Eins og öllum er kunnugt er Góugleði haldin í Félagsheimilinu á Hólmavík á morgun. Húsið opnar kl. 19:30 og hefst borðhald kl. 20:15. Enginn posi er á staðnum.

Hlökkum til að sjá ykkur!

Góunefndin

Sveitarstjórnarfundur 1194 í sveitarstjórn Strandabyggðar verður haldinn þriðjudaginn 13. mars 2012. Fundurinn fer fram á skrifstofu sveitarfélagsins að Höfðagötu 3, 510 Hólmavík og hefst kl. 16:00. Dagskrá fundarins má sjá hér.

Nýr og stærri skólabíll hefur verið keyptur fyrir sveitarfélagið Strandabyggð. Með kaupunum er unnt að þjónusta betur íbúa í dreifbýli Strandabyggðar en akstur leikskólabarna var eitt af brýnustu málunum sem kom fram á opnum íbúafundi um áframhaldandi uppbyggingu í dreifbýli á Ströndum.

Bifreiðin sem er af gerðinni Mercedes Benz er fjórhjóladrifin, árgerð 2000 og ekin 120.000 km. Hún tekur 22 farþega auk bílstjóra- og fararstjórasætis en í núverandi bifreið eru 16 farþegasæti auk bílstjóra- og fararstjórasætis. Lagt verður til að þeir nemendur sem búa fjærst leikskólanum á akstursleiðinni suður Strandir munu hafa forgang í skólabílinn.

...
Meira

Menningarráð Vestfjarða auglýsir nú eftir umsóknum um styrki í tveimur flokkum á grundvelli samnings mennta- og menningarmálaráðuneytis og iðnaðarráðuneytis við Fjórðungssamband Vestfirðinga vegna ársins 2012. Tilgangur styrkjanna er að efla menningarstarfsemi og menningartengda ferðaþjónustu á Vestfjörðum og eru umsóknir og verkefni hverju sinni borin saman á samkeppnisgrundvelli.  

...
Meira

Félagsmiðstöðin Ozon gerði góða ferð til Reykjavíkur um helgina, en þar fór fram Samfestingurinn - ball og söngkeppni á vegum Samfés, samtaka félagsmiðstöðva á Íslandi. Alls fóru 28 krakkar frá Hólmavík og Drangsnesi á viðburðinn undir stjórn Arnars S. Jónssonar tómstundafulltrúa Strandabyggðar. Ferðin fór í alla staði vel fram, en meðal þess sem var gert til skemmtunar um helgina var rennerí á skautum, lasertag, bíóferð, keila og gokart.

Hápunktur ferðarinnar var án efa Söngkeppni Samfés, en þar gerðu fulltrúar félagsmiðstöðvarinnar sér lítið fyrir og náðu þriðja sæti eftir frábæran flutning á laginu Lýstu skært. Hópurinn, sem kallar sig Gógópíurnar, samanstendur af söngkonunum Brynju Karen Daníelsdóttur, Gunni Arndísi Halldórsdóttur, Söru Jóhannsdóttur, Margréti Veru Mánadóttur og trommukassalemjaranum Fannari Frey Snorrasyni. Þau voru örugg og yfirveguð í öllum flutningi og fasi, bæði á sviði og baksviðs. Fjölmargir einstaklingar lögðu hönd á plóginn í kringum söngatriðið og ferð Félagsmiðstöðvarinnar Ozon til höfuðborgarinnar.

Strandabyggð óskar Félagsmiðstöðinni, þátttakendum í starfi hennar og Gógópíunum innilega til hamingju með frábæran árangur!