Jón Jónsson formaður úthlutunarnefndar og Sigurður Líndal Þórisson verkefnastjóri Sterkra Stranda (Mynd Ásta Þórisdóttir)

Styrkjum úr byggðaþróunarverkefninu Sterkar Strandir var úthlutað við hátíðlega athöfn í gær á Sauðfjársetrinu á Ströndum. 22 umsóknir bárust og 12 verkefni fengu styrk. Það er því óhætt að segja að mikið er um hugmyndir og nýsköpunarvilja á Ströndum.

Auglýst var eftir styrkumsóknum í byggðaþróunarverkefnið Sterkar Strandir í febrúar 2022. Alls voru að þessu sinni til úthlutunar 10.850.000 kr. sem er samanlögð fjárhæð, árlegrar úthlutunar 10.500.000 kr. og styrks frá fyrra ári sem féll niður, eða 350.000 kr.

Afar ánægjulegt er að segja frá því að fjölmennari byggðalög, eins og Strandabyggð, fá nú 50% hærri úthlutunarupphæð en áður, en þetta hefur verið baráttumál okkar um nokkurt skeið.

Frestur til að skila inn umsóknum var til 31. janúar 2022 og bárust alls 22 umsóknir um styrki.

Myndir og nánari fréttir af úthlutun má finna hér á strandir.is

Sveitarfélagið óskar styrkhöfum innilega til hamingju með úthlutunina og gaman verður að sjá fjölbreyttar hugmyndir verða að veruleika í nánustu framtíð.

Vegna ófærðar færist íbúafundur á Hólmavík kl. 18:00 yfir í Zoom fund, til að sitja fundinn þarf að smella á hlekkinn hér https://us02web.zoom.us/j/84519623640

Orkumál á Vestfjörðum njóta ákveðinnar sérstöðu og hafa gert um nokkurt skeið.
Starfshópur um orkumál á Vestfjörðum, sem starfar í umboði umhverfis-, orku- og
loftslagsráðherra, fékk það verkefni að skoða orkumál í fjórðungnum og koma með
tillögur til úrbóta. Var við vinnuna litið til stöðu mála í flutningskerfi raforku, dreifikerfi
raforku og möguleikum til orkuvinnslu á svæðinu og hvernig það fellur að áherslum úr
orkustefnu um orkuskipti og afhendingaröryggi á landsvísu.

Starfshópurinn hefur nú unnið drög að tillögum til úrbóta og vill ræða drögin við íbúa
Vestfjarða áður en hann lýkur störfum.

Við viljum eiga samtal við þig!

Fundirnir eru:
20.mars, sunnudagur Félagsheimilið á Patreksfirði kl: 17:00
21.mars, mánudagur Félagsheimilið á Bolungarvík kl: 20:00
22. mars, þriðjudagur Félagsheimilið á Hólmavík kl: 18:00

Hvetjum alla til að mæta og ræða þetta mikilvæga mál fyrir Vestfirði

Á sveitarstjórnarfundi í gær 8. mars var lögð fram hvatning frá stjórn Sambands íslenskra sveitarfélaga frá 25. febrúar um að taka undir og undirrita yfirlýsingu Evrópusamtaka sveitarfélaga (CEMR) um að evrópskir sveitarstjórnarmenn fordæmi brot á sjálfstæði og sjálfræði Úkraínu og lýsi yfir stuðningi og samstöðu með sveitarfélögum í Úkraínu og íbúum þeirra.  

Sveitarstjórn Strandabyggðar samþykkti að skrifa undir yfirlýsinguna og fordæmir innrás Rússa í Úkraínu. Sveitarstjórn vill einnig hvetja eigendur íbúðarhúsnæðis í sveitarfélaginu sem ekki er í notkun sem slíkt á ársgrundvelli, að íhuga hvort það gæti nýst fyrir flóttafólk.

Félags- og vinnumarkaðsráðuneytið og Fjölmenningarsetur hafa opnað vefsíðu þar sem hægt er að skrá leiguhúsnæði vegna komu flóttafólks frá Úkraínu. Ef þú átt hús, íbúð eða annað viðeigandi húsnæði fyrir flóttafólk sem kemur til Íslands á flótta undan núverandi ástandi í Úkraínu, getur þú skráð það á síðunni.

Í fyrsta skrefi er einungis leitað að húsnæði en þeim sem hafa eitthvað annað fram að færa sem nýst getur fólki í Úkraínu er bent á hjálparstofnanir.

Hér getur þú skráð leiguhúsnæði fyrir flóttafólk frá Úkraínu.

Fyrir nokkru var opnuð vefgátt þar sem íbúum Strandabyggðar gafst tækifæri til að spyrja sveitarstjórn um margvísleg mál sem á þeim brenna. Í kynningu kom fram að svörin og spurningarnar yrðu svo aðgengilegar áhugasömum hér á vef Strandabyggðar. Þessi aðferð gafst ágætlega og nokkrar spurningar og tillögur bárust. Því hefur verið ákveðið að opna spurningagáttina að nýju og eru íbúar hvattir til að senda inn fyrirspurnir eða hugmyndir og tillögur varðandi rekstur sveitarfélagsins. Hér er tengill á spurningaformið.

Um leið birtast hér svör við öllum þeim spurningum sem íbúar sendu inn í fyrstu lotu. Tillögur sem bárust eru allar teknar til skoðunar og þeim sem snúa að skipulagsmálum vísar sveitarstjórn til vinnu við gerð aðalskipulags.