Þriðjudaginn 30. nóvember 2010 verða dýralæknarnir Hjalti Viðarson og Flora-Josephine með viðveru í Áhaldahúsinu á Hólmavík milli klukkan 16:30-18:00. Þau bjóða upp á ormahreinsun fyrir hunda auk þess sem hægt er að láta bólusetja bæði hunda og ketti.

Verð fyrir bólusetningu hunda er kr. 5000 og  kr. 3500 fyrir ketti. Ekki verður posi á staðnum og er því dýraeigendur hvattir til að vera með peninga á sér.

Ef dýraeigendur hafa hug á að biðja dýralækna um önnur verk í leiðinni er þeim bent á að hafa samband við dýralæknana með fyrirvara í síma 434-1122 eða 866-6528.

Skemmtilegur og skapandi hugmyndafundur um fjárhagsáætlun Strandabyggðar fer fram í Félagsheimilinu á Hólmavík þriðjudaginn 23. nóvember kl. 20:00. Stutt kynning verður á stjórnsýslu og starfsemi sveitarfélagsins áður en farið verður í hugmyndavinnu í umræðuhópum. Leitast verður við að svara fjórum spurningum: Hvar má hagræða? Hvað má ekki spara? Hvernig getum við aukið tekjur? Hvað kostar lítið en gerir mikið? Litlar, stórar, nýjar og gamlar hugmyndir eru vel þegnar. Frábært tækifæri til að hittast, spjalla og hafa áhrif á framtíð Strandabyggðar. Allir íbúar eru hvattir til að mæta!

Mynd af vef Þjóðfræðistofu

Guðrún Tryggvadóttir, myndlistakona, heldur sýningu á verkum sínum í Austurhúsi Galdrasafnsins sunnudaginn 21. nóvember kl. 16:00. Kvenfélagið verður með kaffi- og kökusölu í tengslum við sýninguna. Guðrún vinnur að verkum sem myndgera ættartengsl og kynslóðaskipti. Hún er fyrsti þátttakandinn í Skelinni, lista- og fræðimannadvöl á Ströndum, sem Þjóðfræðistofa stendur fyrir. Skelin er nú þegar uppbókuð fyrir um tuttugu lista- og fræðimenn sem munu dvelja í húsnæði Hólmakaffi að Hafnarbraut 7. Búast má við fjölmörgum menningarviðburðum í vetur í tengslum við Skelina en verkefnið er m.a. styrkt af sveitarfélaginu Strandabyggð. Frekari upplýsingar um bakgrunn og feril Guðrúnar má sjá á heimasíðu Þjóðfræðistofu.

Núna stendur yfir vinna við fjárhagsáætlun Strandabyggðar 2011. Opinn hugmyndafundur með íbúum verður haldinn þriðjudaginn 23. nóvember í Félagsheimilinu á Hólmavík og hefst hann kl. 20:00. Sveitarstjóri og sveitarstjórn munu leiða umræðuhópa þar sem óskað er eftir hugmyndum frá íbúum um hvar megi hagræða og spara í rekstri sveitarfélagsins. Einnig er hægt að senda inn tillögur á vefsíðu Strandabyggðar, sjá hér, til 1. desember n.k.

Allir velkomnir!

Leikskólinn Lækjarbrekka á Hólmavík auglýsir starf matráðs laust til umsóknar. Staðan losnar 15. desember n.k. Leikskólinn Lækjarbrekka er einsetinn tveggja deilda leikskóli og þar dvelja börn frá 1 árs aldri. Um 30 börn eru á báðum deildum. Einkunnarorð skólans eru:

Gleði  -  Virðing  -  Vinátta

Áhugi á börnum og samskiptum við þau er nauðsynlegur ásamt skipulögðum vinnubrögðum og samstarfshæfni.

Nánari upplýsingar um leikskólann Lækjarbrekku er að finna á www.strandabyggd.is og www.123.is/laekjarbrekka

Umsóknir ásamt ferilskrá og meðmælendum berist til skrifstofu Strandabyggðar, Hafnarbraut 19, 510 Hólmavík. Umsóknarfrestur rennur út á hádegi föstudaginn 19. nóvember n.k. Nánari upplýsingar veitir skrifstofa Strandabyggðar í síma 451-3510. Einnig er hægt að senda póst í netfangið holmavik@holmavik.is