Sveitarstjórnarfólk úr Dalabyggð kom í heimsókn í Strandabyggð í dag og átti góðan fund með sveitarstjórnarfólki hér. Tilgangurinn var fyrst og fremst að kynnast, fara yfir stöðu og sóknarfæri sveitarfélaganna og skoða möguleika á samstarfi. Nýr vegur yfir Arnkötludal hefur gert samstarf Strandamanna við Dalabyggð og Reykhólahrepp mögulegt á heilsársvísu og fjölmörg tækifæri felast í þessari mikilvægu samgöngubót. Má í því samhengi nefna nýlega stofnun sameiginlegrar félagsþjónustu Stranda og Reykhólahrepps og ráðningu sameiginlegs félagsmálastjóra á svæðinu.

Á fundinum var rætt um flest það sem snýr að sveitarfélögunum; íbúaþróun, atvinnumál, menntamál, húsnæðismál, ferðaþjónustu, gatnagerð, snjómokstur, löggæslu, refaveiðar og sorphirðu svo eitthvað sé nefnt. Tilefni heimsóknarinnar er sprottið úr íbúaþingi í Dalabyggð þar sem fram kom eindreginn vilji íbúa um að efla samstarf við Strandamenn. Sveitarstjórnarfólk í Strandabyggð fagnar þeim tækifærum sem í því felst og hlakkar til áframhaldandi hugmyndavinnu.

Á myndinni frá vinstri: Ingibjörg Valgeirsdóttir sveitarstjóri Strandabyggðar, Ingveldur Guðmundsdóttir formaður byggðarráðs Dalabyggðar, Sveinn Pálsson sveitarstjóri Dalabyggðar, Katla Kjartansdóttir, sveitarstjórn Strandabyggðar, Jón Jónsson varaoddviti Strandabyggðar, Jón Gísli Jónsson oddviti Strandabyggðar og Halla Steinólfsdóttir oddviti Dalabyggðar.

Starfshópur hefur lokið við úttekt á viðhaldsþörf á öllu íbúðarhúsnæði í eigu sveitarfélagsins Strandabyggðar. Stefnt er að því að hefja viðhald á flestum íbúðunum núna í febrúar og mars og hafa starfsmenn áhaldahúss þegar byrjað á þeirri vinnu. Ljóst er að þörf á viðhaldi er mismikil, margt verður hægt að vinna fljótt og vel meðan annað krefst lengri tíma og stærri aðgerða. Er það von okkar að viðhaldsvinnan valdi íbúum sem minnstri truflun.

Sólveig Dagmar Þórisdóttir, menningarmiðlari, grafískur hönnuður og ökuleiðsögumaður, er nýr gestur í Skelinni, lista- og fræðimannadvöl Þjóðfræðistofu. Hún býður ferðaþjónustuaðilum á Ströndum og nærsveitum upp á námskeiðið ,,Mennta- og menningartengd ferðaþjónusta á Ströndum og Vestfjörðum" í tengslum við uppbyggingu ferðaþjónustu á svæðinu.

Sólveig mun leiða hugmyndavinnu á námskeiðinu með aðaláherslu á vetrartímann. Á meðan dvöl hennar stendur, 8. - 19. febrúar, mun hún einnig veita einstaklingsráðgjöf til ferðaþjónstuaðila og hægt verður að panta hjá henni viðtalstíma í Skelinni í síma 8630360.

Námskeiðið fer fram fimmtudaginn 17. febrúar, kl. 20 í Grunnskólanum á Hólmavík, Skólabraut 20-22. Námskeiðið er gestum að kostnaðarlausu.

Sveitarfélagið Strandabyggð styrkir Skelina, lista- og fræðimannadvöl Þjóðfræðistofu.

Á vef Fiskistofu (sjá hér) kemur fram að síðasti dagur til að sækja um byggðakvóta til fiskiskipa í Strandabyggð er á morgun, þriðjudaginn 15. febrúar 2011.

Fiskistofa auglýsir eftir umsóknum um byggðakvóta til fiskiskipa fyrir Strandabyggð samkvæmt ákvæðum reglugerðar nr. 999/2010 um úthlutun byggðakvóta til fiskiskipa á fiskveiðiárinu 2010/2011. Auk reglugerðarinnar er vísað til sérstakra úthlutunarreglna í Strandabyggð sbr. auglýsingu nr. 68/2011 í Stjórnartíðindum.

Umsóknum skal skilað til Fiskistofu á eyðublaði sem er að finna á heimasíðu hennar. Umsóknarfrestur er sem fyrr segir til og með 15. febrúar 2011.

Stjórn Héraðsnefndar Strandasýslu kom saman eftir langt hlé þann 27. janúar s.l. og fór yfir stöðu og verkefni Héraðsnefndar. Meðal verkefna sem heyra undir Héraðsnefnd Strandasýslu eru barnaverndarnefnd, almannavarnarnefnd, Byggðasafnið á Reykjum, Héraðsbókasafn Strandasýslu auk styrktarsjóða og sarfshópa.

Stjórn Héraðsnefndar mun ásamt sveitarstjórnum sveitarfélaganna fjögurra á Ströndum og sveitarstjóra Strandabyggðar funda með stjórn og safnstjóra Byggðasafnsins á Reykjum 2. mars n.k. Til umfjöllunar verður staða og framtíðarsýn safnsins. Fundurinn er liður í stefnumótunarvinnu fyrir Héraðsnefnd Strandasýslu en þessar vikurnar er stjórnin að skoða hvort starfsemi Héraðsnefndar verði efld til muna eða hvort verkefnin verða færð til sveitarfélaganna og Héraðsnefnd lögð niður í núverandi mynd.

Í stjórn Héraðsnefndar Strandasýslu eru nú Jenný Jensdóttir framkvæmdastjóri nefndarinnar og oddviti Kaldrananeshrepps, Jón Gísli Jónsson oddviti Strandabyggðar, Jón Jónsson varaoddviti Strandabyggðar, Oddný Þórðardóttir oddviti Árneshrepps og Sigurður Kjartansson oddviti Bæjarhrepps. Næsti fundur Héraðsnefndar verður haldinn 7. mars n.k.