Umhverfisvikunum sem nú standa yfir er tekið fagnandi af Strandamönnum. Íbúar tóku heldur betur til hendinni á umhverfisdegi á Hólmavík sem haldinn var um helgina eins og sjá má á meðfylgjandi myndum og Hólmavíkurkirkja lét ekki sitt eftir liggja því í dag komu sjálfboðaliðar og hreinsuðu stéttar og umhverfi í kringum kirkjuna. Sorpsamlag Strandasýslu mun vera með aukagáma fyrir timbur og járnarusl í Gula hverfinu á eftirtöldum stöðum í sumar:

- Bitrufjörður dagana 27. júní - 1. júlí 2011
- Kollafjörður dagana 4. - 8. júlí 2011
- Tungusveit dagana 11. - 15. júlí 2011
- Ísafjarðardjúp dagana 18. - 22. júlí 2011

Eru allir íbúar hvattir til að taka þátt í hreinsunarátakinu.

Umhverfisdagur er haldinn á Hólmavík laugardaginn 25. júní 2011. Íbúar eru hvattir til að hreinsa til í kringum húsin sín og á opnum svæðum í hverfum sínum. Hægt er að fara með rusl í Sorpsamlag Strandasýslu sem verður með opið milli kl. 14:00 - 17:00, auk þess sem starfsmenn Áhaldahúss munu fara um bæinn og taka rusl á eftirfarandi tímum og eru íbúar hvattir til að aðstoða við að setja á bílpallinn eftir þörfum:

- 14:00 Bláa hverfið.
- 15:00 Appelsínugula hverfið
- 16:00 Rauða hverfið

...
Meira

Vilt þú vinna í skemmtilegu og líflegu umhverfi við bæði gefandi og skapandi starf? Spennandi tímar eru framundan í leikskólanum Lækjarbrekku. Starfsfólk leikskólans er að hefja stefnumótunarvinnu fyrir skólann og er fyrirhugað að innleiða nýja leikskólastefnu næsta vetur. Leikskólinn Lækjarbrekka auglýsir tvö störf haustið 2011:

Leikskólakennari - leiðbeinandi
Auglýst er eftir leikskólakennara í 100% starf. Um er að ræða tímabundna stöðu til eins árs. Starfsmaður þarf að geta hafið störf þann 26. júlí 2011.

Nýtt starf
Leikskólinn Lækjarbrekka auglýsir nýtt starf matráðs og ræstitæknis. Um er að ræða 100% starf frá kl. 08:00 - 16:00. Umsækjandi þarf að geta hafið störf þann 26. júlí 2011.

Leitað er eftir öflugu starfsfólki sem hefur gaman af börnum, býr yfir góðri samskiptahæfni og hefur ríka þjónustulund. Einnig er skipulagshæfni og jákvæðni mikilvægur kostur.

Nánari starfslýsingar er hægt að nálgast á skrifstofu leikskólastjóra eða í síma 451 3411 milli kl. 13:00 og 16:00 alla virka daga. Einnig er hægt að senda tölvupóst á leikskólastjóra í netfangið: leikskolastjori@holmavik.is

Umsækjendur eru beðnir um að skila inn umsóknum á skrifstofu sveitarfélagsins að Höfðagötu 3, ásamt ferilskrá og meðmælendum fyrir kl. 12:00 á hádegi mánudaginn 27. júní 2011. Þeir sem eiga eldri umsóknir um störf á leikskólanum Lækjarbrekku eru beðnir um að endurnýja umsóknir sínar. Leikskólastjóri áskilur sér rétt til að hafna öllum umsóknum standist þær ekki kröfur.

Vegna mikillar þátttöku í umhverfisdegi fyrirtækja og stofnanna á Hólmavík sem haldinn var í dag mun Áhaldahús Strandabyggðar bæta við þjónustu á morgun, föstudaginn 24. júní 2011. Þeir vinnustaðir sem óska eftir að láta fjarlægja rusl geta haft samband við Snorra Jónsson í síma 861-4806. Pantanir eru teknar niður milli kl. 8:00 - 12:00.

Hólmakaffi, Hólmadrangur, Kaupfélag Steingrímsfjarðar á Hólmavík, Hólmavíkurhöfn, Þróunarsetrið, Trésmiðjan Höfði og fleiri vinnustaðir nýttu sér þjónustu Áhaldahússins í dag auk þess sem önnur fyrirtæki og stofnanir hafa sjálf flutt mikið magn af rusli í flokkunarstöð Sorpsamlagsins og á urðunarsvæðið í Skeljavík. Sveitarfélagið Strandabyggð fagnar góðri þátttöku og hverri ferð sem farið er með rusl á sinn stað og minnir íbúa á umhverfisdag í rauða, bláa og appelsínugula hverfinu á laugardaginn.

Aðalskipulag Strandabyggðar 2010 - 2022 hefur verið staðfest af umhverfisráðherra, Svandísi Svavarsdóttur. Er áætlað að auglýsing þess efnis birtist í B-tíðindum Stjórnartíðinda í byrjun júlí.

Sveitarfélagið Strandabyggð fagnar þessum áfanga. Fjöldi aðila hafa komið að þessari vinnu, bæði hér hjá sveitarfélaginu sem og hjá stofnunum og ráðuneytum, auk þess sem fyrirtækið Landmótun hefur leitt verkefnið undir stjórn Yngva Þórs Loftssonar og Óskars Arnar Gunnarssonar. Þá hafa íbúar lagt sitt af mörkum með mikilvægum ábendingum. Sveitarfélagið Strandabyggð sendir öllum sem komið hafa að Aðalskipulagi Strandabyggðar 2010 - 2022 á einn eða annan hátt bestu þakkir fyrir.