða eftir samkomulagi.


Helstu verkefni og ábyrgð:

  • Aðstoð við þjónustunotendur til sjálfshjálpar og stuðla að þátttöku þeirra í samfélaginu
  • Aðstoða þjónustunotendur við athafnir daglegs líf og heimilishald
  • Setja sig inn í tjáningarform og sérstakar aðstæður þjónustunotenda
  • Fylgjast með andlegri og líkamlegri líðan þjónustunotenda og aðstoða við heilsufarslega þætti.
  • Vinnur eftir þjónustuáætlun í samvinnu við þjónustunotenda og yfirmann.

Hæfnikröfur:

  • Menntun sem nýtist í starfi er kostur
  • Reynsla af sambærilegum störfum æskileg
  • Frumkvæði og sjálfstæði í starfi, sveigjanleiki, jákvæðni og hæfni í mannlegum samskiptum.
  • Íslenskukunnátta
  • Bílpróf
  • Hreint sakavottorð

Stöðurnar eru lausar strax eða eftir samkomulagi.
Laun eru samkvæmt samningum sambands íslenskra sveitarfélaga og viðkomandi stéttarfélaga

Við hvetjum áhugasama, óháð kyni og uppruna um að sækja um.

 

Umsóknarfrestur er til og með  11.mars 2025

 

Umsóknir ásamt fylgigögnum sendist Hlíf Hrólfsdóttur, félagsmálastjóra, Hafnarbraut 25, 510 Hólmavík.

 

Upplýsingar eru veittar í síma 451-3510 og fyrirspurnir og umsóknir má einnig senda á felagsmalastjori@strandabyggd.is

 

Ýmis verkefni í Strandabyggð

26. febrúar 2025 | Þorgeir Pálsson

Kæru íbúar Strandabyggðar, 

Það hefur verið mikið að gerast í Strandabyggð að undanförnu og því rétt að gera grein fyrir því að einhverju leyti. 

Úthlutun almenns byggðakvóta 

 Á fundi sveitarstjórnar þann 11. febrúar sl. var samþykkt með þremur atkvæðum T lista, að hverfa frá sérreglum varðandi úthlutun Byggðakvóta á fiskveiðiárinu 2024/2025 og styðjast við reglugerðina í óbreyttri mynd.  Fulltrúar A lista sátu hjá.  Reglugerðin var upphaflega hugsuð til að styðja við fiskvinnslu í byggðarlögum úti á landi og efla þau þannig að grundvöllur skapaðist fyrir veiðum og vinnslu.  Hér á Hólmavík hefur ekki verið fiskvinnsla lengi vel, fyrr en nú með tilkomu Vilja fiskverkunar, og hefur sveitarstjórn því fram að þessu, óskað eftir undanþágu frá vinnsluskyldu.  Sveitarstjórnir síðustu ára hafa einnig viðhaft þá sérreglu, að skipta úthlutuðum byggðakvóta niður á báta eftir a) veiðireynslu þeirra og lönduðum afla í byggðarlaginu og b) hluta kvótans jafnt milli allra kvótahafa.  Hafa hlutföllin lengi verið 75% tengd veiðireynslu og 25% jafnt á alla. 

Í þetta sinn lágu fyrir nýjar og breyttar forsendur.  Í fyrsta lagi er nú vinnsla á Hólmavík, þannig að grundvöllur fyrir undanþágu frá vinnsluskyldu var brostinn.  Eins hefur verið rætt um að mikilvægt sé að fá sem mest af afla báta frá Hólmavík inn til löndunar á Hólmavík, en ekki í öðrum höfnum.  Landanir hér skila tekjum til hafnarsjóðs og þar með til samfélagsins.  Þessi rök hljóta að vega þungt þegar horft er til heildarhagsmuna sveitarfélagsins. 

Úthlutun byggðakvóta er ávallt viðkvæmt og umdeilt mál og svo er enn, þrátt fyrir að forsendur séu nú skýrari en áður, ef horft er til heildarhagsmuna samfélagsins.  Það eru þess vegna ekki allir sáttir við þessa ákvörðun og er fullur skilningur á því að einhverjir væntu annarrar niðurstöðu. 

Meirihlutinn tók hins vegar skýra afstöðu með heildarhagsmunum samfélagsins og vildi með þessari ákvörðun styðja við veiðar og vinnslu frá Hólmavík, fyrir Hólmavík.  Með þessu fyrirkomulagi ættu þeir að fá meiri kvóta sem sinna sjómennsku á heilsárs grundvelli og því er horft til þess hvata að nú geta þeir sem vilja, aukið við veiðireynslu sína með löndunum á Hólmavík og þannig skapað sér sterkari stöðu þegar næst verður úthlutað byggðakvóta á grundvelli veiðireynslu. 

 

Íbúafundur um aðalskipulag Strandabyggðar 

Miðvikudaginn 19. febrúar sl. var haldinn vel sóttur íbúafundur í félagsheimilinu og fór þar fram kynning á aðalskipulagi Strandabyggðar og einnig voru áform um byggingu hótels á Hólmavík kynnt almenningi. 


Nýtt aðalskipulag er leiðarljós okkar í uppbyggingu samfélagsins.  Það segir til um það hvernig skipulag þorpsins er og verður, hvernig nýjar iðnaðar- og íbúðarlóðir verða til, hver skilgreining umhverfisins er og verður og með hvaða hætti við sem samfélag viljum þróast.  Margrét Ólafsdóttir frá Landmótun rakti helstu áherslur í aðalskipulaginu og sagði frá því hver landnýting einstakra svæða væri.  Í lok fundar gátu íbúar kynnt sér teikningar aðalskipulagsins og deiliskipulags Brandskjóla og Jakobínutúns.  Brandskjól er framtíðar íbúðasvæði Strandabyggðar og Jakobínutún er samheiti yfir það svæði þar sem nú er félagsheimili, íþróttamiðstöð og sundlaug, tjaldsvæði og svo það svæði þar sem hótelið á að rísa.  Öll þessi gögn eru aðgengileg á skrifstofu Strandabyggðar. 

 

Hótel Strandir, er vinnuheiti nýs, 4ra stjörnu hótels sem mun rísa að öllu óbreyttu á Hólmavík á næstu árum.  Gert er ráð fyrir um 60 herbergja hóteli í fyrsta gæðaflokki og er heildarkostnaður áætlaður um þrír milljarðar.  Þau Friðjón Sigurðarson og Erla Ósk Ásgeirsdóttir, frá Fasteignaumsýslunni, kynntu þessi áform og hjá þeim kom fram að gert er ráð fyrir að framkvæmdir hefjist síðla þessa árs og að hótelið opni árið 2027. 

Það er alltaf svo þegar framsæknarhugmyndir eiga í hlut, að skiptar skoðanir eru um málið.  Á fundinum komu fram nokkrar efasemdir um staðsetningu hótelsins, sem mun rísa á klettunum fyrir neðan sundlaugina, með glæsilegt og einstakt útsýni út fjörðinn.  Það er hins vegar mikilvægt í allri umræðu um hótelið, að huga að þeim miklu hagsmunum og margföldunaráhrifum sem hótelið mun hafa fyrir Strandabyggð og samfélagið á Hólmavík og í raun alla Vestfirði.  Það er horft til mikilvægis þessa verkefnis víða að, enda um glæsilegt og óhemju spennandi verkefni að ræða. 

Sterkar Strandir – lokaíbúafundur 

Fimmtudaginn 20 febrúar sl. var lokaíbúafundur í verkefninu Sterkum Ströndum.  Verkefninu lauk formlega á síðasta ári, en í samningi sveitarfélagsins við aðstandendur verkefnisins; Byggðastofnun og Vestfjarðastofu, er gert ráð fyrir að sveitarfélagið haldi utan um þau verkefni eða fyrirtæki sem eru í gangi, í eitt ár eftir að formlegu verkefni lýkur.  Það er kærkomið og spennandi verkefni fyrir sveitarfélagið.  Þau verkefni sem við munum vinna með út þetta ár eru: Fine Foods, Strandagluggar og hurðir, Galdur brugghús, Sveppasmiðjan, Norðurfjara og Fótaaðgerðarstofan Tíu tásur.  Sveitarstjóri mun halda utan um þessa vinnu með stuðningi frá Vestfjarðastofu. 

Á íbúafundinum var unnið í hópum og farið yfir ávinning af verkefninu Sterkum Ströndum og leitast var við að svara með hvaða hætti stjórnvöld gætu stutt við landsbyggðina í gegnum svona verkefni.  Var þar kallað eftir t.d. bættum samgöngum, skattaíviljunum, auknu fjármagni til verkefna og lengri verkefnatíma, svo dæmi séu tekin.  Nánar verður gerð grein fyrir þessu síðar. 

Eins komu fram á fundinum, helstu niðurstöður íbúakönnunar sem gerð var í lok janúar og byrjun febrúar um afstöðu íbúa til verkefnisins og þess að búa hér í Strandabyggð.  Heilt yfir kom margt jákvætt út úr könnuninni; eins og að hér sé gott mannlíf og menning, jákvæð tengsl við náttúru og nokkuð öflugt atvinnulíf.  Enn eru þó einhverjir sem telja að ósætti í samfélaginu sé hindrun fyrir framþróun verkefnisins.  Þátttakendur á íbúafundinum fengu súpur frá Galdrasafninu og var enginn svikinn af þeim veitingum. 


Það er sem betur fer mikið að gerast á Ströndum og í Strandabyggð þessa dagana og margt jákvætt framundan. 


Áfram Strandabyggð! 

 

 

Fleiri fréttir

Nýjustu myndirnar

Strandir.is - fréttir

Könnun

Facebook

Atburðadagatal

Næstu atburðir

Fundargerðir

Skýrslur og samþykktir

Gjaldskrár

Umsóknir

Vefumsjón