Kæru íbúar Strandabyggðar,

Það eru án efa fjölmörg svör við þessari spurningu.  Kannski finnst sumum spurningin skrýtin og ganga þá út frá því að auðvitað sé og eigi alltaf að vera gott að búa í sinni heimabyggð.  Og án efa eru margir sem spyrja sig aldrei þessarar spurningar.  Ég held hins vegar að hún sé góð og að það sé hollt að reyna að svara henni.

Sumir myndu án efa benda á náttúruna, fjörðinn, lognið á firðinum, fuglakvakið, selina, hvalina, öldunið þegar gárar ofl.ofl.  Sitt sýnist hverjum og víst er að hér er mikil og falleg náttúra.  Borgirnar eru ekki bara einn göngustígur, heldur æðakerfi gönguleiða.  Fjörðurinn er aldrei eins, alltaf eitthvað nýtt; nýtt líf.  Það er eins og með eldinn; maður getur horft linnulaust á eld loga, líkt og það er nærandi að horfa á sjóinn.

Ég hlustaði nýlega á stórgott viðtal á Rúv 1 við Pétur Gunnarsson rithöfund, en hann skrifaði í sinni fyrstu bók setningu, sem ég legg til að við hugleiðum.  Hann skrifaði:  „Af Jarðarinnar hálfu byrja allir dagar fallega“.  Þessi setning er ekki löng, en ótrúlega sterk; gefur fyrirheit og góðan grunn.  Þann grunn getur síðan hvert og eitt okkar byggt á og mótað sinn dag til enda.  Það er það val sem við höfum.

Það er val að vera jákvæð(ur).  Það er val að einblína á jákvæðar hliðar frekar en neikvæðar.  Það er val að hrósa eða hallmæla, eða segja ekkert.  Við veljum þá útgáfu af okkur og deginum sem við bjóðum svo öðrum upp á.

Eitt er það hér á Hólmavík sem mér hefur alltaf þótt notalegt, en það er að fólk vinkar og heilsar hvort öðru þegar það mætist í bíl, eða á gangi.  Jafnvel oft á dag.  Það er hlýlegt merki.  Höldum því á lofti.

Náttúran er og verður.  Samfélagið er hins vegar breytilegt.  Fólk kemur og fer.  Við sem hér búum á hverjum tíma, og höldum uppi þeim lífsskilyrðum sem við öll njótum, verðum að passa upp samfélagslega hluta ánægjunnar við að búa hér.  Við höfum það val.  Notum það rétt.

Kveðja og góða helgi,
Þorgeir Pálsson
Oddviti

 

 

 

Kæru íbúar Strandabyggðar,

Innviðaráðuneytið hefur staðfest endurbættar siðareglur fyrir kjörna fulltrúa í Strandabyggð.  Þær eru nú aðgengilegar á heimasíðu Strandabyggðar og má nálgast hér.

Helstu breytingarnar eru þær, að inn eru komnar breyttar áherslur er varða annars vegar almenn samskipti og orðræðu, t.d. á samfélagsmiðlum og hins vegar er varðar hegðun, siðferði og framkomu og er þar m.a. tiltekið áreiti hvers konar.

Kveðja
Þorgeir Pálsson
Oddviti

Í gær voru afhent íþróttaverðlaun Strandabyggðar fyrir árið 2022 en þau eru valin af Tómstunda, íþrótta- og menningarnefnd eftir innsendum tillögum og mati nefndarinnar.

Hvatningarverðlaun Strandabyggðar fyrir árið 2022, sem veitt eru fyrir aldurshópinn 12 til 15 ára, hlaut Árný Helga Birkisdóttir fyrir góða ástundun, framfarir og árangur í skíðagöngu. Sem og þátttöku sína í frjálsum íþróttum.
Tilnefning barst nefndinni og var hún einhuga um að Árný Helga væri vel að þessum verðlaunum komin.

Árný tók miklum framförum í skíðagöngu á síðasta ári, fór ásamt 2 öðrum iðkendum frá SFS í æfingabúðir Skíðasambands Íslands í Beitostolen í Noregi í um áramótin 2021-2022 og fór aftur nú um síðustu áramót.
Árný tók þátt í öllum 3 bikarmótum SKÍ á síðasta ári og uppskar þar 1 gull, 5 silfur og 1 brons, hún tók einnig þátt í skíðamóti Íslands á Ólafsfirði og varð þar Unglingameistari í skíðagöngu með hefðbundinni aðferð og í 3. sæti í göngu með frjálsri aðferð, í liðakeppni í sprettgöngu var hún í liði með Stefáni bróður sínum og voru þau í 4. sæti.
Á Andrésarandarleikunum á Akureyri sigraði Árný í göngu með hefðbundinni aðferð og var í 2. sæti í skicrossi með frjálsri aðferð. Þá tók Árný einnig þátt í Íslandsgöngum, var í 3. sæti í 12 km í Hermannsgöngunni á Akureyri, í 2. sæti í 10 km í Strandagöngunni og í 2. sæti í 12.5 km í Fossavatnsgöngunni á Ísafirði.

Unnar Vilhjálmsson frjálsíþróttaþjálfari hjá UFA, Ungmennafélagi Akureyrar lýsir Árnýju Helgu svona:
Árný hefur frá fyrstu æfingu verið mjög dugleg og áhugasöm. Hún er alltaf jákvæð og hefur mjög góð áhrif á liðsandann. Hún er alltaf til í að aðstoða aðra og til í nýjar áskoranir. Árný er því sannarlega vel að þessum hvatningarverðlaunum komin.

Íþróttamaður Strandabyggðar árið 2022 er Jóhanna Rannveig Jánsdóttir fyrir knattspyrnuiðkun.

Nefndarmaður TÍM nefndar lagði til tilnefningu Jóhönnu Rannveigar og var nefndin einnig einhuga um að hún væri vel að þessum verðlaunum komin.

Jóhanna Rannveig byrjaði að æfa knattspyrnu eftir að hún flutti til Hólmavíkur 7 ára gömul. Hún hafði þá stundað fimleika frá 4 ára aldri hjá Fjölni í Grafarvogi og hefði sennilega haldið því áfram ef hún hefði ekki flutt til Hólmavíkur.
Jóhanna Rannveig keppti með Kormáki á Hvammstanga og Vestra á Ísafirði á sumarmótum framan af, því Geislinn nær ekki í heilt lið. 10 ára flutti hún í Garðabæ og hóf að æfa knattspyrnu þar með Stjörnunni þar sem hún er ennþá iðkandi. Þrátt fyrir að hafa flutt til baka til Hólmavíkur 2018, þá 12 ára, hélt hún áfram að æfa og keppa með Stjörnunni þegar nokkur möguleiki var á, hélt sínum stað í liðinu og hefur undanfarið bæði keppt með A og B liði Stjörnunnar á Faxaflóamótum, Íslandsmótum og tvö sumur á Gothia Cup í Svíþjóð.
Síðastliðið ár hefur henni gengið afar vel, skorað fjölda marka, átt margar stoðsendingar sem hafa orðið að mörkum og stundum verið lykilleikmaður í sigri. Hún skoraði meðal annars fyrsta mark sem skorað var í keppnisleik í Miðgarði, nýju knattspyrnuhúsi Garðbæinga, strax eftir að það var tekið í notkun. RÚV vildi fá hana af velli í viðtal fyrir sjónvarpsfréttirnar af því tilefni en hún sá enga ástæðu til að yfirgefa leikinn og liðið sitt fyrir sjónvarpið.

Þjálfarinn hennar, Axel Örn Sæmundsson lýsir henni svona.
Jóhanna Rannveig er iðkandi hjá knattspyrnudeild Stjörnunnar. Jóhanna er ofboðslega metnaðarfull og viljug til að bæta sig í öllum þáttum greinarinnar. Jóhanna er gríðarlega fjölhæfur leikmaður sem getur spilað nánast allar stöður á vellinum og leysir það eins og að drekka vatn. Hún er félagslega sterk og steig upp þegar á reyndi til að hvetja sína liðsfélaga áfram í blíðu og stríðu og gerði hún það alltaf á jákvæðan og uppbyggjandi hátt. Þrátt fyrir að eiga heima á Hólmavík og komast takmarkað á æfingar yfir vetrartímann hjá Stjörnunni þá var Jóhanna alltaf að biðja um aukaæfingar og sýndi það mér nákvæmlega hvaða persónuleika hún bjó yfir og hvað hún var tilbúin til að leggja mikið á sig til að ná árangri í sinni íþróttagrein. Jóhanna er að mínu mati vel að þessari tilnefningu komin og var það mín ánægja að fá að þjálfa svona metnaðarfullan leikmann.

Kæru íbúar Strandabyggðar,

Vegna umræðu á sveitarstjórnarfundi í gær, 14.2. og samskipta á samfélagsmiðlum í dag, er rétt að árétta tímalínu atburða og nokkrar staðreyndir um þróun mála varðandi ástand grunnskólans okkar.

Öll erum við fyrir það fyrsta mjög leið og áhyggjufull yfir stöðunni enda er þetta staða sem enginn óskaði sér.  Þetta er erfitt og viðkæmt mál, sérstaklega fyrir krakkana og því mikilvægt að hafa réttar upplýsingar á borðinu þegar málið er rætt.

• Upphafið. Lengi hefur verið vitað um ástand grunnskólans og það viðhald sem þar hefði þurft að eiga sér stað.  Haustið 2022 kom upp leki í smíðaaðstöðu grunnskólans.  Í kjölfarið kom mikill raki í ljós og ákveðið var að taka myglusýni.  Leitað var til verktaka á Hólmavík og tók nokkrar vikur að fá sýnin tekin
• Niðurstaða sýnatöku.  Sýnin voru send til EFLU sem greindi þau og sendi niðurstöður sínar til okkar 29.11.  Sveitarstjórn hélt strax vinnufund daginn eftir og starfsmannafund í kjölfarið.  Skólanum var lokað á hádegi þann dag og gefið frí fram á mánudag 5.12.  Starfsmenn sveitarfélagsins unnu mikið og framúrskarandi verk við að koma kennslu í gang, færa til muni og móta „nýja“ aðstöðu.  Þann 30.11 var íbúum tilkynnt um stöðuna með þessari tilkynningu; http://www.strandabyggd.is/frettir/Mygla_i_Grunnskolanum/
• Úttekt EFLU.  Sveitarstjórn var samstíga í að leita eftir heildarúttekt EFLU, samhliða því að ráðist var í kaup á tækjum og búnaði til að tryggja að kennslustarf gæti hafist.  Á þessum tíma voru skoðuð kaup á tveimur færanlegum kennslustofum.  Hefði heildarkostnaður við þau kaup numið 40-50.milljónum, með flutningu og uppsetningu.  Ákveðið var að bíða með þau innkaup, þar til heildar umfang og kostnaður framkvæmda lægi fyrir.  Sveitarstjórn öll var samstíga um þá ákvörðun.  Á þessum tíma voru haldnir vinnufundir með EFLU, skólastjórnendum og sveitarstjórn
• Niðurstaða úttektar EFLU.  Skýrsla EFLU kom til okkar 31. Janúar og hafði þá dregist í vinnslu þar innanhúss.  Strax var haldinn vinnufundur sveitarstjórnar, síðan starfsmannafundur og loks fjarfundur með foreldrum, 2. febrúar.
• Frekari upplýsingaöflun. Sveitarstjórn ákvað að kalla eftir mati á skýrslunni og var leitað til fyrirtækjanna Litla Kletts og Aqurat, sem bæði hafa mikla reynslu og þekkingu á þessu sviði. Eins var óskað eftir mati Gísla Gunnlaugssonar, fyrrverandi bygginarfulltrúa, sem þekkir grunnskólabygginguna vel.  Að auki var kallað eftir kostnaðarmati frá EFLU og gerð útboðsgagna
• Starfsmannamál.  Sveitarstjóri og skólastjóri hafa ákveðið að halda reglulega stöðufundi og eru þeir þegar hafnir.  Í kjölfar starfsmannafundar, var farið í frekari innkaup á tækjum og búnaði til að styðja við skólastarfið
• Bréf frá foreldrum.  Sveitarstjórn barst erindi frá hópi foreldra sem var lagt fyrir sveitarstjórn á fundi 1342, 14.2.  Líkt og venja er þegar slík erindi berast, var sveitarstjóra falið að svara bréfinu eins og fyrirliggjandi upplýsingar gæfu tilefni til og verður það gert á næstu dögum.

Staðan nú er sú, að við fáum kostnaðarmat EFLU í næstu viku.  Aqurat hefur svarað og getur ekki tekið að sér frekari vinnu vegna þessa. Útboðsgögn ættu að liggja fyrir í lok febrúar.  Beðið er fyrirmæla frá EFLU varðandi spurningar okkar um hvað má nú fjarlægja úr skólanum.

Sveitarstjórn hefur hingað til verið samstíga í þessu risastóra og erfiða verkefni. Þetta er samfélagsverkefni okkar allra og ekki tilefni til pólitískra skylminga.  Ég hvet íbúa til að standa saman meðan við vinnum okkur út úr vandanum.  Það er mikilvægt að styðja við nemendur og starfslið skólans, nú sem aldrei fyrr. 

Ákvarðanir verða ekki teknar, né fyriheit um aðgerðir gefnar nema að vel ígrunduðu máli og með nauðsynlegar upplýsingar á borðinu.  Sama hvað verður gert, þá verður það stór ákvörðun, sem þarf að vera vel ígrunduð og rökstudd.  

Við erum öll sammála um það mikilvægasta í þessu öllu, velferð barnanna okkar.  Þess vegna verðum við að vanda okkur og sýna bæði þroska og styrk til að takast á við óvissuna sem óneytanlega fylgir þessari stöðu. 

Kveðja
Þorgeir Pálsson
Oddviti

Vegna fjarveru bókavarðar verður bókasafnið lokað í dag. Opnað verður aftur næsta þriðjudag í Hnyðju