Auglýst er eftir umsóknum um styrki í tengslum við Sterkar Strandir. Um er að ræða fyrstu úthlutun í verkefninu en verkefnið er hluti af byggðaþróunarverkefninu Brothættar byggðir. Umsóknarfrestur er til 24. júlí 2020.

Alþingi ákvað að veita auknu fjármagni til verkefna á vegum Brothættra byggða og því eru til ráðstöfunar 13,7 m. kr. í þessari úthlutun. Verkefni sem verða styrkt að þessu sinni og hljóta styrk úr aukaframlagi Alþingis til Brothættra byggða á þessu ári þurfa að vera hafin í síðasta lagi 1. september 2020 og lokið eigi síðar en 1. apríl 2021 og eru umsækjendur beðnir um að hafa það að leiðarljósi við gerð umsókna.

Meginmarkmið verkefnisins Sterkar Strandir eru eftirfarandi:
• Sterkir innviðir og öflug þjónusta
• Stígandi í atvinnulífi
• Stolt og sjálfbært samfélag

Væntanlegar umsóknir þurfa að taka mið af þessum markmiðum.

Á vef Byggðastofnunar (www.byggdastofnun.is) eru nánari reglur um styrkveitingar, markmiðaskjal verkefnisins. Á vef Vestfjarðarstofu (www.vestfirdir.is) má nálgast umsóknareyðublað sem umsækjendur um styrk skulu notast við. Athugið að ekki er krafist mótframlags frá umsækjanda. Það styrkir umsókn ef verkefnið laðar fram fjármuni og krafta aðstandenda verkefnisins og samstarfsaðila. Samstarf aðila sem að jafnaði starfa ekki saman styrkir umsóknina. Umsækjendur er hvattir til að lesa ofangreindar leiðbeiningar og leita sér aðstoðar hjá verkefnisstjóra. Vönduð umsókn sem styður við framtíðarsýn og meginmarkmið verkefnisins er líklegri til árangurs.

Nánari upplýsingar og ráðgjöf veitir Sigurður Líndal verkefnisstjóri í síma 661-4698 eða á netfanginu sigurdurl@vestfirdir.is  

Kæru íbúar Strandabyggðar,

Eins og fram hefur komið í fjölmiðlum var enduráætlun Jöfnunarsjóðs kynnt fyrir helgi.  https://www.stjornarradid.is/efst-a-baugi/frettir/stok-frett/2020/06/24/Nyjar-og-endurskodadar-aaetlanir-um-framlog-ur-Jofnunarsjodi-sveitarfelaga/  Þar kemur fram veruleg skerðing á framlögum til sveitarfélaga um allt land.  Skerðingin er mikil hér í Strandabyggð, um 70 milljónir frá fyrri áætlun og helgast hún aðallega af; almennri tekjuskerðingu ríkisins vegna Covid-19, breytinga á íbúafjölda Strandabyggðar, sem hefur áhrif á svokallað útgjaldajöfnunarframlag og skerðingar á svokölluðu fasteignaskattsframlagi. 

Sveitarstjórn óskaði strax eftir símafundi með Jöfnunarsjóði og var hann haldinn sl föstudag.  Síðan þá hafa komið nánari gögn frá Jöfnunarsjóði sem við erum að rýna í og skoða.  Eins er búið að óska eftir fundi með ráðherra sveitarstjórnarmála og verður sá fundur í byrjun ágúst.  Þá erum við að taka saman upplýsingar fyrir þingmenn og aðra sem við munum virkja vegna þessa.

Það er ljóst að þessi mikla skerðing er meiri en okkar spár gengu út á.  Eins og fram kom í pistli mínum þann 17. júní sl. var búið að leggja fram og samþykkja af sveitarstjórn áætlun um niðurskurð í deildum sveitarfélagsins sem og verulegan niðurskurð á framkvæmdum.  Þetta verður nú allt endurskoðað í ljósi þessara síðustu breytinga. 

Það eru margar hliðar á þessu máli og auðvelt að tína sér í stóryrðum og grjótkasti.  Lausnin liggur hins vegar að mínu mati í því, að skoða forsendur framlaga Jöfnunarsjóðs og hlutverki hans gagnvart sveitarfélögunum í landinu.  Það er oft kallað eftir "fyrirsjáanleika í rekstri" og heyrist þetta gjarnan frá útgerðarfyrirtækjum í landinu.  Þeirri beiðni hafa stjórnvöld oft sýnt skilning, enda flestir sammála því að í öllum rekstri þarf að vera hægt að sjá eitthvað inn í framtíðina.  Þessi krafa á ekki síður við um rekstur sveitarfélaga, því sú samfélagsmynd sem byggist upp með árunum, er ekki snúin niður í skyndi. Sú samfélagsmynd með tilheyrandi þjónustustigi og lífsskilyrðum, verður að búa við stöðugleika. 

Á þessum forsendum þarf að ræða þetta mál. 

Kveðja
Þorgeir Pálsson
Sveitarstjóri Strandabyggðar

Kæru íbúar strandabyggðar,

Ærslabelgurinn verður tilbúinn til notkunar á morgun, fimmtudag! Það er verið að ganga frá í kring um hann núna og við skulum gefa þeim sem það gera færi á því, en á morgun er óhætt að sparka af sér skónum og láta vaða!

Munum umgengisreglurnar!

Sterkar Strandir - Áfram Strandabyggð!

Lóan - menningarverðlaun Strandabyggðar fyrir árið 2020 voru veitt í ellefta sinn föstudaginn 26. júní, við setningu Hamingjudaga. Athöfnin fór fram í Hnyðju og var vel sótt af áhugasömu heimafólki og gestum á ýmsum aldri. Áður en verðlaunin voru veitt las skáldkonan Gerður Kristný upp úr nokkrum verka sinna, en hún dvaldi í menningardvöl í Strandabyggð um skeið í júní. Mjög góður rómur var gerður að orðum Gerðar Kristnýjar, enda þar á ferðinni afburðar skáldkona og svo er hún auðvitað ættuð af Ströndum!...
Meira

Kæru íbúar Strandabyggðar,

Eins og sést, eru hafnar framkvæmdir á Jakobínutúni við að setja niður ærslsbelg.  Gert er ráð fyrir að vinna við uppsetningu taki tvo daga eða svo og við munum fagna mikið þegar þessu verki er lokið.

Sterkar Strandir - Áfram Strandabyggð!