Aðalfundur Foreldrafélags Grunnskólans á Hólmavík verður haldinn í Hnyðju (Þróunarsetrinu á Hólmavík) í kvöld, þriðjudaginn 25. sept, klukkan 18:00. Auk venjulegra aðalfundarstarfa verður Hulda Ingibjörg Rafnarsdóttir aðstoðarskólastjóri með skemmtilegt erindi þar sem hún leggur þrautir fyrir fullorðna fólkið og kannar hvort foreldrar geti leyst það sem börnin þurfa að finna lausn á. Í lokin verður viðstöddum síðan boðið upp á gómsætar pizzur frá Café Riis.

Heilsuefling í Strandabyggð er nú í fullum gangi. Á laugardaginn er spennandi dagskrá í Íþróttamiðstöðinni, en þá verður Helena Ósk Jónsdóttir með íþróttatíma fyrir börn og unglinga. Eins og undanfarna laugardagsmorgna mæta leikskólabörn 3-6 ára kl. 11:00 og fara í leiki og þrautabraut.

Kl. 12:30 geta krakkar í 1.-6. bekk mætt, en þá verður farið í skólahreystibraut með tímatöku. Helena hefur einmitt þjálfað nemendur í Heiðarskóla í Keflavík í skólahreysti undanfarin ár með frábærum árangri. Kl. 13:40 mætir síðan 7.-10. bekkur og fer í skólahreystibraut, m.a. í upphífingar, dýfur og armbeygjur. Skráning er hjá Ingibjörgu í síma 663-0497.

Kvennakórinn Norðurljós - eini kvennakórinn í Strandabyggð - er að hefja starfsemi sína í vetur. Kórinn hefur verið mjög öflugur undanfarin ár og haldið tónleika víða við góðan orðstír. Í tilkynningu frá kórnum kemur fram að allir þeir sem hafa gaman af tónlist og góðum félagsskap ættu að íhuga að taka þátt í starfi kórsins. Engin inntökupróf og óhætt fyrir óvana og hrædda að prófa. Fyrsta æfing/samvera verður þriðjudaginn 25. september kl. 19.30 í Hólmavíkurkirkju, en þar verða rædd verkefni vetrarins. 

Strandabyggð auglýsir eftir starfsmanni til viðveru á opnum húsum félagsmiðstöðvarinnar Ozon veturinn 2012-2013. Starfsmaðurinn vinnur ásamt forstöðumanni félagsmiðstöðvarinnar á opnum húsum.

Starfsmaðurinn þarf að:
- vera orðinn 20 ára
- hafa góða skipulagshæfileika
- sýna sjálfstæði og frumkvæði
- hafa góða hæfni í mannlegum samskiptum
- hafa ánægju að því að vinna með börnum og unglingum
- hafa hreint sakavottorð

Starfshlutfall er um 7%. Vinnutími er öll þriðjudagskvöld kl. 20:00-22:00 og annað hvert mánudagskvöld kl. 19:30-21:00. Ráðningartímabil er frá 1. október til 31. maí.

Nánari upplýsingar um starfið veitir Arnar Snæberg Jónsson tómstundafulltrúi í s. 894-1941 eða í netfangið tomstundafulltrui@strandabyggd.is. Umsóknum skal skila á skrifstofu Strandabyggðar í síðasta lagi mánudaginn 24. september.

Velferðarnefnd Stranda og Reykhólahrepps hefur samþykkt siðareglur félagsþjónustu Stranda og Reykhólahrepps sem og eineltis-og viðbragðaáætlun fyrir starfsmenn sveitarfélaganna, Árneshrepps, Kaldrananeshrepps, Reykhólahrepps og Strandabyggðar.

Eineltisáætlunin og viðbrögð við einelti á vinnustöðum ofangreindra sveitarfélaga mun verða kynnt starfsmönnum sveitarfélaganna og bæði siðareglurnar og eineltisáætlunin verða birtar á heimasíðu Strandabyggðar innan skamms.