Lokað verður fyrir vatn á hluta Hólmavíkur í dag, þann 9. apríl, vegna viðgerðar. Lokunin nær til byggðar innan við Klifið á Hólmavík.

Lokað verður fyrir vatnið kl. 13:30 og búist er við að viðgerð taki um hálftíma.

Leikritið Tjaldið eftir Hallgrím Helgason verður sýnt í Félagsheimilinu á Hólmavík þriðjudaginn 9. apríl og miðvikudaginn 10. apríl kl. 20:00 báða dagana. Hópur ungmenna í leiklistarvali við Grunnskólann á Hólmavík leikur í og leikstýrir verkinu undir stjórn Arnars S. Jónssonar. Þegar er búið að sýna leikritið tvisvar sinnum og óhætt er að segja að það hafi slegið rækilega í gegn hjá þeim sem hafa barið það augum. Gróft orðbragð kemur fyrir í sýningunni og ekki er mælt með því fyrir viðkvæma eða yngri börn. Miðaverð fyrir alla aldurshópa er kr. 1.500. Alls eru 56 sæti í boði á hverja sýningu, en miðapantanir eru í s. 894-1941.

Starfsmaður óskast í 20 % starf við tilsjón hjá Félagsþjónustu Stranda- og Reykhólahrepps. Stuðningsúrræðið tilsjón er eitt af þeim lögbundnu úrræðum, skv. barnaverndarlögum, sem barnaverndarnefndir hafa þar sem markmiðið er að styrkja foreldra í uppeldishlutverkinu á heimilinu undir leiðsögn.

Nánari upplýsingar veitir félagsmálastjóri, Hildur Jakobína Gísladóttir í síma 842- 2511. Umsóknarfrestur er til 12. apríl 2013.

Kvennakórinn Norðurljós heldur tónleika í Guðríðarkirkju í Grafarholti laugardaginn 6. apríl n.k. kl. 18.00. Hólmvíska söngdívan Heiða Ólafs kemur fram með kórnum. Undirleikarar eru Kjartan Valdemarsson og Gunnlaugur Bjarnason og stjórnandi er Sigríður Óladóttir.

Miðaverð er kr. 2000 fyrir fullorðna og 1000 fyrir börn. Tekið við kortagreiðslum.

Vikan 8.-12. apríl verður sannkölluð dansvika í Strandabyggð. Eins og undanfarin tvö ár mun Jón Pétur Úlfljótsson frá Dansskóla Jóns Péturs og Köru mæta á svæðið og hafa grunnskólanemar kost á að sækja dansnámskeið í Íþróttamiðstöðinni frá mánudegi til föstudags eins og hér segir: Kl. 13:10-14:00 (1.-3. bekkur), kl. 14:10-15:00 (5.-7. bekkur) og kl. 15:10-16:00 (8.-10. bekkur). Námskeið yngri kynslóðarinnar enda með danssýningu á föstudeginum. Grunnskólinn sér um að taka við skráningum.

Dansnámskeið fyrir 16 ára og eldri verður haldið í Félagsheimilinu frá þriðjudegi til fimmtudags kl. 21:00-22:00. Athugið að hægt er að mæta á einstök kvöld eða öll kvöldin og kostar námskeiðið í heild 3.000 kr. eða hvert kvöld 1.000 kr. Allir fá viðfangsefni við hæfi og getu hvers og eins. Skráning á fullorðinsnámskeiðið er hjá Arnari S. Jónssyni tómstundafulltrúa í s. 8-941-941 og tomstundafulltrui@strandabyggd.is.