Skrifstofa Strandabyggðar flytur starfsemi sína frá Hafnarbraut 19 að Höfðagötu 3 fimmtudaginn 20. janúar n.k. Einhver röskun verður á þjónustu skrifstofunnar vegna þessa næstu daga, m.a. á síma- og tölvusambandi. Hægt er að ná í Ingibjörgu Valgeirsdóttur sveitarstjóra í síma 616 9770 meðan símasamband liggur niðri.

Skrifstofa Strandabyggðar verður til að byrja með eingöngu staðsett á annarri hæð að Höfðagötu 3 og verður gengið inn um aðalinngang að Þróunarsetrinu á Hólmavík.

Beðist er velvirðingar á þeim óþægindum sem flutningarnir hafa í för með sér.

Grunnskólinn á Hólmavík auglýsir starf stuðningsfulltrúa í 1. og 2. bekk laust til umsóknar. Um er að ræða 77,5% starf frá kl. 8:00-14:00 mánudaga, þriðjudaga og fimmtudaga, kl. 8:00-16:00 á miðvikudögum og kl. 8:00-13:00 á föstudögum til 1. júní 2011.

Skólinn er samrekinn grunn- og tónlistarskóli sem leggur sérstaka áherslu á tónlist og tjáningu í skólastarfi. Í skólanum er lögð áhersla á sveigjanlega og fjölbreytta kennsluhætti, einstaklingsmiðað nám og samvinnu. Einnig er áhersla lögð á umhverfismál og flaggar skólinn Grænfánanum frá því í vor.

Umsækjandi þarf að hafa góða skipulagshæfileika og hæfni í mannlegum samskiptum.

Lýsing á starfi: Stuðningsfulltrúi vinnur í teymi með kennurum bekkjarins, sérkennara og iðjuþjálfa. Starfsvettvangur stuðningsfulltrúa verður innan bekkjarins sem hann er ráðinn til og er stuðningsfulltrúi kennara til aðstoðar við að sinna einum eða fleiri nemendum sem þurfa sérstaka aðstoð. Starfið miðar fyrst og fremst að því að auka færni og sjálfstæði þessara nemenda, félagslega, námslega og í daglegum athöfnum. Starfið tekur mið af þar til gerðri áætlun sem hefur það að markmiði að draga smám saman úr þörf nemanda á stuðningi í þeim tilvikum þar sem það er hægt. Yfirmaður stuðningsfulltrúa eru skólastjórar en umsjónarkennari sér um faglegt nám og starf  bekkjarins og fylgir stuðningsfulltrúi því starfi. Einnig eru sérkennari og iðjuþjálfi ráðgefandi  um aðferðir og lausnir fyrir einstaka nemendur. Laun eru samkvæmt kjarasamningum á almennum vinnumarkaði vegna starfs stuðningsfulltrúa.

Umsóknarfrestur er til föstudagsins 21. janúar nk.

Umsóknum skal skilað til:
Skrifstofu Strandabyggðar, netfang holmavik@holmavik.is
Hafnarbraut 19
510 Hólmavík

Frekari upplýsingar um starfið veita:
Bjarni Ómar Haraldsson skólastjóri, sími 892-4666 og 451-3129
Hildur Guðjónsdóttir aðstoðarskólastjóri, sími 451-3129 og 661-2010.
Netfang skólans er: skolastjorar@holmavik.is
Veffang skólans er: www.strandabyggd.is/grunnskolinn

Sorpsamlag Strandasýslu minnir á sorphreinsunardag á Hólmavík mánudaginn 17. janúar n.k. Íbúar eru hvattir til að moka frá tunnunum sínum.

Fundur 1176 í sveitarstjórn Strandabyggðar verður haldinn þriðjudaginn 18. janúar 2011 og hefst hann kl. 18:15. Fundurinn verður haldinn á skrifstofu sveitarfélagsins að Hafnarbraut 19 og verður það væntanlega síðasti sveitarstjórnarfundurinn sem haldinn verður þar en fyrirhugað er að skrifstofan verði flutt að Höfðagötu 3 fyrir 1. febrúar n.k.

Dagskrá fundarins má sjá hér.

Strandamenn óska strákunum okkar í íslenska handknattleikslandsliðinu góðs gengis á HM í Svíþjóð og senda þeim hamingjuóskir með sigurinn gegn Ungverjum í fyrsta leik þeirra á mótinu í dag. Áfram Ísland!