Á morgun, laugardaginn 8. september, er komið að allra yngstu kynslóðinni að taka þátt í heilsueflingu í Strandabyggð. Klukkan 11:00 hefst leikfimi fyrir börn á aldrinum 3-6 ára í Íþróttamiðstöðinni á Hólmavík. Það er Jóhanna Rósmundsdóttir sem mun sjá um tímana og ætlast er til að foreldi eða umsjónaraðili sem hefur náð 15 ára aldri mæti með barninu og taki þátt. Að þessu sinni verður sett upp þrautabraut. Markmið þess að fara í gegnum brautina er meðal annars að efla alhliða hreyfiþroska barna, til dæmis jafnvægi, liðleika, styrk, gróf- og fínhreyfingar.

Fólk er hvatt til að taka þátt í heilsueflingunni og mæta um helgina - sjá dagskrána með því að smella hér.

Strandabyggð auglýsir eftir starfsmanni til viðveru á opnum húsum félagsmiðstöðvarinnar Ozon veturinn 2012-2013.

Starfsmaðurinn þarf að:

- vera orðinn 20 ára
- hafa góða skipulagshæfileika
- sýna sjálfstæði og frumkvæði
- hafa góða hæfni í mannlegum samskiptum
- hafa ánægju að því að vinna með börnum og unglingum
- hafa hreint sakavottorð

Starfshlutfall er um 7%. Vinnutími er öll þriðjudagskvöld kl. 20:00-22:00 og annað hvert mánudagskvöld kl. 19:30-21:00. Ráðningartímabil er frá 15. september til 31. maí.

Nánari upplýsingar um starfið veitir Arnar Snæberg Jónsson tómstundafulltrúi í s. 894-1941 eða í netfangið tomstundafulltrui@strandabyggd.is. Umsóknum skal skila á skrifstofu Strandabyggðar í síðasta lagi mánudaginn 10. september.

Vegna alvarlegrar bilunar í tölvubúnaði í sundlauginni á Hólmavík verður sundlaugin, pottar og sturtuaðstaða lokuð í þessari viku. Önnur aðstaða í Íþróttamiðstöðinni verður þó að sjálfsögðu opin. Bilunin hefur umtalsverð áhrif á tvo dagskrárliði heilsueflingar í Strandabyggð; sundleikfimi sem vera átti í dag kl. 17:00 fellur niður ásamt sundkennslu fyrir 16 ára og eldri sem vera átti kl. 17:00 á miðvikudaginn. Vonast er til að búið verði að lagfæra búnaðinn í lok vikunnar - fréttir af því verða fluttar hér á vefnum.

Í dag, þann 1. september, taka gildi útivistarreglur fyrir veturinn. Samkvæmt því mega börn 12 ára og yngri ekki vera lengur úti en til klukkan átta á kvöldin. Unglingar á aldrinum 13-16 ára mega vera úti til klukkan tíu. Aldur miðast við fæðingarár. Bregða má út af þessum reglum þegar unglingar eru á heimleið frá viðurkenndri skóla-, íþrótta- eða æskulýðssamkomu. Ákvæði um útivistarreglurnar er að finna í barnaverndarlögum.

Nú er september hafinn og um leið hefst svokölluð heilsuefling í Strandabyggð. Markmið og tilgangur heilsueflingarinnar er að efla heilbrigði og vitund um mikilvægi góðrar heilsu með því að skapa íbúum sveitarfélagsins tækifæri til að afla sér þekkingar, hreyfa sig í samræmi við eigin getu og verja tíma með fjölskyldu sinni við fjölbreyttar tómstundir sem stuðla að bættri líðan og heilsu.

Eins og glöggir lesendur sjá er verkefnið komið með sérstakt svæði á vef Strandabyggðar. Allir íbúar eru hvattir til að taka virkan þátt í átakinu sem stendur yfir allan september!