Nú fer skólaárið að hefjast og eru innkaupalistar bekkjanna komnir inn á bekkjavefina. Smellið á bekkinn hér til hægri á síðunni og þá á að birtast tengill inn á innkaupalistann.

Bókasafnsnefnd Héraðsbókasafns Strandasýslu og Grunnskólinn á Hólmavík auglýsa laust til umsóknar 60% starf forstöðumanns/umsjónarmanns Héraðs- og skólabókasafnsins á Hólmavík. Bókasafnið er til húsa í Grunn- og tónskólanum á Hólmavík....
Meira

Í morgun lauk þriggja daga heimsókn nemenda frá Årslev í Danmörku. Komin er hefð fyrir samskiptum á milli skólanna en síðastliðið haust heimsóttu gestgjafarnir, 10. bekkur og nemendur útskrifuðir síðastliðið, sömu nemendur í Årslev. Í vetur hafa þau flest byggt upp ómetanleg vinasambönd með aðstoð tækinnar. Gestgjafarnir buðu upp á skemmtilega dagskrá með ferð í Skagafjörðinn og sprelli hér heima. Gist var á Bakkaflöt í Skagafirði þar sem farið var í litbolta, slappað af í heitum pottum og farið í flúðasiglingu í Vestari Jökulsá. Símon Ingi, sem flutti til Sauðárkróks í vor, bauð hópnum heim til sín í veitingar að lokinni dvöl í Skagafirðinum þaðan sem haldið var til Hólmavíkur. Á Hólmavík heimsóttu Danirnir Galdrasafnið, skoðuðu risa skjaldbökuna og Sauðfjársetrið. Á Sævangi fór hópurinn í ýmsa leiki í anda furðuleikanna. Hefð er fyrir að halda fótboltamót en það voru Danirnir sem sigruðu Íslendingana 2-1. Eftir viðburðarríkan dag var haldin grillveisla í Félagsheimilinu með fjölskyldum íslensku nemendanna. Kvöldinu lauk með sundlaugarpartý og dynjandi tónlist. Síðustu nóttina var gist í skólanum en sögur herma að lítið hafi verið sofið en þeim mun meira spjallað. Í morgun buðu foreldrar öllum hópnum upp á glæsilegan morgunverð í Félagsheimilinu.
Það voru glaðir og ánægðir Danir sem kvöddu Íslendingana á mjög eftirminnilegan hátt en þeir heldu til Reykjavíkur þar sem þeir munu skoða sig um og m.a. skoða Gullfoss og Geysi ásamt því að lauga sig í Bláa Lóninu. 
Aðkoma foreldra er lykillinn að því að svona viðamiklar heimsóknir takist vel og á foreldrahópurinn sem kom að undirbúningi að þessu sinni hrós skilið fyrir dugnað og hjálpsemi.

 

Hólmavík 06. ágúst 2013

 

Nú fer að líða að því að skólinn hefjist eftir sumarleyfi. Fimmtudaginn 22. ágúst verður skólasetning í kirkjunni kl. 10:00. Eftir athöfnina í kirkjunni verður farið í skólann og þar fá nemendur afhentar stundatöflur, innkaupalista og önnur gögn sem tengjast skólanum.

 

Föstudaginn 23. ágúst hefst svo hefðbundinn skóladagur samkvæmt stundatöflu.

 

Kær kveðja, við hlökkum mikið til að sjá ykkur aftur.

Hulda og Inga

Við Grunnskólann á Hólmavík er laust starf skólabílstjóra frá 15. ágúst 2013.
Um er að ræða 100% starfshlutfall.  
Laun eru samkvæmt kjarasamningum á almennum vinnumarkaði. Umsækjendur skulu vera 20 ára eða eldri. Umsækjandi skal hafa aukin ökuréttindi og hafa sótt skyndihjálparnámskeið og önnur þau námskeið sem sérstaklega eru ætluð bifreiðastjórum fólksflutningabíla.

Umsóknarfrestur er til og með 9. ágúst 2013.

Nánari upplýsingar veitir Hulda I. Rafnarsdóttir, skólastjóri í síma 698 0929 og á netfanginu hulda@strandabyggd.is. Skriflegar umsóknir óskast sendar á fyrrgreint netfang eða á skrifstofu sveitarstjórnar í merktu umslagi. Umsóknum skal fylgja staðfesting á ofangreindum réttindum og námskeiði.

Við Grunnskólann á Hólmavík eru eftirtaldar stöður lausar frá 15. ágúst 2013 - 5. júní 2014:

• Skólabílstjóri- 50% starfshlutfall
• Stuðningsfulltrúi - 80% starfshlutfall

Vinnutími stuðningsfulltrúa er alla virka daga frá kl. 8:30-14:30 auk þátttöku í teymis- og starfsmannafundum og sérverkefnum sem tilheyra skólastarfinu. Stuðningsfulltrúi vinnur í teymi með kennurum bekkja, fulltrúa sérkennslu og iðjuþjálfa. Starfsvettvangur stuðningsfulltrúa er inni í bekk og á öðrum starfsstöðum Grunnskólans eða umhverfi hans.
Vinnutími skólabílstjóra er breytilegur.
Laun eru samkvæmt kjarasamningum á almennum vinnumarkaði. Umsækjendur skulu vera 20 ára eða eldri. Umsækjendi um stöðu skólabílstjóra skal hafa aukin ökuréttindi og hafa sótt skyndihjálparnámskeið og önnur þau námskeið sem sérstaklega eru ætluð bifreiðastjórum fólksflutningabíla. Umsóknarfrestur er til 1. júlí 2013.

Nánari upplýsingar veitir Hulda I. Rafnarsdóttir, skólastjóri í síma 698 0929 og á netfanginu hulda@strandabyggd.is. Umsóknir má senda rafrænt á fyrrgreint netfang eða skila á skrifstofu sveitarstjórnar í merktu umslagi.

Grunnskólanum á Hólmavík var slitið við hátíðlega athöfn í kirkjunni í dag. Viðurkenningar voru veittar fyrir góða skólasókn, framfarir, góða ástundun, jákvætt viðmót og fleiri mikilvæga þætti.
Það var Lionsklúbburinn á Hólmavík sem gaf þessar viðurkenningar og kunnum við þeim bestu þakkir fyrir þann hlýhug sem þeir bera til skólans fyrr og nú. Þeir nemendur sem hlutu þessa viðurkenningu voru: 
Díana Jórunn Pálsdóttir 4. bekk, Stefán Snær Ragnarsson 6. bekk,  Elísa Mjöll Sigurðardóttir 9. bekk og Fannar Freyr Snorrason 10. bekk. 
Einnig var veitt viðurkenning fyrir góðan árangur í dönsku. Brynja Karen Daníelsdóttir hlaut danska orðabók í viðurkenningarskyni. Gefandi var danska sendiráðið. Margrét Vera Mánadóttir hlaut viðurkenningu fyrir góðan námsárangur og hæstu meðaleinkunn. Gefandi var Lionsklúbburinn á Hólmavík. 

Nemendur í 10. bekk rifjuðu upp skólagöngu sína við skólann og heiðruðu kennara sína með blómum.
Kristín Lilja Sverrisdóttir nemandi í 9. bekk flutti tónlist fyrir gesti á samt kennaranum sínum honum Jóni Ingimundarsyni.

Við óskum nemendum í 10. bekk velfarnaðar nú þegar þau halda á vit nýrra ævintýra.

Gleðilegt sumar. 

Undanfarna daga hafa nemendur og starfsfólk brotið upp hefðbundna skóladaga með mikilli listsköpun. Hér hefur verið málað, smíðað, saumað, samin tónlist, leikið, dansað, endurunnið og ýmislegt fleira. Afrakstur þessarar miklu vinnu mátti sjá í dag á viðamikilli sýningu á og við skólann. Hér var sett upp miðaldaþrop með þrælum, trölli, víkingum og konungbornu fólki. Við vorum viðstödd brúðkaup, sáum mikinn bardaga, þjóf hnupla og fólk að störfum á markaðstorgi. Gestir tóku þátt í hirðdansi, kepptu í skilmingum og kubbi.
Það er óhætt að segja að sýningin hafi tekist mjög vel og eiga nemendur og starfsfólk mikið hrós skilið fyrir skemmtilega sýningu.
Myndir frá sýningunni

Í kvöld, mánudaginn 27. maí og annaðkvöld, þriðjudaginn 28. maí verða vortónleikar Tónskólans á Hólmavík haldnir í Hólmavíkurkirkju. Þar munu nemendur Tónskólnas koma fram og flytja afrakstur vetrarins. Allir eru hvattir til að koma og hlíða á undurfagra tóna nemenda. Báðir tónleikarnir hefjast kl. 20:00

Sælir kæru foreldrar

Undanfarna daga hafa nemendur Grunnskólans verið að undirbúa vorhátíð sem haldin verður miðvikudaginn 29. maí. Skólinn hefur verið undirlagður af sköpun í hinum ýmsu greinum. Hér hefur verið málað, smíðað, saumað, samin tónlist, leikið, dansað, endurunnið og ýmislegt fleira. Á miðvikudaginn 29. maí verður lokaafurð þessarar vinnu sýnd og hefst sýningin kl. 10.00 og stendur til um kl. 12.30. Nemendur eiga að mæta í skólann kl. 8.10 eins og vanalega. Fjórir hópar sýna atriði á fjórum stöðvum í nágrenni skólans, eitt atriði er sýnt í einu. Nánari tímasetning á atriðunum verður send út eftir genaralprufu sem verður á morgun, þriðjudag. Foreldrar og aðrir gestir eru hvattir til að mæta og taka þátt í sýningunni með okkur. Munið að klæða ykkur og börnin sérstaklega vel, því sumarið er víst ekki alveg komið. Skóli verður fram að hádegi þann dag og fer skólabíllinn heim eftir hádegismat eða uppúr kl. 13.00. Opið verður í Skólaskjóli fyrir þau börn sem þar eiga athvarf eftir hádegi og er þetta jafnframt síðasti dagur sem Skólaskjól er opið þetta skólaárið. Á fimmtudaginn 30. maí er hinn hefðbundni vordagur. Hann hefst einnig klukkan 10.00 og eiga nemendur að mæta kl. 10.00. Þar verður ýmislegt á boðstólnum s.s. spákona, kraftakeppni, pylsur, sápukúlur, krítar og andlitsmálun. Deginum lýkur um kl. 12.30 og þá mun skólabíllinn leggja af stað heim. Á föstudaginn 31. maí eru skólaslit í Hólmavíkurkirkju og hefst athöfnin kl. 12.00. Athöfnin tekur um klukkutíma. Skólaakstur verður þennan dag en miðast við að börnin verði mætt kl. 12 í athöfnina. Skólabíllin leggur af stað heim að athöfn lokinni eða um kl. 13.00.