Auglýsing á niðurstöðu sveitarstjórnar skv. 18. gr. skipulags-og byggingarlaga.

 

Sveitarstjórn Strandabyggðar hefur samþykkt tillögu að aðalskipulagi Strandabyggðar 2010-2022. Skipulagsuppdrættir, greinargerð og umhverfisskýrsla voru til sýnis á skrifstofu sveitarfélagsins, hjá Skipulagsstofnun og á heimasíðu sveitarfélagsins, http://strandabyggd.is/adalskipulag/skrar_og_skjol/ með fresti til að gera athugasemdir til  28. júlí 2010. Átta athugasemdir bárust og hefur þeim verið svarað. Gerðar voru minniháttar breytingar á tillögunni, sjá skýringar vegna aðalskipulags á heimasíðu Strandabyggðar. Aðalskipulagstillagan verður send Skipulagsstofnun sem gerir tillögu til umhverfisráðherra um lokaafgreiðslu hennar.

               
Hólmavík, 3. nóvember 2010

Sveitarstjóri Strandabyggðar.

Leikskólinn Lækjarbrekka á Hólmavík auglýsir eftir starfsmanni í 60% starfshlutfall. Æskilegt er að viðkomandi geti hafið störf sem fyrst. Leikskólinn Lækjarbrekka er einsetinn tveggja deilda leikskóli og þar dvelja börn frá 1 árs aldri. Um 30 börn eru á báðum deildum. Einkunnarorð skólans eru „Gleði-Virðing-Vinátta".

 

Áhugi á börnum og samskiptum við þau er nauðsynlegur ásamt skipulögðum vinnubrögðum og samstarfshæfni.

 

Nánari upplýsingar um leikskólann Lækjarbrekku er að finna á www.strandabyggd.is og www.123.is/laekjarbrekka

 

Umsóknir ásamt ferilskrá og meðmælendum, þurfa að berast skrifstofu Strandabyggðar Hafnarbraut 19, 510 Hólmavík, eigi síðar en á hádegi mánudaginn 1. nóvember. Nánari upplýsingar veitir skrifstofa Strandabyggðar í síma 451-3510 eða á netfanginu holmavik@holmavik.is

 

 

Hólmavík,  22. október 2010

Sveitarstjóri Strandabyggðar

Sveitarfélagið Strandabyggð hvetur allar konur sem starfa hjá sveitarfélaginu sem og aðrar konur á Ströndum til að fagna kvenna- frídeginum með því að ganga út frá störfum sínum mánudaginn 25. október kl. 14:25 og fjölmenna í Upplýsingamiðstöðina á Hólmavík.

 

Í ár verður haldið upp á kvennafrídaginn í 35. sinn. Fyrsti kvenna- frídagurinn árið 1975 markar djúp spor í baráttusögu íslenskra kvenna. Talið er að þann dag hafi alls 90% kvenna lagt niður störf eða nánast helmingur þjóðarinnar, til þess að krefjast sömu réttinda og launa og karlar nutu á vinnumarkaði.

 

Kvennafrídagurinn í ár er helgaður baráttu kvenna gegn kynbundnu ofbeldi. Kynbundið ofbeldi er sprottið af sama meiði og annað misrétti sem konur standa frammi. Það hefur að hluta til náð að brjótast upp á yfirborðið sem viðurkenndur vandi. Nægir í því sambandi að nefna misréttið sem viðgengst á vinnumarkaðnum og birtist í kynbundnum launamun og almennt minni framamöguleikum.

Nú gefst fólki á Norðurlandi og Vestfjörðum tækifæri til að stunda nám í Menntastoðum með dreifnáms- fyrirkomulagi eða fjarfundabúnaði. Dreifnám felst í því að kennt er einu sinni í viku á þriðjudögum frá kl. 16:00-21:00 og annan hvern laugardag frá kl. 09:00-17:00. Kennslan fer fram á Akureyri en þeir sem búa annars staðar geta sótt námið í gegnum fjarfundabúnað í námsverum, meðal annars á Hólmavík. Námið er skipulagt í samvinnu við símenntunarmiðstöðvar SÍMEY, Farskólann á Norðurlandi vestra, Fræðslumiðstöð Vestfjarða og Þekkingarnet Þingeyinga.

 

Menntastoðir hefjast 5. nóvember 2010 og lýkur í lok maí 2011. Námið hefst á tveimur vinnuhelgum og kennt er frá hádegi á föstudegi fram á sunnudag. Mikilvægt er að allir nemendur mæti þá til Akureyrar. Menntastoðir eru nám á framhaldsskólastigi og gefur um 50 einingar inn í Háskólabrú Keilis. Aldurstakmark 20 ára og eldri.

 

Markmið Menntastoða er að stuðla að jákvæðu viðhorfi námsmanna til áframhaldandi náms og auðvelda þeim að takast á við ný verkefni. Í náminu er lögð áhersla á að nemendur læri að læra, efli sjálfstraust sitt og lífsleikni. Helstu námsgreinar eru stærðfræði, íslenska, upplýsingatækni, enska og danska.

 

Skráning og nánari upplýsingar um námið er hjá SÍMEY í síma 460-5720, betty@simey.is, valgeir@simey.is eða á www.simey.is

 

Skráningu lýkur 2. nóvember 2010

Það var líf og fjör á skrifstofu Strandabyggðar í morgun þegar nemendur í 5. og 6. bekk Grunnskólans á Hólmavík mættu þangað með umsjónarkennara sínum Kolbeini Skagfjörð Jósteinssyni. Erindið var að afhenda undirskriftalista þar sem nemendur við skólann fóru fram á að körfuboltavöllur á skólalóðinni verði lagfærður hið fyrsta þannig að nemendur geti stundað þá göfugu íþrótt í frítíma sínum. Ingibjörg Valgeirsdóttir sveitarstjóri tók við undirskriftalistanum að viðstöddum oddvita og varaoddvita og verður málið rætt á næsta sveitarstjórnarfundi.