Mánudaginn 4. janúar er starfsdagur í Grunn- og Tónskólanum á Hólmavík en kennsla hefst samkvæmt stundaskrá þriðjudaginn 5. janúar 2016. 

Litlu jólin verða í Félagsheimilinu 17. desember, klukkan 13:00 - 15:00. Nemendur grunnskóla, tónskóla og elstu nemendur leikskóla sýna leik, söng og dansatriði á sviðinu. Að því loknu verður gengið í kringum jólatréð undir tónlistarflutningi hljómsveitarinnar Grunntóns sem skipuð er starfsmönnum skólanna. Jólasveinarnir láta sig ekki vanta og hafa boðað komu sína.

Allir eru hjartanlega velkomnir!

Sölutorg í lok þemadaga verður föstudaginn 23. október klukkan 13:00 - 14:00 á gangi gamla skólans. Þar selja nemendur afrakstur framleiðslu sinnar á þemadögunum. Hóflegt verð. Enginn posi. Kaffi og kökur til sölu.
Allur ágóði rennur til söfnunar fyrir leiktækjum á skólalóðinni.

Vikuna 21. - 25. september eru samræmd könnunarpróf í 10., 7. og 4. bekk.
21. september - Íslenska 10. bekkur
22. september - Enska 10. bekkur
23. september - Stærðfræði 10. bekkur
24. september - Íslenska 4. og 7. bekkur
25. september - Stærðfræði 4. og 7. bekkur

Markmið prófanna er að kanna stöðu nemenda við upphaf ofangreindra bekkja og eru niðurstöðurnar ætlaðar grunnskólanum til úrvinnslu og til að hægt sé að bregðast við í einstökum þáttum eða einstaklingsmiðað. Ekki er tekið mið af samræmdum könnunarprófum við inntöku í framhaldsskóla.

Átakið Göngum í skólann er hafið. Segja má að margar flugur séu slegnar í einu höggi vegna þess að Norræna skólahlaupið er hlaupið í dag 16. september á degi náttúrunnar. Hlaupið verður um Borgirnar og um leið leystar nokkrar þrautir sem tengjast náttúrunni. Í boði er að fara 2,5 - 5 og 10 km. Engin tímataka er í gangi en hver keppir við sjálfan sig og miklu máli skiptir að svara sem flestum spurningum rétt á þrautablaðinu. Næstu daga verður sitthvað gert sem tengist hreyfingu, við fáum góða gestakennara og nemendur á hverju stigi skipuleggja hreyfingu fyrir aðra nemendur og starfsfólk.
http://www.gongumiskolann.is/

Í næstu viku höldum við áfram að ganga í skólann, hreyfa okkur og taka á móti góðum gestum en þá tekur skólinn þátt í hreyfivikunni Move Week. 
http://moveweek.eu/

Tónlist fyrir alla verður 31. ágúst klukkan 11:00 í Hólmavíkurkirkju. Að þessu sinni eru það Sigga Eyrún og Kalli Olgeirs sem flytja gestum söngleikjadagskrá. 
Til að taka sem best á móti þeim ætlum við að reyna að læra eitt lítið erindi með ógnarlöngu orði, superkallifragilistikexpíallidósum.

Starfsmaður óskast í Skólaskjól sem er skipulögð frítímaþjónusta við börn í 1. - 4. bekk Grunnskólans á Hólmavík.  Áhersla er lögð á fjölbreytt, faglegt starf og þægilegt andrúmsloft sem einkennist af virðingu og leikgleði.

Daglegur vinnutími er frá klukkan 14:00 - 16:00 auk 30 mínútna við undirbúning og frágang. Starfið er undir faglegri umsjón tómstundafulltrúa Strandabyggðar í samstarfi við skólastjóra Grunnskólans á Hólmavík. 

Umsóknarfrestur er til 25. ágúst 2015. Viðkomandi þarf að geta hafið störf sem fyrst.

Nánari upplýsingar gefur Hrafnhildur Guðbjörnsdóttir, skólastjóri í síma 451 3430 eða skolastjori@strandabyggd.is

Námskeið fyrir foreldra um uppbyggingu sterkrar sjálfsmyndar hjá börnum á leikskóla og grunnskólastigi verður haldið í Félagsheimilinu föstudaginn 21. ágúst klukkan 16:00.  Anna Sigríður Jökulsdóttir sálfræðingur hjá Sálfræðisetrinu og einn aðstandenda vefsíðunnar sjalfsmynd.com flytur fræðsluerindi fyrir foreldra.  Hún fjallar um hvað einkennir sterka sjálfsmynd, hverjir eru grundvallarþættir sjálfsmyndar og hvernig má hafa áhrif á þá þætti. Einnig hvernig vinna má að því að börnin okkar virki vel í leik og starfi, líði vel í eigin skinni og meti sig og aðra í sanngjörnu ljósi. Sjálfsmynd er veigamikill þáttur í andlegri líðan og hefur áhrif á hvernig við hugsum, tölum og hegðum okkur. Sterk sjálfsmynd er eitt besta veganesti sem við getum gefið börnunum okkar út í lífið. Námskeið fyrir starfsfólk skólans verður fyrr um daginn.

Grunnskólinn á Hólmavík verður settur mánudaginn 24. ágúst 2015 klukkan 16:00 í Félagsheimilinu á Hólmavík. Nemendur hitta þar umsjónarkennara og fá afhentar stundaskrár og önnur gögn.  Að skólasetningu lokinni býður sveitarstjórn Strandabyggðar til útgáfuteitis vegna útgáfu nýrrar Skólastefnu Strandabyggðar. Skólastefnan verður kynnt og boðið verður upp á vöfflur og kaffi.

 

Getur þú lesið á 100 stöðum?

Langir og spennandi sumardagar eru frábær tími fyrir börn. Þau uppgötva
nýja hluti og eignast nýja vini og áhugamál. Sumarið er líka frábær tími
til að kynnast nýjum bókum sem vinir spjalla um. Lestur sumarbóka styrkir
ekki aðeins orðaforða og þekkingu heldur tryggir það líka að börn tapi
ekki lestrarfærninni sem þau hafa náð í skólanum í vetur.

Talsvert margar rannsóknir sýna að börn sem lesa á sumrin koma miklu
ferskari til leiks að hausti í lestri en börn sem lesa ekkert á meðan
skólinn er í fríi.

Í sumar ætlum við að bjóða ykkur að taka þátt í skemmtilegum
sumarlestrarleik. Hægt er að nálgast formin  útprentuð
hjá bókaverði á bókasafninu. Í sumar reynir þið að fylla blaðið – þó ekki
fleiri en 3 reiti á dag því það er svo mikilvægt að reyna að lesa eitthvað
á hverjum degi. Síðustu tíu staðina má barnið velja sjálft.

Í haust á barnið að skila blaðinu til kennara síns. Ef  það hefur lesið á
70 stöðum eða fleirum fær það viðurkenningu og verðlaun frá skólanum. 

Ljósmyndasamkeppni.

Einnig ætlum við að hafa ljósmyndasamkeppni þar sem dregin verður út ein
mynd úr öllum innsendum myndum. Sérstök verðlaun verða veitt fyrir þá
mynd.

Taktu mynd af barninu þínu að lesa í sumar og merktu myndina #bokavik#(nafn nemanda) á facebook eða instagram.
Munið að merkja við að myndin sé opin/public. Einnig er hægt að senda myndir á netfangið bokasafn@strandabyggd.is

Gangi þér vel að lesa og gleðilegt sumar.