Fræðslukvöld um barnsmissi verður haldið í Hólmavíkurkirkju kl. 20:00 fimmtudaginn 1. nóvember. Viðburðurinn er ætlaður fagfólki, foreldrum og öðrum aðstandendum. Hildur Jakobína Gísladóttir félagsmálastjóri flytur fræðsluerindi og síðan gefst færi á að spjalla, deila reynslu sinni eða fá svör við fyrirspurnum. Allir eru hjartanlega velkomnir. Styrktaraðilar fræðslukvöldsins eru Strandasýsludeild Rauða Krossins, Hólmavíkurkirkja, Reykhólahreppur og Strandabyggð. Hildur Jakobína er stofnandi samtakanna Litlir englar, en samtökin eru ætluð þeim sem hafa misst börn sín í móðurkviði, í fæðingu eða stuttu eftir fæðingu. Íbúar í Strandabyggð eru hvattir til að fjölmenna á fræðslukvöldið.

Velferðarnefnd og öll sveitarfélög sem standa að Félagsþjónustu Stranda og Reykhólahrepps hafa samþykkt reglur um sérstakar húsaleigubætur. Þessar bætur eru ætlaðar þeim sem ekki eru á annan hátt færir um að sjá sér fyrir húsnæði sökum lágra launa, þungrar framfærslubyrðar eða annarra félagslegra erfiðleika. Bæturnar eru fjárstuðningur til greiðslu húsaleigu í félagslegu húsnæði eða á almennum markaði umfram almennar húsaleigubætur.

Reglurnar má nálgast með því að smella hér.

Kolaport verður haldið í Félagsheimilinu á Hólmavík sunnudaginn 4. nóvember kl. 12:00-16:00. Það eru öflugir krakkar í Félagsmiðstöðinni Ozon sem standa fyrir viðburðinum sem er liður í fjáröflun fyrir starf miðstöðvarinnar í vetur. Í Kolaportinu verður líf og fjör, kaffi, kakó og kökur og nóg af góðum varningi til sölu.

Þeir sem vilja selja varning geta haft samband við Arnar S. Jónsson í s. 894-1941 eða í netfangið tomstundafulltrui@strandabyggd.is. Borð kostar kr. 1.000.-

Á laugardaginn fór fram ráðgefandi þjóðaratkvæðagreiðsla um tillögur stjórnlagaráðs varðandi nýja stjórnarskrá. Á kjörskrá í Strandabyggð voru 206 karlar og 184 konur, samtals 390 einstaklingar. Á kjörfundi í Hnyðju kusu 168 en utankjörfundaratkvæði voru 33. Samtals atkvæði voru því 201 sem þýðir að kosningaþátttaka í Strandabyggð var 51,5%. Kjörfundur hófst kl. 9:00, atkvæðagreiðsla hófst kl. 10:00 og lauk kjörfundi kl. 18:15.

Kjörstjórn gekk frá kjörgögnum eins og fyrir er mælt og var því lokið kl. 18:40. Lögreglan á Hólmavík sótti þau til formanns kjörstjórnar um kl. 19:15 og flutti þau til talningar hjá yfirkjörstjórn í Norðvesturkjördæmi sem staðsett var í Borgarnesi....
Meira

Eins og áður hefur komið fram hér á vefnum fer fram ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnskipunarlaga og tiltekin álitaefni þeim tengd laugardaginn 20. október. Kjördeildin í Strandabyggð verður staðsett í Hnyðju að Höfðagötu 3 á Hólmavík. Kjörfundur hefst kl. 9:00 en kjörstaður verður opinn frá kl. 10:00 -17:00. Athygli er vakin á nýrri staðsetningu kjörfundar, en síðustu ár hafa kjörfundir farið fram í Íþróttamiðstöðinni....
Meira