Sveitarfélagið Strandabyggð auglýsir eftir gömlum húsgögnum og munum sem fást gefins til að nota á neðstu hæðinni í Þróunarsetrinu, Höfðagötu 3. Þessa dagana er verið að tæma hæðina en þar hafa Kaupfélag Steingrímsfjarðar, Héraðsbókasafn Strandasýslu, Héraðssamband Strandamanna, Handverkshópurinn Strandakúnst, sveitarfélagið Strandabyggð auk annarra geymt húsgögn og muni í vetur. Til stendur að gera endurbætur á gólfi, veggjum og lýsingu og setja í stand fjölnota rými sem nýst getur fyrir móttöku sveitarfélagsins Strandabyggðar, fundaraðstöðu, kennslurými fyrir Fræðslumiðstöð Vestfjarða, listasýningar, viðburði og fleira. Í sumar verður handverkshópurinn Strandakúnst með handverk til sölu á neðstu hæðinni.

Sveitarfélagið auglýsir sem fyrr segir eftir gömlum húsgögnum, sófum, borðum, stólum, lömpum og hvaðeina sem ykkur langar til að losa ykkur við. Hlutir sem eru jafnvel drasl í augum einhverra geta verið gersemar í þessu samhengi! Vinsamlegast hafið samband við skrifstofu Strandabyggðar í síma 451 3510 eða sendið tölvupóst á strandabyggd@strandabyggd.is merkt Gamalt dót. Við munum koma til ykkar og skoða hvort við getum nýtt húsgögnin/munina.

Áhaldahús og Vinnuskóli Strandabyggðar hafa stofnað hugmyndatorg og auglýsa núna eftir hugmyndum að verkefnum til að vinna að í Strandabyggð í sumar. Allar hugmyndir eru vel þegnar, fögnum sérstaklega hugmyndum sem kosta lítið en gera mikið! Margt smátt gerir eitt stórt.  

Hugmyndir má senda á: strandabyggd@strandabyggd.is merkt Hugmyndatorg eða skila inn hugmyndum á skrifstofu Strandabyggðar fyrir 20. maí n.k.

Eftir páska hafa nemendur við Grunnskólann á Hólmavík farið með og hjálpað til við vitjun á fiðrildagildrum í Stakkamýri og við Þverárvirkjun. Vitjað er um gildrurnar á hverjum föstudegi frá miðjum apríl til byrjun nóvember. Nemendur munu aðstoða við vitjun gildranna fram að lokum skólans og möguleiki er að halda áfram á nýju skólaári í haust. Nemendurnir fá fræðslu um þau skordýr sem sjást í gildrunum og sérstaklega um lífsferil fiðrilda. Einnig fá þau fræðslu um gróðurlendið sem gildrurnar eru í.

Föstudaginn 6. maí 2011 fór hópur úr 7. bekk ásamt kennara sínum Hrafnhildi Guðbjörnsdóttur til að vitja um gildruna. Í Stakkamýri veiddist eitt fiðrildi og nokkrar flugur en í gildrunni við Þverárvirkjun voru 31 fiðrildi og 36 flugur af mismunandi tegundum. Hópurinn var mjög áhugasamur og fannst gaman að fá að skoða fiðrildi og krækilyngsblóm með stækkunargleri.

 

Fimmtudaginn 5. maí n.k mun framkvæmdarstjóri og starfsmenn Atvest vera á skrifstofu Atvest á Hólmavík í Þróunarsetrinu að Höfðagötu 3 milli kl. 9:00 - 12:00. Við viljum hvetja fyrirtæki og einstaklinga sem vantar handleiðslu og ráðgjöf að hafa samband við Atvest í síma 450 3053 eða senda tölvupóst á netfangið asgerdur@atvest.is .  Atvest bókar tíma á skrifstofu eða starfsmenn fara í heimsókn til viðkomandi.  Einnig er hægt að koma við á skrifstofunni í opinn viðtalstíma.

Sannkallaður tímamótasamningur var gerður milli Strandabyggðar og Héraðssambands Strandamanna á dögunum. Samningurinn er til eins árs og snýst um að tómstundafulltrúi Strandabyggðar, Arnar Snæberg Jónsson, tekur að sér framkvæmdastjórn sambandsins til 1. apríl 2012. Arnar er tómstunda- og félagsmálafræðingur frá Háskóla Íslands, en hann mun sinna starfinu í 10% stöðu á ársgrundvelli ásamt öðrum störfum tómstundafulltrúa. Mörg undanfarin ár hafa framkvæmdastjórar Héraðssambandsins starfað í þrjá mánuði yfir sumarið, oftast í 50% starfi, en nýja samkomulagið gerir sambandinu kleift að efla starfið allt árið. Sérstaklega er litið til þess að efla upplýsingagjöf, kynningu, samskipti og aðstoð við aðildarfélög HSS, UMFÍ og ÍSÍ auk þess sem framkvæmdastjórinn sinnir skipulagningu fyrir mót og kynningu á úrslitum eftir þau.  
...
Meira