Í þessari viku þreyta nemendur í 4., 7. og 10. bekk samræmd könnunarpróf. Tilgangur samræmdra könnunarprófa í grunnskólum er m.a. að athuga að hvaða marki námsmarkmiðum aðalnámskrár í viðkomandi námsgrein eða námsþáttum hafi verið náð, vera leiðbeinandi um áherslur í kennslu fyrir einstaka nemendur og veita nemendum, foreldrum og skólum upplýsingar um námsárangur og námsstöðu nemenda. Prófin eru lögð fyrir á sama tíma um land allt. Hér má lesa allt um framkvæmd prófanna. Það er mikilvægt fyrir nemendur að fá góða næringu og góða hvíld fyrir prófin. Við hvetjum foreldra því til að stuðla að því að nemendur fari snemma að sofa og fái sér staðgóðan morgunverð áður en lagt er af stað í próf.

Nú fer að líða að aðalfundi foreldrafélags Grunnskólans á Hólmavík en hann verður haldinn þann 25. september nk. Flest ykkar þekkið til okkar frábæra foreldrafélags sem hefur m.a. það hlutverk að styðja skólastarfið og efla tengsl foreldra, bæði innbyrðis og við skólann og skapa vettvang fyrir samstarf og samstöðu meðal foreldra. Í vetur hafa þau María Mjöll, Jón Eðvald, Viktoría Rán, Sigurrós og Ester skipað stjórnina og staðið sig með miklum sóma.

VILT ÞÚ VERA Í STJÓRN FORELDRAFÉLAGSINS?
Á aðalfundinum verður kosin stjórn foreldrafélagsins sem hefur það hlutverk að móta stefnu og áherslur í starfinu í samráði við foreldra, skólastjórnendur, bekkjarfulltrúa og nemendaráð. Markmið starfsins er að stuðla að vellíðan nemenda og bættum námsárangri með því að auka samskipti foreldra og styrkja skólabraginn. Nú þegar hafa verið unnin drög að dagskrá, viðfangsefnum og áherslum fyrir næsta skólaár. Stjórnin sér til þess að verkefnum sé skipt milli foreldra þannig að sem flestir taki þátt í undirbúningi og framkvæmd a.m.k. eins verkefnis yfir veturinn.
                   
VILT ÞÚ VERA BEKKJARFULLTRÚI Í BEKK BARNSINS ÞÍNS?
Einn mikilvægasti hluti starfs foreldrafélaganna er uppbygging bekkjarstarfsins en það er einn besti samráðs- og samstarfsvettvangur foreldra í uppeldinu. Í þessu starfi gegna bekkjarfulltrúar afar mikilvægu hlutverki. Markmið starfsins er að stuðla að samstarfi og samskiptum nemenda, foreldra og kennara.
- Við leitum nú að foreldrum til að sinna starfi bekkjarfulltrúa fyrir hvern nemendahóp. Bekkjarfulltrúar halda utan um dagskrá sem er ákveðin á sameiginlegum fundi foreldra í bekknum að undangenginni athugun á viðhorfum og óskum barnanna. Bekkjarfulltrúar eru jafnframt tengiliðir bekkjarins við foreldrafélag og foreldraráð skóla.

Áhugasamir foreldrar eru vinsamlega beðnir að hafa samband við Viktoríu Rán í s. 691-4131, viktoria@holmavik.is eða Maríu Mjöll í s. 866-3934, majamjoll@simnet.is fyrir 25. september nk.

Nú eru kosningar til Nemendaráðs 8.-10. bekkjar og Félagsmiðstöðvarráðs 5.-7. bekkjar afstaðnar. Kosningarnar voru leynilegar og fóru fram með formlegum hætti síðasta föstudag í eldri deildinni og í gær og morgun hjá yngri deildinni. Kosningarnar voru æsispennandi á báðum vígstöðvum og draga þurfti í tveimur tilfellum til að skera úr um hverjir tækju sæti í ráðunum.

Hægt er að sjá hverjir skipa ráðin með því að smella hér. Einnig er að finna á síðunni nýjar og ítarlegar reglur Nemendafélags Grunnskólans.

Matseðill skólamötuneytis á Café Riis fyrir septembermánuð er kominn hér inn á síðuna okkar. Það er hægt að nálgast hann með því að smella á kubbinn hér hægra megin á síðunni eða með því að smella á valflokkinn "Hagnýtar upplýsingar" hér vinstra megin. Þar eru alls konar upplýsingar sem ættu að nýtast foreldrum og öðrum aðstandendum sérstaklega vel.

Og svo má að sjálfsögðu líka smella hér til að sjá matseðilinn! 

Malla Rós Valgerðardóttir náms- og starfsráðgjafi hóf störf við Grunnskólann á Hólmavík í haust. Malla Rós sinnir starfi umsjónarkennara í 10. bekk ásamt því að kenna íslensku og samfélagsfræði í nokkrum bekkjum. Hún mun einnig bjóða upp á námsráðgjöf í skólanum og geta nemendur, foreldrar og kennarar leitað til hennar með ýmis mál. Hlutverk námsráðgjafa er m.a. að standa vörð um velferð nemenda og vinna með nemendum, forráðamönnum, kennurum, skólastjórnendum og öðrum starfsmönnum skólans að ýmiss konar velferðarstarfi er snýr að námi, líðan og framtíðaráformum nemenda. Aðstoð námsráðgjafa beinist að því að auka þekkingu nemenda á sjálfum sér, viðhorfum sínum, áhuga og hæfileikum þannig að þeir fái betur notið sín í námi og starfi. 

Allir nemendur og forráðamenn þeirra eiga kost á að snúa sér til Möllu Rósar. Þeir geta komið að eigin frumkvæði og milliliðalaust og pantað viðtal í gengnum síma 451-3129 eða með tölvupósti á netfangið mallaros@strandabyggd.is.

Í vetur stendur nemendum í 8.-10. bekk til boða átta spennandi og fjölbreyttar valgreinar með það að markmiði að dýpka þekkingu og færni í ákveðnum námsgreinum. Nemendur geta valið á milli hestamennsku, fatahönnunar, frönsku, hljómsveitaræfinga, leiklist, þátttöku í nemendaráði, yndislestur og iðnkynningu. 

Hér má lesa nánari upplýsingar um fyrirkomulagið og hverja valgrein fyrir sig.

Smá þjófstart verður tekið á starfsemi Félagsmiðstöðvarinnar Ozon næsta föstudagskvöld, þann 31. ágúst kl. 20:00. Þá ætlar Bergvin Oddsson - Beggi blindi - að kíkja til okkar með fyrirlestur og uppistand. Viðburðurinn er fyrir 7.-10. bekk. Beggi er fyndinn og skemmtilegur náungi sem hefur slegið í gegn með uppistandi sínu.Hann missti sjónina þegar hann var í 9. bekk, en lætur það ekki hamla sér á neinn hátt. Hann hefur skrifað skáldsögur fyrir börn og unglinga og hefur einnig gefið út eigin reynslusöguna "Að heyra barnið sitt vaxa" sem fjallar um hvernig er að annast barnið sitt án þess að sjá það....
Meira

Undanfarna viku er búið að gera miklar breytingar hér á vefnum okkar. Breytingarnar miða að því að gera vefinn notendavænni, einfaldari með hnitmiðaðri texta og auðveldara aðgengi fyrir alla sem vilja nota vefinn á einhvern hátt. Börn, foreldrar og allir aðrir sem tengjast skólasamfélaginu í Strandabyggð eiga að hafa greiðan aðgang að hagnýtum upplýsingum um skólastarfið. Fólk er hvatt til að skoða vefinn vel og rækilega - og við viljum endilega fá ábendingar um hvað betur mætti fara inni á honum sendar í netfangið skolastjorar@holmavik.is. 

Athugið að enn á eftir að uppfæra nokkrar síður - einhvers staðar geta leynst upplýsingar sem eiga við um síðasta skólaár!

Gengið hefur verið frá ráðningu Huldu Ingibjargar Rafnarsdóttur í eins árs tímabundið starf aðstoðarskólastjóra við Grunn- og Tónskólann á Hólmavík. Hulda Ingibjörg er fædd árið 1965 og er útskrifaður grunnskólakennari frá Kennaraháskóla Íslands árið 1995. Þá hefur Hulda lokið diplómanámi í Menningarstjórnun frá Háskólanum á Bifröst og hyggst ljúka meistaragráðu í Menningarstjórnun í vor. Hulda hefur einnig lokið námi í kerfisfræði....
Meira