Á fundi Atvinnumála- og hafnarnefndar í gær, miðvikudaginn 11. maí 2011, kom m.a. fram að tímabundið starf verður auglýst hjá Atvinnuþróunarfélagi Vestfjarða á Hólmavík næsta haust. Ekki hefur verið tekin ákvörðun hvort um 80 eða 100% stöðu er að ræða. Starfið verður til viðbótar við stöðu verkefnastjóra AtVest sem er með aðstöðu á Hólmavík.

Þá verður haldið námskeið á Hólmavík í haust í nýsköpun, gerð viðskiptaáætlana og stofnun fyrirtækja. Námskeiðið er hugsað fyrir alla þá sem hafa áhuga á að koma hugmyndum í framkvæmd, öðlast nýja þekkingu eða vilja styrkja sig í núverandi rekstri. Námskeiðið er einnig tilvalið fyrir þá sem hafa unnið að hugmyndunum sínum lengi og vilja stíga næsta skref. 

Þá er námskeiðið kjörið tækifæri til að hitta aðra sem hafa áhuga á að skapa sér tækifæri og störf við það sem þeir hafa áhuga á. Fjöldi handverksfólks, bænda, sjávarútvegsfólks og annarra íbúa á öllum aldri á höfuðborgarsvæðinu og landsbyggðinni hafa sótt námskeið sem þessi undanfarin ár með góðum árangri.

10. maí 2011 var tjaldsvæðið á Hólmavík opnað fyrir sumargesti. Á Hólmavík er kjörið að staldra við og njóta lífsins í fallegu umhverfi. Hér er boðið upp á margskonar afþreyingu og þjónustu. Má þar nefna Galdrasafnið, Sauðfjársetrið, golfvöll í Skeljavík, hestaleiguna Strandahesta, hestaferðir Svaðilfara, Sundlaug Hólmavíkur, Ferðaþjónustuna Kirkjubóli, Finna-Hótel, gistiheimilið Steinhúsið, farfuglaheimilið Broddanesi, bændagistingin Snartartungu, veitingastaðinn Café Riis, Hólmakaffi, Kaupfélag Steingrímsfjarðar og margt fleira.

Einnig er tilvalið að heimsækja Hólmavík á leiðinni á Vestfirðina þar sem bærinn er vandlega staðsettur. Héðan liggja leiðir til allra átta! Sveitarfélagið Strandabyggð býður alla ferðalanga velkomna á Strandirnar í sumar og óskar ferðamönnum, ferðaþjónum og Strandamönnum öllum gleðilegs ferðasumars!

Opnað hefur verið fyrir umsóknir um vinnu í vinnuskóla Strandabyggðar. Áætlað er að vinnuskólinn hefjist mánudaginn 6. júní og standi yfir í um 4-6vikur. Unnið verður fyrir hádegi frá kl. 8:30 til kl. 12:00. Vinnuskólinn er ætlaður börnum og unglingum fæddum árin ´95 ´96, ´97 og ´98. Reynt verður að sjá til þess að árgangur '95 fái vinnu í 8 tíma á dag. Umsóknareyðublöð má nálgast hér einnig er umsækjendum beint á að kynna sér reglur vinnuskólans sem má nálgast hér.

 

Umsóknum skal skilað á skrifstofu Strandabyggðar að Höfðagötu 3 í síðasta lagi föstudaginn 20. maí 2011.

Stórskemmtilegir fjáröflunartónleikar félagsmiðstöðvarinnar Ozon og nemendafélags Grunnskólans verða haldnir í Félagsheimilinu á Hólmavík miðvikudaginn 11. maí kl. 19:30. Þar stíga á stokk hljóðfærasnillingar úr Tónskólanum auk frábærra söngvara á öllum aldri. Fjöldi slagara er á efnisskránni og allir ættu að geta fundið eitthvað við sitt hæfi. Sjoppa verður á staðnum. Aðgangseyrir er aðeins kr. 1.000.- fyrir fullorðna, 500 krónur fyrir 6-16 ára og frítt fyrir yngri. Í tilkynningu kemur fram að enginn megi missa af þessari frábæru skemmtun sem styðji við félagslíf allra krakka í Grunnskólanum á Hólmavík.

Á samráðsfundi á Ísafirði 3. maí s.l. um þau 16 verkefni sem snúa að eflingu byggðar á Vestfjörðum sem ríkisstjórnin tilkynnti um í byrjun apríl og ber að fagna, lýstu forsvarsmenn Strandabyggðar, Ingibjörg Valgeirsdóttir sveitarstjóri og Jón Jónsson varaoddviti, yfir gríðarlegum vonbrigðum með það framlag sem áætlað er til sveitarfélaga á Ströndum. Inn í þeim 16 tillögum sem voru lagðar fram voru framkvæmdir á Strandavegi í Steingrímsfirði þar sem klára á síðasta ómalbikaða kaflann milli þéttbýlisstaða á Vestfjörðum, Drangsness og Hólmavíkur, eina verkefnið sem tilheyrir þessu svæði. Unnið hefur verið að þessari framkvæmd lengi og því kom verulega á óvart að hún skyldi talin fram á listanum umtalaða yfir verkefnin 16. Sameiginleg verkefni sem nýtast öllu svæðinu snúa að lækkun húshitunarkostnaðar, lækkun flutningskostnaðar og öryggi í raforkumálum.    

Í kjölfar fundarins með ríkisstjórninni 5. apríl s.l. sendi sveitarfélagið Strandabyggð innaríkisráðherra, hr. Ögmundi Jónassyni, og vegamálastjóra, Magnúsi Valssyni, áskorun um að hluti af 350 milljóna króna fjármagni sem lagt var fram 5. apríl 2011 til umbóta í vegamálum færi í brýnar vegaframkvæmdir í sveitarfélögum á Ströndum, Veiðileysuháls í Árneshreppi, Bjarnarfjarðarháls í Kaldrananeshreppi og veginn í Bitrufirði í Strandabyggð. Sveitarfélagið Árneshreppur gerði slíkt hið sama. Á fundinum á Ísafirði 3. maí kom hinsvegar í ljós að ekki krónu af þessum 350 milljónum var úthlutað í vegi á Ströndum. 

Á fundinum lögðu forsvarsmenn Strandabyggðar fram viðbótartillögu við lið nr. 2 sem snýr að undirbúningi að stofnun framhaldsdeildar í Strandabyggð sem nýst geti sveitarfélögum á Ströndum, Reykhólahreppi og jafnvel víðar. Tillagan fékk stuðning forsvarsmanna annarra sveitarfélaga á Vestfjörðum og Fjórðungssambands Vestfirðinga, sjá meðfylgjandi frétt sem birtist á vef www.bb.is 6. maí 2011:  

Stjórn Fjórðungssambands Vestfirðinga áréttar að undirbúningur verkefna sem samþykkt voru á fundi ríkisstjórnar þann 5. apríl á Ísafirði fór fram án formlegs samráðs við forsvarsmenn sveitarfélaga eða stofnana þeirra. „Verkefnin í heild munu hafa jákvæð áhrif fyrir samfélög og atvinnulíf á Vestfjörðum en gera verður alvarlegar athugasemdir varðandi misskiptingu þeirra gagnvart einstökum svæðum innan Vestfjarða," segir í ályktun. Stjórn Fjórðungssambands Vestfirðinga skorar því á ríkisstjórn Íslands að auka við fjárveitingu til verkefnatillögu nr. 2 sem felur í sér að tryggt verði áframhaldandi gott framboð á námi á framhaldsskólastigi á Vestfjörðum.

Gerð er sú krafa að sett verði aukið fjármagn til þessa verkefnis eða sem nemur 10 milljónum króna. Verði þeim fjármunum ráðstafað til sveitarfélagsins Strandabyggðar til að hefja undirbúning að stofnun framhaldsdeildar á Hólmavík, sem nýtast muni Strandabyggð sem og nágrannasveitarfélögum í Strandasýslu, í Reykhólahreppi og hugsanlega víðar.

Ríkisstjórnin samþykkti á fundi á Ísafirði fyrir mánuði sextán verkefni sem snúa að eflingu byggðar og atvinnusköpunar á Vestfjörðum. Kostnaður við verkefnin er metinn um 5,4 milljarðar króna en þau varða m.a. menntun, velferð og umhverfismál. Af heildarkostnaði verkefnanna er tæpur 1,5 milljarður króna nýtt fjármagn og munar þar mestu um tvö verkefni við snjóflóðavarnir eða tæpan milljarð og fjármagn til nýrra vegaframkvæmda að andvirði 350 milljónir króna.