Það var líf og fjör á skrifstofu Strandabyggðar í morgun þegar nemendur í 5. og 6. bekk Grunnskólans á Hólmavík mættu þangað með umsjónarkennara sínum Kolbeini Skagfjörð Jósteinssyni. Erindið var að afhenda undirskriftalista þar sem nemendur við skólann fóru fram á að körfuboltavöllur á skólalóðinni verði lagfærður hið fyrsta þannig að nemendur geti stundað þá göfugu íþrótt í frítíma sínum. Ingibjörg Valgeirsdóttir sveitarstjóri tók við undirskriftalistanum að viðstöddum oddvita og varaoddvita og verður málið rætt á næsta sveitarstjórnarfundi.

Þriðjudaginn 19. október mun Guðjón Ólafsson, sérkennslufræðingur og fræðslustjóri Austur-Húnvetninga, fjalla um einelti og mikilvægi uppbyggilegra samskipta á opnum fræðslufundi í Félagsheimilinu á Hólmavík. Strandabyggð stendur fyrir fundinum sem hefst klukkan 18:00. Frábært tækifæri til að byggja upp enn betra og blómlegra samfélag - mætum öll!

Sveitarstjórn Strandabyggðar hefur ákveðið að leita eftir ábendingum og tillögum frá íbúum um hvernig bæta megi aðstöðu við tjaldsvæðið á Hólmavík. Svæðið sem er á skjólsælum stað, rétt við sundlaugina og félagsheimilið á Hólmavík, er afar vinsælt og sló aðsókn að því öll met síðastliðið sumar. Fjöldi gesta hafði þá viðdvöl og var svæðið fullsetið allmarga daga og voru tjöld, vagnar og húsbílar einnig á íþróttavelli innan við svæðið og á grasbala neðan við félagsheimilið. Íbúar eru hvattir til að senda hugmyndir um úrbætur, aðstöðu og afþreyingu, jafnt stórar og smáar, á netfangið holmavik@holmavik.is, merktar "Tjaldsvæði" í síðasta lagi föstudaginn 8. október eða skila þeim á skrifstofu Strandabyggðar að Hafnarbraut 19, 510 Hólmavík. Frumlegar hugmyndir sem skapað gætu tjaldsvæðinu samkeppnisforskot umfram önnur slík eru sérlega vel þegnar.

Í nýafstöðnu kvótaári 2009-2010 voru aflabrögð báta sem réru með landbeitta línu frá Hólmavík eftirfarandi:

Hlökk ST 66                        landaði 473.351 kg í 111 veiðiferðum.
Guðmundur Jóns ST 17       landaði 149.586 kg í 37 veiðiferðum.
Hafbjörg ST 77                   landaði  77.625 kg í 29 veiðiferðum.
Hilmir ST 1                         landaði  69.049 kg í 24 veiðiferðum.
Kópnes ST 64                     landaði 66.393 kg í 25 veiðiferðum.
Straumur ST 65                 landaði 62.842 kg í 44 veiðiferðum.

og að auki réru eftirfarandi bátar með handfæri:

Hafbjörg ST 77                   landaði 22.354 kg í  8 veiðiferðum.
Hilmir ST 1                         landaði 13.506 kg í 21 veiðiferð.
Kópnes ST 64                     landaði 10.717 kg í 11 veiðiferðum.
Ólafur Jóhanns ST 45        landaði   5.423 kg í 15 veiðiferðum.
Ólafur ST 52                      landaði  15.198 kg í 24 veiðiferðum.
Rut ST 50                          landaði    8.192 kg í 24 veiðiferðum.

Sigurður Þorvaldsson

Laus er til umsóknar staða fulltrúa á skrifstofu Strandabyggðar. Um er að ræða 50% starf og möguleiki er á sveigjanlegum vinnutíma. Starfið snýst að mestu um almenn skrifstofustörf, bréfaskriftir og textagerð. Starfsmaður ber einnig ábyrgð á fjárhagsupplýsingum eða fjármunum, sér um greiðslu og innheimtu reikninga, sinnir bókhaldi og launafærslum.

Hæfniskröfur:

Hæfni í mannlegum samskiptum

Rík þjónustulund, kurteisi og glaðlegt viðmót

Frumkvæði, skipulagshæfni og sjálfstæð vinnubrögð

Almenn tölvukunnátta

Reynsla af bókhalds- og skrifstofustörfum æskileg

 
Æskilegt er að starfsmaður geti hafið störf sem fyrst og er umsóknarfrestur til og með 13. september nk. Umsækjendum er bent á að vanda umsóknir. Þar þurfa að koma fram allar grunnupplýsingar um umsækjanda, starfsferill, menntun og meðmælendur.

Umsóknum skal skilað til:
Skrifstofu Strandabyggðar
Hafnarbraut 19
510 Hólmavík

Frekari upplýsingar um starfið veitir Salbjörg Engilbertsdóttir, sími: 451 3510 og netfang: holmavik@holmavik.is.