Stella Guðrún Jóhannsdóttir er nemandi í 10. bekk og í Tónskólanum á Hólmavík. Mánudaginn 30. janúar þreytti hún stigspróf í flautuleik hjá prófanefnd tónlistarskóla í Reykjavík. Hljóðfæranámi er skipt niður í þrjú stig; grunnstig, miðstig og framhaldsstig og hefur Stella nú lokið grunnstiginu og fengið í hendur sérstakt skírteini þess efnis þar sem fram kemur að Stella hlaut einkunnina 9,0 á prófinu sem telst stórglæsilegur árangur. Stella Guðrún hefur lært flautuleik á þverflautu undir leiðsögn Barböru Óskar Guðbjartsdóttur kennara við Tónskólann. Aðspurð segist Stella Guðrún prófið hafa gengið vel og að hún hafi ekki hafa verið mjög stressuð í prófinu sjálfu en hún hafði kviðið svolítið fyrir því. Á leiðinni suður í prófið kom Stella við á Miðhúsum í Kollafirði hjá hjónunum og tónlistarkennurunum Barböru Ósk og Viðari til þess að æfa sig á lokasprettinum. Þegar til Reykjavíkur var komið áttaði Stella sig á að hún hafði gleymt í Miðhúsum geisladisk með undirleik sem hún ætlaði að nota í prófinu sjálfu og upphófst mikið stress við að útvega slíkan disk í Reykjavík sem reyndist erfitt en tókst þó að lokum. Eftir það var Stella Guðrún ekkert stressuð og því alveg sallaróleg í prófinu sjálfu sem kom sér bara vel. Allt er gott sem endar vel :) Við óskum Stellu Guðrúnu hjartanlega til hamingju með grunnstigið og þennan glæsilega árangur!

Í dag héldu 21 nemendur vestur til Súðavíkur á Vestfjarðariðil söngkeppni félagsmiðstöðva fyrir Söngkeppni Samfés sem haldin verður í kvöld. Þar keppa tíu atriði frá Vestfjörðum um að komast áfram í lokakeppnina sem haldin verður í Reykjavík fyrstu helgina í mars. Þar af eigum við þrjú glæsileg atriði en það er hún Elísa Mjöll Sigurðardóttir sem mun syngja lagið Með þér við texta Bubba Morthens, Brynja Karen Daníelsdóttir sem syngur lagið The Story, með íslenskum texta Arnars S. Jónssonar, og hópurinn GóGó-píurnar þau Brynja Karen Daníelsdóttir, Fannar Freyr Snorrason, Gunnur Arndís Halldórsdóttir, Margrét Vera Mánadóttir og Sara Jóhannsdóttir sem flytja lagið Do Lord með íslenskum texta Arnars S. Jónssonar. Það er tómstundafulltrúi Strandabyggðar sem fylgir hópnum ásamt Alfreð Gesti Símonarsyni bílstjóra og Bjarka Einarssyni sem verður fulltrúi Hólmavíkur í dómarasætinu í kvöld. Hópurinn heldur svo heim á leið eftir ball með stórstjörnunni Haffa Haff seint í kvöld. Við óskum þeim góðrar feðrar og góðs gengis í Vestfjarðakeppninni!

Kæru nemendur og foreldrar. Okkur langar að vekja athygli ykkar á að nú hefur Mentor sent frá sér nýja lausn fyrir snjallsíma sem hugsuð er fyrir foreldra og nemendur. Í þessar útgáfu má skoða stundatöflu, ástundun, bekkjarlista, fréttir frá skólanum og heimavinnu. Notendur þurfa fara inn á m.mentor.is og skrá sig inn með notanda- og lykiorði rétt eins og þegar þeir skrá sig inn á Mentor í tölvunni.

Föstudaginn 10. febrúar munu fjórir kennarar skólans sækja námskeiðið Kvíði barna og ungmenna. Á námskeiðinu verður fjallað um eðli og einkenni kvíða, af hverju börn verða kvíðin, hvernig kvíði birtist, hvernig hann viðhelst og hvernig æskilegt er að bregðast við kvíðahegðun. Farið verður yfir helstu kvíðaraskanir barna og unglinga, aðskilnaðarkvíða, almenna kvíðaröskun, fælni, ofsakvíða, félagskvíða, kjörþögli og áráttu-þráhyggjuröskun. Helstu viðhaldandi þættir verða kynntir s.s. ofvernd, forðun og hugsanaskekkjur. Fjallað verður um æskileg viðbrögð við kvíða barna og unglinga og notkun atferlismótunar til að takast á við kvíðahegðun. Kennslan byggir á fyrirlestrum um ofangreinda þætti og léttum hóp-verkefnum. Námskeiðið er haldið í fjarfundi í gegnum Fræðslumiðstöð Vestfjarða og Endurmenntun HÍ. Við fögnum því að starfsmenn okkar geti tekið þátt í námskeiði sem þessu hér í heimabyggð og er þátttakan liður í endurmenntun starfsmanna en endurmenntunaráætlun Grunnskólans á Hólmavík má lesa hér.

Sunna Karítas Oktavía Torfhildur Tildurrófa Aðaldal ræður ríkjum í Stundinni okkar sem sýnd er á RÚV alla sunnudaga. En hún er nú bara oftast kölluð Skotta. Skotta býr í Álfheimunum ásamt Rósenberg sem er virðulegt heldra skoffín. Í síðustu viku kom Stundin okkar til að taka upp hér á Hólmavík. Umsjónarmaður er Margrét Sverrisdóttir og handritshöfundur ásamt henni Oddur Bjarni Þorkelsson. Þau fylgdu nemendum í 3. bekk eftir, heimsóttu Galdrasýninguna, fóru í vettvangsferð um Hólmavík, heimsóttu skólann og leikskólann Lækjarbrekku, ræddu við nemendur í Tónskólanum og tóku upp nokkur lög með þeim. Það var mikil spenna og tilhlökkun í nemendahópnum sem skemmti sér afar vel við að taka þátt í þessu líflega verkefni. Efnið frá Hólmavík verður unnið og klippt niður og sýnt sem stutt innslög í Stundinni okkar í vetur. Við þökkum Stundinni okkar kærlega fyrir komuna og hlökkum til að fylgjast með sjónvarpsstjörnunum okkar á skjánum. Myndir frá vikunni má sjá með því að smella hér.

Nú er skólinn okkar skráður í Lífshlaupið sem er heilsu- og hvatningarverkefni ÍSÍ fyrir alla aldurshópa. Í fyrra lentum við í Grunnskólanum á Hólmavík í 2. sæti í okkar flokki en keppnin virkar þannig að landsmenn eru hvattir til þess að huga að sinni daglegri hreyfingu og auka hana eins og kostur er þ.e. í frítíma, heimilisverkum, vinnu, skóla og við val á ferðamáta.

Lýðheilsustöð ráðleggur börnum og unglingum að hreyfa sig í minnst 60 mínútur á dag og fullorðnum í minnst 30 mínútur á dag.

Til þess að fá stig í Lífshlaupinu gerir þú eftirfarandi:
- Ferð inn á www.lifshlaupid.is
- Efst hægra megin ferðu í innskráning og skráir inn netfangið: grunnskolinn@holmavik.is og lykilorðið: holmavik
- Þá skoðar þú valmöguleikana á ljósbláa svæðinu vinstra megin og velur ,,skólinn minn"
- Þá smellir þú á bekkinn þinn, smellir á ,,skrá/breyta stigum" og skráir hreyfinguna fyrir hvern dag. Ath. að aðeins er hægt að skrá tíu daga aftur í tímann.

Hér má nálgast nákvæmari leiðbeiningar.

KOMA SVO KRAKKAR :o)

Við vorum að senda frá okkur febrúardagskrá Skólaskjóls sem er eins og sjá má full af skemmtilegheitum, leikjum og spilum. Það eru þau Alda og Steinar Ingi hafa skipulagt dagskrána og halda utan um starfið í Skjólinu með hressum krökkum í 1.-4. bekk sem eru nú tólf þegar þau eru flest. Skólaskjólið hefst að loknum skóladegi kl. 14:00 og snæða krakkarnir léttar veitingar og hressingu í kaffitímanum. Að loknum kaffitíma er stefnt að því að fara út að leika alla daga ef veður leyfir. Það hefur verið líflegt og skemmtilegt að fylgjast með þeim hoppa og skoppa um gangana í janúar í ýmsum furðuklæðum, fataleik, hópleikjum, á dótadaginn og á hinum sívinsæla bíódegi þar sem allir fá popp og djús. Hér má sjá febrúardagskrá Skólaskjóls.

Á morgun, þann 1. febrúar, hefst Lífshlaupið sem er heilsu- og hvatningarverkefni ÍSÍ fyrir alla aldurshópa. Í fyrra lentum við í Grunnskólanum á Hólmavík í 2. sæti í okkar flokki en keppnin virkar þannig að landsmenn eru hvattir til þess að huga að sinni daglegri hreyfingu og auka hana eins og kostur er þ.e. í frítíma, heimilisverkum, vinnu, skóla og við val á ferðamáta.

Lýðheilsustöð ráðleggur börnum og unglingum að hreyfa sig í minnst 60 mínútur á dag og fullorðnum í minnst 30 mínútur á dag. Inn á vef Lífshlaupsins er hægt að velja um þrjár leiðir til að taka þátt í Lífshlaupinu: Ef þú ert 15 ára og yngri getur þú tekið þátt í hvatningarverkefni fyrir grunnskóla. Ef þú ert 16 ára og eldri getur þú tekið þátt í vinnustaðakeppni. Allir geta tekið þátt í einstaklingskeppni þar sem þátttakendur geta skráð niður sína daglegu hreyfingu allt árið. Hægt er að fylgjast með fjölda þátttakenda, fjölda liða og með þeim árangri sem þátttakendur ná í hverju sveitarfélagi fyrir sig með því að smella á Staðan vinstra megin á vef Lífshlaupsins http://lifshlaupid.is/ en þar má einnig nálgast ítarlegri upplýsingar um hvatningarleikinn þar sem grunnskólanemendur eru hvattir til þess að ná að hreyfa sig alla daga meðan á leiknum stendur í samræmi við ráðleggingar um hreyfingu.

Nemendur í 6. og 7. bekk dvelja nú í góðu yfirlæti í Reykjaskóla og vinna þar að mjög fjölbreyttum viðfangsefnum, íþróttum og leikjum, umhverfisfræðslu, náttúrufræði. Hver hópur fer einu sinni í heimsókn í Byggðasafn Strandamanna og Húnvetninga en hápunktur þeirrar ferðar er svo við Hákarlaskipið Ófeig þar sem fólki gefst kostur á að sanna hreysti sína með hákarlsáti. Það hefur sýnt sig að nemendur af Ströndum hafa ævinlega staðið sig betur en aðrir í þessari íþróttagrein. Í gær hélt Trausti Rafn upp á 13 ára afmælið sitt í skólabúðunum og af því tilefni stóðu allir upp í hádegishlénu og sungu afmælissönginn fyrir hann og var boðið upp á gómsæta snúða um kvöldið. 

Í morgun var bjart, kalt og svolítill vindur hjá þeim. Nú njóta þau síðustu stundanna í Hrútafirðinum og það sem liggur fyrir er m.a. hópmyndataka, valfrjáls tími og hárgreiðslukeppni. Að sögn Hafnhildar Guðjörnsdóttur eru allir eru hraustir og hressir og hafa staðið sig gríðarlega vel. Á morgun heldur hópurinn okkar svo heim á leið eftir góða dvöl í Reykjaskóla með nemendum úr Kársnesskóla í Kópavogi, Brekkuskóla á Akureyri og Grunnskólanum á Drangsnesi. Ítarlegari fréttir frá hópnum okkar má lesa með því að smella hér og hér má skoða skemmtilegar myndir.

Vinsamlega athugið að skólastarf í Grunnskólanum á Hólmavík fellur niður í dag, fimmtudaginn 26. janúar, vegna ófærðar og veðurútlits. Þessi ákvörðun var tekin að vel athuguðu máli og í samráði við þá sem sjá um snjómokstur í sveitarfélaginu með hagsmuni nemenda að leiðarljósi. Settar hafa verið inn tilkynningar í morgunútvarp Rásar 2 og fréttatíma útvarpsins eftir kl. 7.15. Einnig er sett tilkynning inn á vef skólans og síðu Strandabyggðar á Facebook. Öllum er velkomið að hafa samband við okkur símleiðis ef einhverjar spurningar vakna í gsm Bjarna Ómars 892-4666 eða gsm Hildar 661-2010.

Skólastjórar Grunnskólans á Hólmavík.