Á morgun miðvikudag er alþjóðadagur einhverfu. Af því tilefni stendur Styrktarfélag barna um einhverfu fyrir því að fólk klæðist bláu þann dag. Markmiðið er að vekja athygli á málefnum einhverfra einstaklinga. Við hér í skólanum ætlum að taka þátt í þessu verkefni og hvetjum alla til að klæðast bláu á morgun.

Árlega er haldin Stóra upplestrarkeppnin fyrir nemendur í 7. bekk á vegum Radda, samtaka um vandaðan upplestur og framsögn. Eins og segir á heimasíðu samtakanna er markmið upplestrarkeppni í 7. bekk grunnskóla er að vekja athygli og áhuga í skólum á vönduðum upplestri og framburði. Keppnin sjálf er í rauninni aukaatriði og forðast skyldi að einblína á sigur. Mestu skiptir að kennarar nýti þetta tækifæri til að leggja markvissa rækt við einn þátt móðurmálsins með nemendum sínum, vandaðan upplestur og framburð, og fái alla nemendur til að lesa upp, sjálfum sér og öðrum til ánægju. Stefnt skyldi að því að allur upplestur í tengslum við keppnina sé fremur í ætt við hátíð en keppni. Þetta á ekki síst við um lokahátíð keppninnar.

Keppnin fór að þessu sinni fram í sal Reykhólaskóla. Þar kepptu nemendur úr 7. bekk Grunnskólans á Hólmavík, Grunnskólans á Drangsnesi, Reykhólaskóla og Finnbogastaðaskóla. Keppendur lásu fyrst upp valinn texta úr sögunni Ertu Guð, afi? eftir Þorgrím Þráinsson, valin ljóð eftir Erlu (Guðfinnu Þorsteinsdóttur) og að lokum ljóð að eigin vali.
Á milli atriða var boðið upp á atriði frá árshátíðarviku Reykhólaskóla og tónlistaratriði frá Grunnskólanum á Hólmavík þar sem Sólrún Ósk Pálsdóttir nemandi í 8. bekk lék lag Emili Sandé, You can read all about it, í eigin útsetningu.
Í hléi var boðið upp á kjötsúpu og heimabakað brauð.

Dómarar keppninnar, sr. Elína Hrund Kristjánsdóttir, Guðjón Dalkvist Gunnarsson ásamt formanni dómnefndar Baldri Sigurðssyni, voru ekki öfundsverð að því að velja vinningshafa en öll sóðu þau sig með stakri prýði. Fyrstu verðlaun hlaut Kári Ingvarsson nemandi í Finnbogastaðarskóla, önnur verðlaun hlaut Aron Viðar Kristjánsson nemandi í Reykhólaskóla og þriðju verðlaun hlaut Daníel Freyr Newton nemandi í Grunnskólanum á Hólmavík. Verðlaunin voru peningakort að verðmæti 10, 15, og 20 þúsund kr. Sérstök verðlaun fékk Brianna Jewel Johnson.
Að auki fengu allir þátttakendur viðurkenningarskjöl og ljóðabók eftir Erlu (Guðfinnu Þorsteinsdóttur).

Við óskum öllum keppendum til hamingju með árangurinn

Bára Örk Melsted nemandi í 8. bekk vann til verðlauna fyrir ljóðið sitt Biðin en alls voru 9 ljóð send inn frá nemendum í Grunnskólanum á Hólmavík  í ljóðasamkeppni í tengslum við Bókahátíð á Flateyri. Alls bárust tæplega 60 ljóð frá grunnskólum á Vestfjörðum og voru þrjú ljóð verðlaunuð. Verðlaunin eru auk viðurkenningskals er fjölskylduferð á Kayak um Önundarfjörðinn í boði Grænhöfða. Nánar um keppnina.

Við óskum Báru Örk til hamingju með ljóðið og verðlaunin
Hér fyrir neðan er ljóðið sem Bára Örk sendi í keppnina:

Biðin
Biðin er löng.
Já. Biðin er löng.
Við erum alltaf að bíða.
Við erum alltaf að bíða eftir einhverju.
Hverju?
Hverju erum við eiginlega að bíða eftir?
Hverju sem er.
Það er erfitt að bíða.
Mörgum finnst erfitt að bíða.
Þeir brjálast.
Biðin eftir öllu.
Biðin eftir heiminum.
Biðin eftir alheiminum.
Eða er það alheimurinn sem bíður eftir okkur?
Alheimur, hér er ég, ég er tilbúin,
þú þarft ekki að bíða eftir mér.
Ég er hér.
 
Bára Örk Melsted

Forsetahjónin heimsóttu nemendur og starfsfólk Grunn- og Tónskólans í dag. Fulltrúar nemenda þau Sigfús, Eyrún, Sunneva og Róbert Fannar, öll nemendur i 10. bekk, tóku á móti forsetahjónunum og fylgdarliði. Þeim var vísað inn í nýja salinn okkar sem var vígður við þetta tilefni. Forsetinn ávarpaði nemendur og sagði þeim m.a. frá uppvexti sínum á Vestfjörðum og tilefni þess að þau hjónin væru á ferð í Strandabyggð. Íris Björg Guðbjartsdóttir kennari afhenti forsetahjónunum gjöf frá skólanum, geisladiskinn Mjúkar hendur sem inniheldur m.a. lög og texta eftir hana sjálfa.
Forsetinn bauð nemendum að koma með spurningar sem ekki stóð á. Forsetinn svaraði greiðlega spurningum eins og "Hvernig kynnust þið Dorrit?" "Eigið þið kindur?" "Númer hvað notar þú af skóm?" "Hvaða tegund er hundurinn þinn?" "Hvar kaupir þú fötin þín Dorrit?" "Áttu önnur föt?" Forsetahjónin svöruðu öllum spurningum greiðlega og upplýsti Ólafur að Dorrit verslaði gjarnan á útsölum og Dorrit upplýsti nemendur um að Ólafur svæfi gjarnan í jakkafötunum. 
Að loknum skemmtilegum fyrirspurnartíma leiddu fulltrúar nemenda forsetahjónin og fylgdarlið í gegnum skólann og upplýstu þau um starfið og svöruðu spurningum.
Í lokinn þótti við hæfi að taka myndir af forsetahjónunum með þessum flottu fulltrúum nemenda. 

Meðfylgjandi myndir tók Jón Jónsson

Í dag keppti Grunnskólinn á Hólmavík í Skólahreysti. Keppnin var haldin á Akureyri. Það voru þau Eyrún Björt Halldórsdóttir og Kristófer Birnir Guðmundsson sem kepptu í hraðabraut, Ingibjörg Jónsdóttir keppti í hreystigreip og armbeygjum og Jamison Ólafur Johnson keppti í upphífingum og dýfum. Til vara voru Sigfús Snær Jónsson, Trausti Rafn Björnsson og Harpa Dögg Halldórsdóttir.

Liðið stóð sig mjög vel og lauk keppni með 41 stigi og hafnaði í 3. sæti í sínum riðli.
Þjálfari liðsins er Ingibjörg Emilsdóttir.

Til hamingju öll með þenna frábæra árangur!

Þriðju svæðistónleikar Nótunnar 2014 voru haldnir í Hjálmakletti, Menntaskólanum í Borgarnesi í gær, laugardaginn 8. mars. Alls tóku 10 tónlistarskólar frá Vesturlandi, Vestfjörðum og Húnaþingi vestra þátt að þessu sinni og voru atriðin alls 25.

Nótan er uppskeruhátíð tónlistarskólanna og er samstarfsverkefni Félags tónlistarskólakennara, Félags íslenskra hljómlistarmanna og Samtaka tónlistarskólastjóra. 

Sólrún Ósk Pálsdóttir, nemandi í 8. bekk, tók þátt fyrir hönd Grunn - og Tónskólans á Hólmavík. Sólrún Ósk stundar tvöfalt nám við skólann og leikur á þverflautu, píanó og syngur. Hún flutti lag Emili Sandé, You can read all about it, í eigin útsetningu. Sólrún Ósk söng lagið og lék undir eigin söng á flygil. 

Stóð Sólrún Ósk sig með miklum sóma og hlaut á endanum sérstaka viðurkenningu og verðlaunagrip fyrir framúrskarandi atriði.

Við óskum Sólrúnu Ósk til hamingju með frábæran árangur.

Í dag er öskudagur og í tilefni dagsins mættu flestir nemendur og starfsfólk skólans í búningum. Hefðbundin kennsla var í fyrstu tvo tímana en síðan var skóladagurinn brotinn upp með öskudagssprelli. Nemendur tóku þátt í vinnu og leik í fjórum smiðjum:

• Öskudagurinn - hefðir hér á landi og um allan heim
• Saumaðir öskupokar
• Stærðfræðiþrautir og leikir
• Leikir og þrautir til að efla skynjun og athyglisgáfu.
  

Nemendur skemmtu sér vel við leik og vinnu á þessum óhefðbundna skóladegi.
Myndir frá skóladeginum má sjá hér

Í vetur hefur valgreinin Skólahreysti verið í boði fyrir unglingadeildina. Í dag var valið hvaða fjórir keppendur munu keppa fyrir Grunnskólann á Hólmavík miðvikudaginn 12. mars. Það voru þau Eyrún Björt Halldórsdóttir og Kristófer Birnir Guðmundsson í hraðabraut, Ingibjörg Jónsdóttir í hreystigreip og armbeygjum og Jamison Ólafur Johnson í upphífingum og dýfum. Fjölmennt bleikklætt stuðningslið mun mæta á svæðið og hvetja fulltrúa okkar af öllum mætti.
Áfram Grunnskólinn á Hólmavík

Í dag fengu nemendur 9. bekkjar veglega ávaxtakörfu frá Ávaxtabílnum. Bekkurinn var dreginn út í skráningaleik Lífshlaupsins. Við óskum þeim innilega til hamingju með þessi hollu og skemmtilegu verðlaun.