Sveitarfélagið Strandabyggð hefur sent Jóni Bjarnasyni, sjávarútvegs- og landbúnaðarráðherra, bréf þar sem tekið er undir áskorun hagsmunaaðila í Steingrímsfirði um að bætt verði við ýsukvótann og liðkað fyrir framsali hið fyrsta.

Við Steingrímsfjörð starfa ríflega 20 útgerðir, tvö fyrirtæki í vinnslu á bolfiski og Fiskmarkaður. Um er að ræða útgerðir og fyrirtæki sem hafa á sínum snærum 1 - 10 launþega. Á landsmælikvarða má telja þetta tiltölulega lítil umsvif en sú staðreynd að ekki er hægt að róa vegna skorts á ýsukvóta er samfélögunum við Steingrímsfjörð þungbær.

Í bréfi frá hagsmunaaðilum kemur fram að mikil ýsugengd hafi verið í Húnaflóa undanfarin ár, nokkuð sem ekki þekktist á viðmiðunarárum kvótans.

Félagsmálastjóri Stranda og Reykhólahrepps, Hildur Jakobína Gísladóttir, er með opnunartíma fyrir íbúa Árneshrepps, Kaldrananeshrepps, Strandabyggðar og Reykhólahrepps sem hér segir:

Hólmavík: Skrifstofa félagsmálastjóra, 2. hæð Þróunarsetrinu, Höfðagötu 3
Mánudagar: 9:30 - 15:00
Miðvikudagar 9:30 - 15:00
Fimmtudagar 9:30 - 12:00

Reykhólar: Skrifstofa sveitarfélagsins, Maríutröð 5
Þriðjudagar: 10:00 - 15:00

Viðvera félagsmálastjóra í Kaldrananeshreppi og Árneshreppi verður auglýst sérstaklega. Allir íbúar sveitarfélaganna fjögurra geta nýtt sér opnunartíma félagsmálastjóra á Hólmavík og Reykhólum. 

Einnig er hægt að ná í félagsmálastjóra á opnunartíma í síma 451 - 3510 og í síma 842-2511.

Nemendum í 1.-4. bekk er boðið í Félagsmiðstöð unga fólksins í setustofu Grunnskólans á Hólmavík í kvöld, miðvikudagskvöldið 9. febrúar, kl. 18:30-19:30. Foreldrar eru hvattir til að mæta með börnum sínum. Félagsmiðstöð unga fólksins er hefðbundin opnun á félagsmiðstöðinni Ozon, fyrir aldurshóp sem ekki hefur tekið þátt í starfi Ozon áður.

Arnar S. Jónsson, tómstundafulltrúi Strandabyggðar, segir hugmyndina bakvið opnunina vera að gefa yngstu börnunum tækifæri til að láta ljós sitt skína, kynnast félagsmiðstöðvarstarfinu lítillega og gera sér glaðan dag ásamt foreldrum sínum. Farið verður í leiki, sungið og sprellað og horft á teiknimyndir. Aðgangseyrir er enginn en Ozon-sjoppan verður opin.

Frekari upplýsingar um starf í félagsmiðstöðinni Ozon má sjá á heimasíðu Ozon.

Fundur 1177 verður haldinn í sveitarstjórn Strandabyggðar í dag. Fundurinn hefst kl. 18:15 á skrifstofu sveitarfélagsins á annari hæð í Þróunarsetrinu að Höfðagötu 3. Dagskrá fundarins má sjá hér.

Næsti sveitarstjórnarfundur í Strandabyggð verður haldinn þriðjudaginn 1. mars n.k. Frestur til að skila inn erindum fyrir þann fund rennur út á miðnætti 23. febrúar.

Dagur leikskólans er í dag, sunnudaginn 6. febrúar. Leikskólinn Lækjarbrekka hélt upp á daginn s.l. föstudag með því að bjóða foreldrum og forráðamönnum í heimsókn í leikskólann. Nemendur, foreldrar, forráðamenn og starfsfólk áttu notalega morgunstund og bauð leikskólinn gestum upp á hollan og góðan morgunmat. Það er til fyrirmyndar að finna hvað foreldrar og forráðamenn í Strandabyggð eru áhugasamir um þáttöku í lífi og starfi nemenda og starfsfólks í leikskólanum Lækjarbrekku, en skemmst er að minnast fjölmenns piparkökumorguns sem haldinn var á Café Riis í desember. Í tilefni af Degi leikskólans hafa nemendur sett upp sýningu í Kaupfélagi Steingrímsfjarðar á Hólmavík og eru allir hvattir til að leggja leið sína þangað og upplifa listsköpun yngstu íbúanna á Ströndum. Strandamönnum er óskað til hamingju með dag leikskólans.

Hægt er að fylgjast með fréttum af leikskólanum Lækjarbrekku á vefsíðu skólans, sjá hér.