Leikskólinn Lækjarbrekka á Hólmavík auglýsir starf matráðs laust til umsóknar. Staðan losnar 15. desember n.k. Leikskólinn Lækjarbrekka er einsetinn tveggja deilda leikskóli og þar dvelja börn frá 1 árs aldri. Um 30 börn eru á báðum deildum. Einkunnarorð skólans eru:

Gleði  -  Virðing  -  Vinátta

Áhugi á börnum og samskiptum við þau er nauðsynlegur ásamt skipulögðum vinnubrögðum og samstarfshæfni.

Nánari upplýsingar um leikskólann Lækjarbrekku er að finna á www.strandabyggd.is og www.123.is/laekjarbrekka

Umsóknir ásamt ferilskrá og meðmælendum berist til skrifstofu Strandabyggðar, Hafnarbraut 19, 510 Hólmavík. Umsóknarfrestur rennur út á hádegi föstudaginn 19. nóvember n.k. Nánari upplýsingar veitir skrifstofa Strandabyggðar í síma 451-3510. Einnig er hægt að senda póst í netfangið holmavik@holmavik.is

Auglýsing sem dreift var á föstudag og mánudag um námskeið hjá Fræðslumiðstöð Vestfjarða innihélt rangar upplýsingar. Námskeið um meðhöndlun lambaskrokka sem þar er auglýst verður haldið í BARMAHLÍÐ Á REYKHÓLUM miðvikudaginn 17. nóvember kl 18. Þátttakendur koma sjálfir með kjötskrokk og verðið er 11.900.- krónur. Enn eru laus eitt til tvö pláss á námskeiðinu. Hægt er að hafa samband við Kristínu í síma 8673164 til að skrá sig eða Ingvar Samúelsson á Reykhólum.

Beðist er velvirðingar á þessum leiðu mistökum í auglýsingunni.

Nemendur Finnbogastaðaskóla í Árneshreppi komu í heimsókn á skrifstofu Strandabyggðar á dögunum til að kynna sér starfsemi sveitarfélagsins. Þeim fannst m.a. mjög áhugavert að fylgjast með hvernig matarumbúðir eru þvegnar og flokkaðar í viðeigandi kassa og fræddust um endurvinnslu sorps. Nemendurnir lögðu einnig fram  tillögur sínar um hvernig megi gera umbætur á tjaldsvæðinu á Hólmavík. Í Finnbogastaðaskóla eru fjórir nemendur á aldrinum 6 - 13 ára og eru þeir duglegir að rækta tengsl við nágrannasveitarfélögin. Í haust hafa þeir heimsótt nemendur bæði í Grunn- og Tónskólanum á Hólmavík og nemendur í Grunnskólanum á Drangsnesi. Á Hólmavík sáu þeir leiksýninguna Prumpuhóllinn og á Drangsnesi tóku þeir þátt í skemmtikvöldi nemenda. Nemendur Finnbogastaðaskóla halda úti vefsíðunni:  www.strandakrakkar.blog.is  Sveitarfélagið Strandabyggð hlakkar til áframhaldandi samstarfs við þennan öfluga skóla.   

Öflugra samstarf stendur nú fyrir dyrum milli sveitarfélaganna Strandabyggðar, Árneshrepps, Kaldrananeshrepps og Reykhólahrepps. Sveitarfélögin hafa samþykkt að stofna sameiginlega félagsmálanefnd og stofna formlega félagsþjónustu. Í nýju nefndinni verða fimm fulltrúar, tveir fulltrúar frá Strandabyggð og einn fulltrúi frá hinum sveitarfélögunum. Undirbúningshópur vinnur nú að samningi um félagsmálanefndina og skilgreinir starfslýsingu, starfshlutfall og menntunarkröfur fyrir starf félagsmálastjóra en sú staða verður auglýst von bráðar. 

Á námskeiðinu er fjallað um hvernig sápa verður til og hvað þarf af efnum og áhöldum við gerð sápu í föstu formi. Algeng aðferð verður kennd en fleiri nefndar. Farið er yfir nokkrar glærur og að því loknu er sýnikennsla. Allir eiga að geta búið til sápu eftir eigin uppskriftum að loknu námskeiðinu.

Námskeiðið verður haldið á Hólmavík fimmtudaginn 18.nóvember og stendur frá kl 19:30-22:00. Námskeiðsgjald er kr 6900 á hvern þátttakanda og er efnisgjald innifalið. Einnig verður hægt að kaupa efni á staðnum til að prófa sig áfram heima. Skráning er á frmst.is eða kristin@frmst.is (sími 8673164) og stendur skráningin til 15. Nóvember.

Sjá nánar um sápur á sapan.is.