Þorgeir Pálsson | 11. júní 2023
Kæru íbúar Strandabyggðar,
Vikan sem leið var um margt gjöful og skilaði mikilvægum áföngum.
Sorpsamlag Strandasýslu
Ársfundur Sorpsamlags Strandasýslu var haldinn í byrjun vikunnar. Hann var í senn hefðbundinn ársfundur, þar sem skýrsla stjórnar, minnisblað framkvæmdastjóra og ársreikningur félagsins fengu blessun stjórnar. Fram kom þar m.a. að sveitarfélögin sem standa að Sorpsamlaginu hafa ákveðið að greiða upp tapið sem hefur safnast upp sl ár, auk þess sem mánaðarlegt framlag þeirra til félagsins verður hækkað um 25%. Umsvif Sorpsamlagsins hafa aukist mikið undanfarið, á sama tíma og framlög hafa staðið í stað. Reksturinn hefur því verið neikvæður lengi, en nú stendur til að snúa þeirri þróun við. Þá kom Stefán Gíslason inn á fundinn og kynnti svokallaðar botnlangastöðvar, sem gætu komið í stað þess að hafa fjórar tunnur við hvert hús. Frekari kynning og íbúafundur verða í haust.
Tankurinn
Í vikunni átti sveitarstjórn fund með aðstandendum hugmyndarinnar sem barst í hugmyndasamkeppni um nýtingu Tanksins. Verður unnið að því að finna farveg fyrir hugmyndina, skilgreina kostnaðarliði og kostnaðarþátttöku beggja, auk þess sem leitað verður til fjárfesta. Að hugmyndinni standa þau Jón Rafnar Benjamínsson og Alma Benjamínsdóttir. Ef allt gengi eftir, yrði Tankurinn í framtíðinni með glæsilegri kaffihúsum og útsýnisstöðum landsins, þar sem íbúar og gestir gætu sest niður allan ársins hring og notið stórkostlegs útsýnis og léttra veitinga. Almenn kynning verður haldin á síðari stigum.
Sterkar Strandir
Samráðsfundur var haldinn með verkefnastjóra Sterkra Stranda, oddvita og fulltrúa verkefnastjórnar. Þetta var mjög góður fundur og ríkir full eining og samstaða um framhaldið. Sveitarstjórn er og hefur alltaf verið, samstíga í að sækja um framhald á verkefninu. Rætt var um möguleika á að kynna Strandabyggð meira útávið og jafnvel alþjóðlega, auk þess sem áhugaverðar hugmyndir að verkefnum voru rædda. Þessir fundir eru haldnir með reglulegu millibili og styrkja tengslin milli sveitarstjórnar og verkefnastjóra.
Greinargerðir
Nokkur tími fór í það í vikunni að skrifa greinargerðir til innviðaráðuneytisins, vegna tveggja kvartana sem hafa borist, annars vegar frá minnihlutanum og hins vegar frá íbúa tengdum fyrrverandi sveitarstjórn. Fór oddviti á fund lögfræðings sveitarfélagsins í Reykjavík vegna þessa. Það er umhugsunarefni að nú, ári eftir að þessi sveitarstjórn tók við, sé enn þörf á vinnuframlagi og kostnaði vegna þessa. Þessi vinna, sem er langt frá því hefbundin vinna oddvita eða sveitarstjóra, tekur tíma frá öðrum, lögbundnum verkefnum og er farin að kosta sveitarfélagið talsvert í beinum kostnaði og vinnuframlagi. Vonandi mun þetta þó jafna sig.
Önnur mál
Í vikunni náðust mikilvægar vörður í málefnum grunnskólans, og má þar nefna að nú eru í gangi verðkannanir vegna nýrra glugga og hurða og hitalagna í gólf. Þá er búið að fá tilboð í steypu í ílögn og unnið að því að fá múrara í það verk. Búið er að staðfesta kaup á færanlegri kennslustofu og verður hún afhent í sumar.
Skemmtiferðaskip heimsótti okkur í vikunni og von er að öðru síðar í þessum mánuði. Margir nefndarfundir voru í vikunni enda sveitarstjórnarfundur framundan. Búið er að kaupa girðingarefni, staura og vír, til að loka fyrir göt í girðingunni meðfram innstrandavegi. Hlutaðeigandi bændur og landeigendur geta nú í komandi viku, framkvæmt viðgerðir á sinni girðingu. Hér er um að ræða samstarf sveitarfélagsins og bænda.
Það er mikið að gerast í sveitarfélaginu og allir leggja sitt af mörkum til að þoka málum áfram, fegra bæinn, veita góða þjónustu og skapa gott samfélag.
Kveðja
Þorgeir Pálsson
oddviti
