Mánudag 17. nóvember er starfsdagur kennara. Nemendur mæta ekki í skólann þann dag.

Nemenda og foreldraviðtöl hafa verið tímasett þriðjudag 18. nóvember. Munið að skrá stöðumat fyrir miðnætti 16. nóvember.

Vikuna 17.- 23. nóvember mun Hólmavík breytast í Bókavík en þá verður haldin Bókmennta-og ljóðavika í Strandabyggð. Vikan er hugmynd nokkurra unglinga og vann til verðlauna í hugmyndasamkeppni Landsbyggðarvina vorið 2014.

Í tilefni af því hafa nemendur og starfsfólk Grunnskólans hafið hvern dag í nóvember með 10 mínútna yndislestri. Að auki er tvenns konar lestrarátak í gangi annars vegar alllirlesa.is sem eldri nemendur taka virkan þátt í og hins vegar lestrarátak Ævars vísindamanns þar sem yngri nemendur lesa af miklu kappi.

Við í skólanum viljum að sjálfsögðu hvetja ykkur öll til að lesa sem mest og bendum á að bókasafnið er opið öllum kl. 19:30 - 20:30 dagana 17. -21. nóvember.

Opið hús verður í skólanum miðvikudaginn 19. nóvember klukkan 13:00 - 14:00 en þá ætla nemendur að sýna afrakstur bókmenntavinnu sinnar. Allir eru velkomnir.

Andri Snær Magnason rithöfundur heimsækir skólann að morgni föstudags 21. nóvember.

Margt fleira verður um að vera og við hvetjum ykkur til að kíkja endilega á dagskrána http://www.strandabyggd.is/…/Dagskra_Bokmennta-og_ljodavik…/ Það þarf engum að leiðast þessa vikuna.

Foreldrar barna eru ávallt velkomnir í skólann og til að árétta það verður sérstakt foreldraboð í skólanum þriðjudaginn 28. október í fyrstu tveimur kennslustundum barnanna klukkan 08:30 - 9:50. Að því loknu eru frímínútur 9:50 - 10:20 og þá er hægt að fá sér hafragraut í glasi (eða kaffi), fara út og prófa aparóluna, fara í fótbolta á sparkvellinum eða spjalla við kennara og annað starfsfólk. 

 

Athugið að það er velkomið að vera með alveg frá byrjun og til enda en það er líka hægt að mæta seinna og það er frjálst að fara á milli bekkja og tíma. Sumir eiga fleiri en eitt barn.

 

Eftirtaldar kennslustundir eru á stundaskránni:

10. bekkur - Danska/ Listir

8. og 9. bekkur - Danska/ Íslenska

7. bekkur - Lesstund/Stærðfræði

6. bekkur - Röklist/Stærðfræði

5. bekkur - Lesstund/ Stærðfræði

3. - 4. bekkur - Íslenska

1. - 2. bekkur - Íslenska

 

Við hlökkum til að sjá ykkur í skólanum!

 

 

MND félagið á Íslandi hefur með stuðningi Velferðar-, Umhverfis- og auðlindaráðuneytis hrint af stað verkefninu Aðgengi að lífinu sem er ætlað 10. bekkingum á landsvísu.

Verkefnið er liðakeppni sem felur í sér könnun á aðgengismálum hreyfihamlaðra í nærumhverfi ungmennanna.

Tilgangur verkefnisins er eftirfarandi:

1. Að efla skilning ungmenna á aðstæðum hreyfihamlaðra

2. Að stuðla að bættu aðgengi hreyfihamlaðra með lausnum ungs fólks

3. Að skapa jafnréttisgrundvöll á milli hreyfihamlaðra og óhreyfihamlaðra

Tilgangur verkefnisins er að vekja ungmenni til umhugsunar um hindranir í umhverfi sínu og að þau verði eins konar sendiherrar aðgengis í framtíðinni.

Guðjón Sigurðsson formaður MND félagsins og Arnar Helgi Lárusson formaður Samtaka endurhæfðra mænuskaddaðra og atvinnumaður í hjólastólaakstri heimsóttu Grunnskólann á Hólmavík 7. október sl. og kynntu verkefnið og aðstæður hreyfihamlaðra.

Verkefnið fór þannig fram að hópnum var afhentur hjólastóll í 1 sólarhring til þess að greina hindranir í nærumhverfi sínu, t.d. að komast í tómstundastarf, fara í verslanir, komast á bókasafn og svo framvegis.

Í lok nóvember verða veitt vegleg verðlaun fyrir bestu lausnirnar og bestu samantektina auk þess sem verkefnin í 2. og 3. sæti fá verðlaun.

Hér má sjá skilaverkefni nemenda okkar í 10. bekk: 

https://www.youtube.com/watch?v=_EpbuRC94B8&list=UUUXxz5O0-nEgRu9EDvWpq2A

Því miður lítur út fyrir að boðað verkfall tónlistarkennara hefjist á morgun 22. október. Það þýðir að engin kennsla verður í Tónskólanum á meðan á því stendur en vonandi nást samningar fyrr en varir.

Grunnskólinn á Hólmavík hefur fengið eftirfarandi bréf vegna gosmengunar og loftgæða. Kynnið ykkur endilega þær slóðir sem bent er á í leiðbeiningunum.

Leiðbeiningar fyrir leik- og grunnskóla

 

Almannavarnir, Umhverfisstofnun, Samband íslenskra sveitarfélaga og Sóttvarnalæknir hafa fengið nokkuð af fyrirspurnum frá leik- og grunnskólum um hvar upplýsingar megi finna varðandi gosmengunina. Almannavarnir gefa út tilkynningar þegar háir mengunartoppar ganga yfir og nauðsynlegt er að fólk haldi sig inni og loki gluggum. Athugið að mengunartoppar ganga jafnan hratt fyrir. Það breytir ekki því að gosmengun getur legið í loftinu í lægri styrk og við höfum því hvatt fólk til að treysta á eigin skynfæri og skynsemi. Ef fullorðnir finna fyrir einkennum og óþægindum og líður betur inni gildir það sama um börnin. Engin ástæða er til að ætla að SO₂ mengun sé hættilegri börnum en fullorðnum, að mati Sóttvarnalæknis.       

Á heimasíðum Umhverfisstofnunar og embættis Landlæknis er sérstakur borði merktur gosmenguninni og þar má nálgast allar almennar upplýsingar. Þar er til dæmis gagnlegt að skoða töfluna sem sýnir rétt viðbrögð við SO₂ mengun. Hún útlistar viðbrögð eftir styrk mengunar og eftir því hvort um heilbrigt fólk sé að ræða eða fólk sem er viðkvæmt. SO₂ taflan er aðgengileg hér: http://www.ust.is/einstaklingar/loftgaedi/so2/

Daglegar spár um dreifingu mengunarinnar og loftgæðin má nálgast á vef Veðurstofunnará slóðinni http://www.vedur.is/vedur/spar/textaspar/oskufok/ og styrkur mengunarinnar er mældur og miðlað á vefsíðunni www.loftgæði.is. Þar má sjá punkta og þegar smellt er á þá má sjá mælingu mengunarinnar á þessum stöðum. Ekki eru allir mælar á landinu nettengdir með þessum hætti en virkni þeirra tryggir að viðvaranir eru gefnar út þegar mengunartoppar ganga yfir. Fjölmiðlar gegna veigumiklu hlutverki við miðlum upplýsinga til almennings og því er nauðsynlegt að fylgjast grannt með þeim og fylgja leiðbeiningum almannavarna sem þar koma fram.

 

Reykjavík, október 2014.

Almannavarnadeild ríkislögreglustjóra

Umhverfisstofnun

Samband íslenskra sveitarfélaga

Sóttvarnalæknir

Minnum á viðtalstíma fræðslustjóra Guðjóns Ólafssonar, 16. október, klukkan 13:00 - 14:00 eins og fram kemur í áður útsendu bréfi til foreldra.

Kæru foreldrar

Aðalfundur foreldrafélags grunnskólans verður haldinn næstkomandi miðvikudag kl. 17:30 í Hnyðju.

Efni fundarins er :

• Mótun skólastefnu Strandabyggðar
• Skýrsla síðasta starfsárs
• Endurskoðun reikninga
• Kosning bekkjarfulltrúa
• Kosninga nýrra fulltrúa í foreldrafélagið
• Venjuleg aðalfundarstörf

Þeir foreldrar sem áhuga hafa á að vera fulltrúar í foreldrafélaginu eða bekkjarfulltrúar eru vinsamlegast beðnir um að láta núverandi fulltrúa foreldrafélagsins vita fyrir fundinn.

Við hvetjum ykkur til að mæta á fundinn svo að óskir foreldra verði sýnilegar í skólastefnu Strandabyggðar.

Hlökkum til að sjá ykkur!

Barbara Guðbjartsdóttir                   barbara@aknet.is
Guðrún Elínborg Þorvaldsdóttir         gunnaet@simnet.is
Kristjana Eysteinsdóttir                    kristjanaeysteins@simnet.is
Sverrir Guðmundsson                        sverrirgudm@gmail.com
Vignir Már Pálsson                            vp@internet.is

 

Minnum á starfsdaginn 3. október, en þá sækja kennarar haustþing Kennarasambands Norðurlands vestra á Blönduósi, almennir starfsmenn verða að störfum í skólanum en nemendur í fríi.

Verkefnið Göngum í skólann verður að þessu sinni frá miðvikudegi 24. sept. - miðvikudags 1. okt. Verkefninu lýkur með samveru í skógarrjóðri klukkan 13:30 - 14:30 þann 1. okt. Umhverfisnefnd skólans sér um dagskrá sem samanstendur af leikjum og grilluðu brauði. 

Grunnskólinn á Hólmavík tekur þátt í hreyfivikunni Move Week sem er samevrópskt verkefni sem sveitarfélagið Strandabyggð tekur þátt í og nær yfir dagana 29. sept. - 5. okt. Starfsmenn og nemendur skólans ætla að vera með Tíu mínútna morgunleikfimi utandyra klukkan 08:30 þessa viku. Öllum er velkomið að taka þátt í fjörinu!