Fundur nr. 1337 í sveitarstjórn Strandabyggðar verður haldinn þriðjudaginn 8. nóvember kl. 16.00 í Hnyðju Höfðagötu 3, Hólmavík.

Fundardagskrá er svohljóðandi:

1. Fjárhagsáætlun Strandabyggðar 2023 og þriggja áætlun 2024-2026
2. Fasteignagjöld, álagningarhlutfall og afslættir aldraðra
3. Útsvarshlutfall 2023
4. Gjaldskrár Strandabyggðar 2023
5. Viðauki V
6. Lántaka Strandabyggðar fyrir afborgunum ársins
7. Opið bréf frá Hafdísi Sturlaugsdóttur varðandi samfélagssáttmála um styrkveitingar
8. Samfélagssáttmáli um styrkveitingar
9. Siðareglur sveitarstjórnar Strandabyggðar
10. Samningur við Sýslið v. samnings um upplýsingamiðstöð
11. Stofnframlag í byggingu raðhúss
12. Flutningur dreifnáms, minnisblað sveitarstjóra
13. Hugmyndasamkeppni um nýtingu Tanksins, minnisblað sveitarstjóra
14. Umsókn um greiðslu námskostnaðar v. skólagöngu barns utan lögheimilis
15. Sýslumaður Suðurlands umsögn v. sölu á bjór hjá Galdri brugghús
16. Fine Foods umsókn um leyfi til lagnar þaralínu í Steingrímsfjörð
17. Fræðslunefnd fundur 7. nóvember
18. Fundargerð starfshóps um aukið samstarf í velferðarþjónustu frá 26. október 2022, ásamt kostnaðarskiptingu sveitarfélaganna á Vestfjörðum
19. Forstöðumannaskýrslur
20. Vinnuskýrsla sveitarstjóra
21. Ályktanir frá Hafnasambandsþingi 27.-28. október 2022
22. Ályktun um loftgæði á Íslandi 2022-2033
23. Samband sveitarfélaga fundargerð nr. 914 frá 12. október 2022
24. Hafnarsamband Íslands fundargerð nr. 446 frá 26. október 2022

Kæru íbúar Strandabyggðar,

Nokkuð er um að íbúar staðsetji lausamuni á opnum svæðum í þorpinu.  Það er stundum skiljanlegt, t.d. ef forða þarf munum vegna veðurs eða ef eitthvað bilar.  En við kjósum þó að hafa eitthvað skipulag á því, hvar lausamunir séu geymdir.  Í Norðurfjörunni, fyrir neðan Brynjólfshús, hafa sportbátar t.d. verið staðsettir yfir veturinn og viljum við benda eigendum slíkra báta á að nýta sér það svæði.

Hvað varðar aðra lausamuni, þurfa eigendur þeirra síðan að staðsetja annars staðar en á þessum opnu svæðum.  Sveitarfélagið býður t.d. aðstöðu á geymslusvæði sveitarfélagsins.

En umfram allt, ræðum málin og finnum lausn.  Hafið því endilega samband við sveitarstjóra í síma 899-0020 eða á netfangið thorgeir@strandabyggd.is eða ræðið málið við starfsmenn áhaldahúss, og við finnum sameiginlega lausn.

Kveðja
Þorgeir Pálsson
oddviti

Kæru íbúar Strandabyggðar,

Það hafa mjög fáar efnislegar athugasemdir eða ábendingar borist varðandi drög að samfélagssáttmála, sem kynnt voru á heimasíðu sveitarfélagsins 24 okt sl.  Við framlengjum því frestinn til loka dags, mánudaginn 31. október n.k.

Kveðja
Þorgeir Pálsson
oddviti

Það er komin Hrekkjavaka! 

Það hefur varla farið framhjá neinum, að það er komin Hrekkjavaka með tilheyrandi.  Á föstudag 28. október  kl 17-19 verður Draugahús í Félagsheimilinu.  Í Draugahúsinu má búast við alls kyns óvæntum látum.

Milli kl 19 og 21 geta síðan börn gengið á milli húsa, bankað uppá og boðist til að syngja fyrir sælgæti eða annað góðgæti.  Það hefur skapast sú venja, að þar sem hús er skreytt, þar má banka uppá.  Og krakkar;  það er vissara að hafa vasaljós, því það er ekki víst að það verði ljós á öllum ljósastaurum!

Gerum daginn skemmtilegan með krökkunum okkar!

kveðja
Þorgeir Pálsson
oddviti

Kæri íbúar Strandabyggðar,

Nú í aðdraganda fjárhagsáætlanagerðar, þarf að skoða vel ákvarðanir um ráðstöfun fjármagns sveitarfélagsins.  Eitt af því sem nauðsynlegt er að skoða, eru styrkveitingar, sem hafa verið viðtekin venja í sveitarfélaginu til langs tíma.  

Sveitarstjórn tók fyrir á fundi sínum í ágúst, sl. hugmyndina að "samfélagssáttmála um styrkveitingar", þar sem reynt væri að skilgreina eðli styrkveitinga og skapa réttar forsendur fyrir ráðstöfun fjármagns í styrki á hverjum tíma.  Í bókun sveitarstjórnar frá þeim fundi segir:  "Samfélagssáttmáli um styrkveitingar. Lögð eru fram drög að Samfélagssáttmála um styrkveitingar í Strandabyggð. Strandabyggð hefur lengi stutt við ýmis konar grasrótarstarf með beinum og óbeinum styrkveitingum og með því eflt mannlíf í Strandabyggð. Styrkveitingar eru hins vegar ekki sjálfgefnar og því mikilvægt að vandað sé til verka, í sátt við íbúa og aðra hlutaðeigandi. Rétt er að hafa í huga að styrkveitingar eru í raun meðvituð ráðstöfun á fjármunum sveitarfélagsins og þar með íbúa."

Eitt af því sem sveitarstjórn lagði áherslu á, var að gefa íbúum færi á að tjá sig um hugmyndina að samfélagssáttmála og markmiðinu með slíkum sáttmála. Nú gefst íbúum það tækifæri og hér má finna drög að sáttmálanum.  Þeir sem vilja koma skoðunum sínum eða ábendingum á framfæri, geta gert það í tölvupósti til sveitarstjóra á netfangið thorgeir@strandabyggd.is eða á netfangið strandabyggd@strandabyggd.is fyrir lok dags föstudaginn 28. október n.k.

Kveðja
Þorgeir Pálsson
oddviti