Á sveitarstjórnarfundi sem haldinn var í Strandabyggð í kvöld var samþykkt að neðsta hæðin í Þróunarsetrinu hljóti nafnið Hnyðja. Var nafnið samþykkt með fjórum atkvæðum en alls bárust 117 tillögur í samkeppni um nafn á hæðina og þakkar sveitarfélagið fyrir þessa glæsilegu þátttöku.

Móttaka Strandabyggðar var flutt niður í Hnyðju í dag þar sem íbúar geta nú sótt þjónustu sveitarfélagsins. Vonast er til að truflanir á síma- og netsambandi á morgun verði sem minnstar og er beðist velvirðingar á þeim óþægindum sem þær kunna að valda. Formleg opnun verður haldin föstudaginn 4. maí n.k. og verður hún auglýst nánar síðar.

Vegna flutninga móttöku sveitarfélagsins Strandabyggðar niður á neðstu hæð Þróunarsetursins má búast við truflunum á síma- og netsambandi í dag og á morgun. Er beðist velvirðingar á þeim töfum á þjónustu sem þetta kann að valda.

Alls bárust 117 tillögur í samkeppni um nafn á neðstu hæðina í Þróunarsetrinu sem nú verið að taka í notkun. Sveitarstjórn Strandabyggðar bíður það vandasama verk að velja nafn á hæðina á sveitarstjórnarfundi sem haldinn verður þriðjudaginn 17. apríl 2012. Vinningshafi verður heiðraður sérstaklega á formlegri opnun sem haldin verður fyrir íbúa og verður auglýst nánar síðar. Tillögurnar 117 má sjá hér. Sveitarfélagið Strandabyggð þakkar fyrir þessa glæsilegu þátttöku. Spennandi verður að sjá niðurstöðu sveitarstjórnar.

 

 

Fundur 1195 í sveitarstjórn Strandabyggðar verður haldinn þriðjudaginn 17. apríl 2012 á skrifstofu sveitarfélagsins að Höfðagötu 3, 510 Hólmavík. Fundurinn hefst kl. 16:00 og má sjá dagskrá fundarins hér: http://www.strandabyggd.is/stjornsysla/tilkynningar/skra/367/

Þeir sem voru með myndavélina á lofti snjóaveturinn mikla 1995 ættu að fara að grufla í albúmum og skoða gömlu vídeóspólurnar. Á Hamingjudögum í sumar verður nefnilega sett upp sýning um snjóaveturinn á Hólmavík 1995. Sýningin mun samanstanda af stórum ljósmyndum og vídeóefni, en nú þegar hefur talsvert borist af slíku efni sem er vægast sagt magnað að berja augum.

Þeir sem luma á efni af einhverju tagi geta haft samband við Arnar Snæberg Jónsson tómstundafulltrúa í netfangið tomstundafulltrui@strandabyggd.is eða í síma 894-1941.

Snjóaveturinn 1995 verður lengi í minnum hafður á Hólmavík sem og annars staðar. Þessi vetur var einn sá allra snjóþyngsti í manna minnum. Veðurfar var með ágætum fyrri part vetrar, en um miðjan janúar gerði stórhríð með gríðarlegri ofankomu. Segja má að á einni nóttu hafi allt farið í kaf. Á Hólmavík voru þök húsa nálægt því að sligast undan snjóþunganum og þurftu menn þá að moka svo klukkustundum skipti. Ekki reyndist mögulegt að ferðast um á venjulegum farartækjum fyrstu dagana eftir bylinn og í blaðaviðtölum vildu sumir jafnvel meina að snjóbílar kæmust ekki einu sinni leiðar sinnar. Veturinn 1995 er greyptur í huga flestra íbúa í Strandabyggð þó ekki sé langt um liðið. Fannfergið var með hreinum ólíkindum og ljósmyndir frá þessum tíma eru lyginni líkastar og í raun er ekki hægt að lýsa þeim í orðum. Yfirskrift sýningarinnar er "Allt á kafi".