Grunnskólinn á Hólmavík býður foreldrum og öðrum áhugasömum í íþróttatíma í Íþróttamiðstöðinni fimmtudaginn 29. febrúar, klukkan 12:10-13:00.
Nemendur á yngsta stigi og miðstigi kynna og gera fimleikaæfingar, nemendur á unglingastigi bjóða í skotbolta/gryfjubolta.
Samstarfsnemendum á Drangsnesi er sérstaklega boðið að taka þátt.
Tilkynnt verður um val á íþróttafólki ársins í Strandabyggð og verðlaun afhent.
Öll velkomin!
Fréttatilkynning til íbúa Árneshrepps, Kaldrananeshrepps og Strandabyggðar
Forsætisráðherra hefur stofnað nefnd um málefni Stranda sem tekið hefur til starfa. Markmið með skipan nefndarinnar er að skapa vaxtarskilyrði fyrir samfélag og atvinnulíf með sjálfbærni að leiðarljósi. Nefndin skal gera tillögur um hvernig megi efla byggðaþróun á svæðinu, m.a. með tilliti til fjárfestinga, atvinnuframboðs og atvinnutækifæra í Árneshreppi, Kaldrananeshreppi og Strandabyggð. Skila á forsætisráðherra tillögum eigi síðar en 1. júlí nk.
Nefndin telur samráð við íbúa og aðila svæðisins afar mikilvægt og leitar því til þeirra sem vilja koma hugmyndum sínum og ábendingum á framfæri. Í fyrstu er óskað eftir því að þau sem vilja koma ábendingum eða hugmyndum til nefndarinnar sendi þær í tölvupósti á netfangið for@for.is.
Þá er stefnt að frekara samtali og samráði við íbúa þegar fyrstu drög að tillögum nefndarinnar liggja fyrir og verður það auglýst nánar síðar.
Nefnd um málefni Stranda er skipuð fulltrúum forsætisráðuneytis, innviðaráðuneytis, fulltrúum sveitarfélaganna þriggja, Byggðastofnunar og Fjórðungssambandi Vestfjarða.
Gerð hefur verið skoðunaráætlun fyrir eldvarnareftirlit Strandabyggðar fyrir árið 2024.Gert er ráð fyrir að árið 2024 verði lagt áherslu á byggingar í notkunarflokkum 4 og 5 skoðaðar.
Í þessum flokkum eru hótel og gistiheimili auk allra skóla á svæðinu. Þá eru einnig nokkrar byggingar í forgangsskoðun. Þetta eru 33 skoðanir.
Þá er gert ráð fyrir að skoða 22 aðrar byggingar í notkunarflokki 1 og 2. Það eru ýmis sveitabýli með mikinn húsakost, stór iðnaðarhúsnæði og samkomustaðir. Samtals er ráðgert að fara í að minnsta kosti 55 skoðanir.
Þess utan fara fram úttektir vegna öryggis og lokaúttekta auk umsagna vegna ýmissa tækifærisleyfa.
Hér má sjá skoðunaráætlun eldvarnaeftirlits fyrir árið 2024. Hér eru listaðar upp byggingar sem annað hvort þurfa skoðun árlega eða fjórða hvert ár. Við ákvörðun um skoðun er stuðst við byggingareglugerð og reglugerð um eldvarnir og eldvarnaeftirlit. Viðbúið er að fleiri byggingar en þær sem eru á listanum verði skoðaðar eftir því sem ástæða þykir til. Eldvarnaeftirlitið hefur samband við eigendur bygginga til að fastsetja skoðunartíma þegar kemur að skoðun. Eldvarnaeftirlit er mikilvægur þáttur í forvörnum og eru eigendur bygginga hvattir til að bregðast sem fyrst við athugasemdum ef einhverjar eru.
Benda má á að eigendur bygginga geta alltaf haft samband við eldvarnaeftirlitið til að fá upplýsingar og leiðbeiningar. Einnig geta eigendur bygginga óskað eftir því að fá eldvarnaeftirlitið í heimsókn ef þurfa þykir.
Ákvörðun notkunarflokks ræðst einkum af því hvort fólk sé staðkunnugt í húsnæði, hvort það sofi þar eða ekki og hvort það geti sjálft bjargað sér úr því við eldsvoða.
Ef húsnæði innan sama mannvirkis er í mismunandi notkunarflokkum og deilir flóttaleiðum eða áhættum, skulu eldvarnir miðast við þarfir hæsta notkunarflokks í viðkomandi mannvirki.
Slökkviliðsstjóri.
