Fimm nemendur útskrifuðust úr leikskólanum Lækjarbrekku þann 16. júní 2011 á fjölmennum og skemmtilegum grilldegi sem haldinn var við skólann. Sveitarfélagið Strandabyggð óskar útskriftarnemunum þeim Brynhildi, Jóni Hauk, Míró, Sólveigu Maríu og Sævari og fjölskyldum þeirra innilega til hamingju með áfangann! Victor Örn Victorsson frá Strandahestum mætti á grilldaginn ásamt hestinum Degi og vöktu þeir félagar miklar vinsældir. Gestir fengu grillaða hamborgara og glæsilega andlitsmálningu og héldu nemendur og starfsfólk skólans glaðir í sumarfrí að hátíðinni lokinni. Fyrsti dagur eftir sumarfrí er þriðjudagurinn 26. júlí.

 

Vilt þú vinna í skemmtilegu og líflegu umhverfi við bæði gefandi og skapandi starf? Spennandi tímar eru framundan í leikskólanum Lækjarbrekku. Starfsfólk leikskólans er að hefja stefnumótunarvinnu fyrir skólann og er fyrirhugað að innleiða nýja leikskólastefnu næsta vetur. Leikskólinn Lækjarbrekka auglýsir tvö störf haustið 2011:

Leikskólakennari - leiðbeinandi
Auglýst er eftir leikskólakennara í 100% starf. Um er að ræða tímabundna stöðu til eins árs. Starfsmaður þarf að geta hafið störf þann 26. júlí 2011.

Nýtt starf
Leikskólinn Lækjarbrekka auglýsir nýtt starf matráðs og ræstitæknis Um er að ræða 100% starf frá kl. 08:00 - 16:00. Umsækjandi þarf að geta hafið störf þann 26. júlí 2011.
...
Meira

Sumarið er tíminn! Það er líflegt um að litast í Strandabyggð þessa dagana. Börn að leik, ferðamenn á götum úti, Vinnuskólinn að fegra bæinn, kaffihús á hverju horni og gróðurinn farinn að sýna sínar bestu hliðar. Sveitarfélagið Strandabyggð minnir ökumenn á að hafa gangandi vegfarendur sérstaklega í huga þegar ekið er um Hólmavík og framhjá bæjum í dreifbýli. Gleðilegt sumar!

Upplýsingamiðstöð Strandabyggðar á Hólmavík, Holmavik Tourist Information, er opin alla daga milli kl. 9:00 - 18:00. Upplýsingamiðstöðin er til húsa í Galdrasafninu en undanfarnar vikur hefur framkvæmdastjóri safnsins og umsjónarmaður Upplýsingamiðstöðvarinnar, Sigurður Atlason, gert gagngerar breytingar á hluta húsnæðisins. Útkoman er stórskemmtileg. Þegar fréttaritari var á staðnum komu tvær ungar stúlkur í gættina og sögðu hæ! Sigurður Atlason þekkti strax á framburðinum á þessu stutta orði að þarna væru komnir gestir frá Kanada sem reyndist satt vera og voru gestirnir alsælir með móttökurnar.

 

Í Upplýsingamiðstöðinni eru veittar upplýsingar um alla ferðaþjónustu og staðhætti á Ströndum og líf og tilveru íbúanna, auk þess sem veittar eru upplýsingar um Vestfirði og Ísland allt. Ferðaþjónustuaðilar á Ströndum eru hvattir til að setja sig í samband við Upplýsingamiðstöðina og koma upplýsingaefni um þjónustu sína á framfæri. Ferðamönnum fjölgar hratt með degi hverjum. Sveitarfélagið Strandabyggð óskar ferðaþjónum, ferðalöngum og íbúum öllum gleðilegs ferðasumars!

Leit stendur nú yfir á nafni á neðstu hæðinni í Þróunarsetrinu á Hólmavík. Neðsta hæðin var opnuð föstudaginn 10. júní með handverksmarkaði Strandakúnstar og fallegri sýningu á vegum Þjóðfræðistofu um Höllu skáldkonu eftir Guðfinnu M. Hreiðarsdóttur. Við opnunina bauð Þjóðfræðistofa gestum og gangandi upp á léttar veitingar og vorboðinn ljúfi, handverksmarkaður Strandakúnstar, var líflegur að vanda. Opið verður fyrir gesti og gangandi á neðstu hæðinni í sumar milli kl. 14:00 - 17:00 alla virka daga. Rýmri opnunartími verður auglýstur sérstaklega í kringum Hamingjudaga.

Á neðstu hæðinni, sem er í stöðugri þróun og vinnslu, eru nú húsgögn og munir úr ýmsum áttum. Gamlir munir úr gamla kaupfélaginu fá þar nýtt hlutverk auk þess sem þar eru húsgögn í eigu Leikfélags Hólmavíkur sem eigendur Orlofsdvalar á Felli í Kollafirði gáfu leikfélaginu fyrr í vikunni vegna flutninga. Þá hefur sveitarfélagið Strandabyggð sett upp barnahorn á neðstu hæðinni auk þess sem gestir og gangandi geta gripið í spil, flett í gömlum bókum eða sest við taflborðið. Allir þeir sem luma á hugmyndum um nafn á neðstu hæðina mega láta starfsfólk Strandabyggðar vita eða senda tölvupóst á netfangið strandabyggd@strandabyggd.is