Nú hefur sveitarfélagið Strandabyggð gefið öllum nemendum Grunnskólans á Hólmavík merkt endurskinsvesti til þess að tryggja öryggi þeirra í umferðinni. Mikilvægi þess að vera vel sýnilegur í umferðinni á jafnt við börn sem og fullorðna, hvort sem fólk er gangandi, hlaupandi eða hjólandi. Hildur Guðjónsdóttir aðstoðarskólastjóri fagnar því að Strandabyggð vilji tryggja að börnin okkar séu vel upplýst á dimmustu mánuðum ársins til að forða slysum. Börnin eru hvött til að nota vestið á leið til og frá skóla og við önnur tækifæri, til dæmis á leið í íþróttir og tómstundastarf.

Mikilvægt er að foreldrar og starfsfólk skóla hvetji og veiti því athygli hvort börnin þeirra séu sjáanleg í umferðinni og að foreldrar séu sjálfir til fyrirmyndar og noti endurskinsmerki. Hannes Leifsson yfirlögregluþjónn á Hólmavík kom og ræddi við börnin og fræddi okkur um hvernig hægt er að auka öryggi allra í umferðinni margfalt með því að nota þessi einföldu, léttu og þægilegu öryggistæki sem endurskinsvesti og endurskinsmerki eru. Börn sem eru með endurskin sjást miklu fyrr en ella eða í um 100 metra fjarlægð frá ökutæki. Nemendur fóru strax í vestin sín eins og sjá má á meðfylgjandi myndum og voru þakklát sveitarfélaginu fyrir umhyggjuna sem þeim hefur verið sýnd með þessari góðu gjöf og í þakkarskyni tóku þau lagið með viðstöddum.

Nýlega skrifaði sveitarfélagið Strandabyggð undir styrktarsamning við hið öfluga Skíðafélag Strandamanna. Í samningnum, sem er til þriggja ára og gildir því út árið 2014, er kveðið á um árlegan stuðning Strandabyggðar við Skíðafélagið ásamt endurgjaldslausum afnotum af húsnæðisaðstöðu í eigu sveitarfélagsins undir æfingar og aðra viðburði. Skíðafélagið hefur verið sérstaklega öflugt undanfarin ár í að efla veg og vanda skíðaíþróttarinnar á Ströndum, einkum og sér í lagi skíðagöngu. Í þeirri grein á félagið fólk í fremstu röð sem hefur náð góðum árangri á mótum, til dæmis á Andrésar Andar leikunum.

Við undirskrift samningsins kom fram í máli Rósmundar Númasonar, stjórnarmanns í Skíðafélaginu, að félagið stefnir á mikla uppbyggingu í Selárdal á komandi árum. Þar hefur félagið haft aðsetur undanfarin ár til æfinga og mótshalds. Þar á að reisa húsnæði til afnota fyrir iðkendur, hvort sem er við æfingar eða mótshald. Framtíð skíðaíþróttarinnar á Ströndum er því björt.

Dagur leikskólans var haldinn hátíðlegur á leikskólanum Lækjarbrekku 6. febrúar s.l. eins og á flestum leikskólum landsins. 6. febrúar er merkisdagur í íslenskri leikskólasögu því þann dag árið 1950 stofnuðu frumkvöðlar leikskólakennara fyrstu samtök sín. Dagur leikskólans er samstarfsverkefni Félags leikskólakennara, Félags stjórnenda leikskóla, mennta- og menningarmálaráðuneytis, Sambands íslenskra sveitarfélaga og Heimilis og skóla. Tilgangurinn er að auka jákvæða umræðu um leikskólann, vekja umræðu um hlutverk leikskóla og starf leikskólakennara og kynna starfsemina út á við.

Fjölmargir lögðu leið sína í leikskólann Lækjarbrekku og fengu innsýn inn í fjölbreytt starf skólans eins og sjá má á meðfylgjandi myndum. Ingibjörg Alma Benjamínsdóttir leikskólastjóri afhenti Ingibjörgu Valgeirsdóttur sveitarstjóra plakat sem félag leikskólakennara gaf út í tilefni dagsins en þetta var í fimmta sinn sem Dagur leikskólans er haldinn á Íslandi.

Krakkar í Félagsmiðstöðinni Ozon á Hólmavík gerðu góða ferð til Súðavíkur síðastliðinn föstudag undir stjórn Arnars S. Jónssonar tómstundafulltrúa Strandabyggðar. Þar fór fram SamVest sem er söngkeppni vestfirskra félagsmiðstöðva. Tíu atriði tóku þátt í keppninni, þrjú frá Hólmavík, þrjú frá Ísafirði, tvö frá Þingeyri og tvö frá Súðavík. Hólmvísku keppendurnir stóðu sig frábærlega og öll ungmennin voru til fyrirmyndar í allri framgöngu sinni.

Spennan var mikil þegar tilkynnt var um úrslitin og gríðarlega mikið fagnað þegar ljóst varð að eitt af atriðunum frá Ozon, Gógó-píurnar sem fluttu lagið Lýstu skært, hafði komist áfram í aðalkeppnina í Reykjavík sem haldin verður í Laugardalshölll laugardaginn 3. mars ásamt frábæru atriði frá Súðavík. Eftir keppnina dönsuðu menn undir skífuþeytingi frá tónlistarmanninum Haffa Haff þar til lagt var af stað heim, dálítið fyrr en til stóð, til að komast örugglega yfir Steingrímsfjarðarheiðina.

Undirbúningur fyrir þátttöku í stóru keppninni syðra er þegar hafinn. Að mörgu er að huga, t.d. búningum, framkomu og söng svo fátt eitt sé nefnt. Keppnin hefst kl. 13:00 og lýkur kl. 16:00, en hún verður sýnd í beinni útsendingu í Ríkissjónvarpinu. Strandabyggð óskar unga fólkinu til hamingju með árangurinn og hvetur þau til frekari afreka í marsbyrjun!

Hér má sjá GóGó-píurnar flytja lagið sitt í Súðavík.

Nú hefur sveitarfélagið Strandabyggð opnað smíðastofu fyrir eldri borgara á fimmtudögum frá kl. 14:00 - 17:00. Með smíðastofunni er verið að koma á fjölbreyttara félagsstarfi en á opnum íbúafundi með eldri borgurum sem Félagsþjónusta Stranda og Reykhólahrepps stóð fyrir í haust komu fram óskir þar um. Ingibjörg Sigurðardóttir mun hafa umsjón með smíðastofunni eins og félagsstarfinu sem boðið er uppá á þriðjudögum. Eldri borgarar eru hvattir til að nýta sér þetta nýja félagsstarf sem fer fram í Grunnskólanum í Hólmavík, nýju byggingunni. 

Allir velkomnir - heitt á könnunni!