Kæru starfsmenn og íbúar Strandabyggðar, sem og landsmenn allir, nær og fjær, 

Sveitarstjórn Strandabyggðar óskar ykkur öllum Gleðilegs Nýs Árs og þakkar árið sem nú er liðið.  

Horfum bjartsýn fram á við og vinnum saman að því að efla Strandabyggð!

Kær kveðja
Sveitarstjórn Strandabyggðar

Kæru íbúar Strandabyggðar,

Gleðilega hátíð!  Vonandi hafa allir haft það sem best undanfarna daga.  Við viljum þakka íbúum fyrir vel unnið verk í flokkun á sorpi í gegnum tíðina og hvetjum ykkur til að halda áfram á þeirri braut. 

Framundan eru breytingar á framkvæmd sorphirðu í Strandabyggð, sem og um allt land.  Ný lög taka gildi um áramót og fela þau lög í sér breytingar, sem við viljum tæpa á hér í þessum pistli.  Nánari kynning með dreifibréfi inn á heimili, kemur síðan fljótlega á nýju ári.  Það má reikna með að innleiðing þessara breytinga taki nokkra mánuði og því leggjum við hjá Sorpsamlagi Strandasýslu áherslu á að vanda vel til verka og nýta tímann vel, í stað þess að keyra í gegn breytingar með hraði. 

• Flokkun verður einfaldari!  Plast er td. ekki lengur flokkað í 3 flokka (hart, litað og glært) heldur fer allt plast saman í einn flokk.  Sama gildir um pappír, sem nú fer í einn flokk, en ekki 3 (fernur, bylgjupappi og annar pappír) líkt og áður
• Fleiri tunnur.  Tunnum verður fjölgað.  Það verða 3-4 tunnur við hvert heimili og stærri ruslagámar við fjölbýli,  þannig að flokkunin á sér í raun stað utanhúss, beint í tunnurnar.  Það þarf því ekki lengur að flokka eins mikið innanhúss
• Lífrænn úrgangur.  Lífrænn úrgangur fer í eina tunnu eða sérstakt hólf í tunnu, eftir því hvaða tunnugerð verður valin
• Almennt sorp.  Það sem ekki flokkast sem plast, pappír eða lífrænt sorp, fer í almenna ruslatunnu.  Innheimt verður eftir magni eða rúmmáli í tunnu þegar sorpið er sótt.  Hafið í huga;  þeim mun betur sem allt er flokkað í plast, pappír, lífrænt eða annað, þeim mun minna verður eftir í almenna ruslinu og þar með minna að borga! Þess vegna skiptir markviss flokkun öllu máli.
• Annað rusl.  Spilliefnum, gleri og málmum, skal áfram skilað í móttökustöðina á Skeiði.
• Móttökustöðin á Skeiði.  Móttökustöðin verður óbreytt um sinn, en það verða breytinga hvað varðar aðgengi og opnunartíma.  Nánari tímarammi tilkynntur síðar
• Sorphirðudagar.  Sorphirða verður óbreytt um sinn, þ.e. sorp er sótt annan hvern mánudag, en nánara dagatal verður kynnt síðar. Við biðjum íbúa að moka frá tunnum og auðvelda aðgengi.

Stjórn og starfsmenn Sorpsamlagsins vinna nú að undirbúningi innleiðingu þessara laga og er verið að skoða hvaða leiðir er best að fara.  Það þarf td. að kaupa inn mikið magn af ruslatunnum og minni ruslagámum, gera þarf ráð fyrir góðu aðgengi að ruslapokum og eins er verið að skoða opnunartíma og aðgengi að móttökustöðinni á Skeiði.  Þetta verður allt kynnt á næstu vikum og mánuðum.

Hér eru slóðir á nýju lögin og sérstaka handbók Umhverfisstofnunar, sem fer vel yfir þessar breytingar.  Við hvetjum íbúa til að kynna sér þessar breytingar og hika ekki við að hafa samband við Sorpsamlagið ef spurningar vakna.  Hægt er að hringja í Sigurð Marinó í síma: 894-4806, netfang siggimarri@strandabyggd.is eða Þorgeir í síma 899-0020, netfang thorgeir@strandabyggd.is

Hvað fyrirtæki varðar, verður byrjað að innheimta fyrir sorphirðu strax eftir áramót.

Þessar breytingar hafa marga kosti í för með sér og því er mikilvægt að við náum saman um að gera þetta rétt og vel frá byrjun.  Samvinna Sorpsamlags, íbúa og fyrirtækja er því lykilatriði.  Þetta skiptir okkur öll máli og við erum í þessu verkefni saman!

Kveðja

Stjórn og starfsmenn Sorpsamlags Strandasýslu

Kæru íbúar Strandabyggðar,

Á aukafundi sveitarstjórnar Strandabyggðar í gær, 29.12.22 var samþykkt að leggja 0,22% álag á útsvarsprósentuna, sem var fyrir 14,95%.  Útsvarsprósentan er þetta há, þar sem sveitarfélagið hefur glímt við fjárhagsvanda undanfarin ár og hefur fengið heimild innviðaráðherra til að hafa þetta háa prósentu árið 2023, til að auka tekjur sveitarfélagsins.

Ástæða þess að 0,22% eru lögð á útsvarið, er sú staða sem ríkir á landinu varðandi þjónustu við fatlað fólk, en þar skortir verulega á að fjármagn sé tryggt til að inna af hendi nauðsynlega þjónustu.  Á landsvísu skortir á annan tug milljarða til að endar nái saman í þessum málaflokki.  Nú hefur náðst samkomulag milli þriggja ráðuneyta og Sambands íslenskra sveitarfélaga um að mæta þessum vanda að einhverju leyti og er það gert með því að sveitarfélögin leggja 0,22% á útsvarið, sem fyrr segir, og renna þær tekjur til Jöfnunarsjóðs, sem síðan úthlutar framlögum til sveitarfélaga á landinu.  Ríkið mun samhliða þessu lækka tekjuskatt um samsvarandi hlutfall í báðum skattþrepum.  Þessi ákvörðun felur því ekki í sér auknar álögur á íbúa.

Kveðja
Þorgeir Pálsson
Oddviti

Vatnstankurinn fyrir ofan kirkjuna á Hólmavík, er sterkt kennileiti, en einnig minnisvarði liðinna tíma.  Tankurinn var vantsforðabúr Hólmavíkur og miðlaði vatni út í húsin.

Af og til í gegnum tíðina hafa komið upp hugmyndir um nýtingu tanksins og hefur þá gjarnan verið horft til þess að gera þar útsýnispall eða kaffihús.  Einnig hafa komið fram hugmyndir um að nýta tankinn að innan undir safn.

Sveitarstjórn Strandabyggðar vill nú fanga þessar hugmyndir sem og aðrar og kallar því eftir hugmyndum um nýtingu tanksins. 

Í hugmyndinni skal koma skýrt fram;

• Hver nýting tanksins yrði
• Umfang uppbyggingar
• Gróft kostnaðarmat
• Áætlaður tímarammi framkvæmda. 

Einnig skal þar koma fram hvaða kvaðir og/eða framkvæmdir sveitarfélagið þyrfti að legga í, svo hugmyndin myndi ná fram að ganga.  Hér er átt við innviði eins og aðgang að vatni, frárennsli, rafmagni o.s.frv.

Af hálfu sveitarfélagsins eru eftirfarandi kröfur gerðar og forsendur settar:

1. Tímarammi. Verkefnishafi, skal ljúka verkinu innan 3ja ára frá undirskrift samnings.  Standist tímaáætlun ekki, hefur sveitarfélagið rétt til að innheimta dagsektir
2. Nærumhverfi. Verkefnið nær til tanksins og nærumhverfis hans, sem skal skilgreint í verksamningi.  Á því svæði má gera ráð fyrir göngustígum, bekkjum, sætum en ekki mannvirkjum, söluskálum eða þess háttar
3. Umhverfisspjöll.  Verkefnishafi skal tryggja frágang á umhverfi að framkvæmdum loknum.
4. Mengun. Starfsemin skal ekki skapa mengun af neinu tagi
5. Sagan. Saga Tanksins og staða hans í mannlífi á Hólmavík skal virt í hvívetna.

Formlegum og vel útfærðum hugmyndum skal skilað á skrifstofu Strandabyggðar að Hafnarbraut 25 eða á netfangið strandabyggd@strandabyggd.is merkt „Tankurinn – hugmyndasamkeppni“ fyrir 1. febrúar 2023.

Sveitarfélagið áskilur sér rétt til að taka eða hafna hvaða tillögu sem er.

Náist samkomulag við verktaka eða hugmyndasmið um nýtingu á Tankinum, skal gerður verksamningur þar um sem tekur ítarlegar á öllum forsendum sem hér eru tilgreindar, t.d. umhverfi, innviði, starfsemi og afleidd áhrif.

Allar nánari upplýsingar veitir sveitarstjóri, Þorgeir Pálsson, í síma 899-0020 eða á netfangið thorgeir@strandabyggd.is

Auka-sveitarstjórnarfundur nr. 1340 í sveitarstjórn Strandabyggðar verður haldinn að Hafnarbraut 25, kl 13-13.30

Fundardagskrá er svohljóðandi:

1. Viðbótarálagning á útsvar vegna fjármögnunar á framlagi í málaflokk málefna fatlaðs fólks
2. Staðfesting á samningi um umdæmisráð landsbyggða.