Vilt þú hafa áhrif á framtíð Hamingjudaga?

Könnun um Hamingjudaga hefur nú borist inn á öll heimili í Strandabyggð. Könnunina er einnig hægt að nálgast á vef Strandabyggðar (http://www.strandabyggd.is/stjornsysla/tilkynningar/skra/554/), á skrifstofu Strandabyggðar eða í Kaupfélaginu. Svör við könnuninni skilist í þar til gerðan kassa í Kaupfélaginu, á skrifstofu Strandabyggðar eða á póstfangið tomstundafulltrui@strandabyggd.is, eigi síðar en miðvikudaginn 25. september.

Gert er ráð fyrir að hver íbúi svari aðeins einu sinni.

Mánudaginn 16. september verður Dagur íslenskrar náttúru haldinn hátíðlegur á afmælisdegi Ómars Ragnarssonar. Í tilefni dagsins ætla Jón Alfreðsson og Heiða Ragga að leiða náttúruunnendur á Ströndum í hádegisgöngu. Gengið verður um nýja stíginn sem sjálfsboðaliðahópur SEEDS lagði frá Litlu Hellu að Kálfaneslæk nú í sumar og segja þessir fróðu Hólmvíkingar okkur frá staðháttum.

Öllum sem vilja fagna íslenskri náttúru á þessum degi er boðið að hittast fyrir utan Sparisjóð Strandamanna, Hafnabraut 19, í hádeginu á mánudaginn og eru stofnanir og fyrirtæki á svæðinu hvött til að fjölmenna. Lagt verður af stað í gönguna kl. 12:15

Fundur 1212 verður haldinn í sveitarstjórn Strandabyggðar þriðjudaginn 10. september 2013, kl. 16.00 í Hnyðju.

Fundardagskrá er svohljóðandi:

...
Meira

 

Laugardaginn 7. september (þjóðtrúardaginn mikla, 7-9-13) klukkan 20:00 verður haldin kvöldskemmtun í Sauðfjársetrinu á Ströndum. Þar verður opnuð sögu-og listasýningin Álagablettir, auk þess sem flutt verður tónlist og ýmis skemmtilegur fróðleikur. Sýningin mun verða uppi á listasviðinu í Sævangi út næsta sumar. Dagrún Ósk Jónsdóttir á Kirkjubóli hefur haft veg og vanda af undirbúningi sýningarinnar, með dyggri aðstoð föður síns. Mun Dagrún og þjóðfræðingarnir Rakel Valgeirsdóttir og Jón Jónsson miðla fróðleik um álagabletti á opnunni.

 

Frítt verður inná skemmtunina sjálfa og sýninguna, en á boðstólnum í Kaffi kind verður dulmagnað kvöldkaffi sem kostar 1000 kr. á mann. Allir eru hjartanlega velkomnir!

Hildur Jakobína Gísladóttir starfandi félagsmálastjóri verður með viðveru á skrifstofu sinni að Höfðagötu 3, fimmtudaginn 5. september frá kl. 9.30-15.00.  María Játvarðardóttir nýráðin félagsmálastjóri Stranda og Reykhólahrepps hefur störf þann 16. september.