Hátíðin Hörmungadagar verður haldin á Hólmavík og í nágrenni dagana 25.-27. febrúar. Það verður ýmislegt til ógleði á þessum dögum, til dæmis verður pöbbarölt á föstudeginum til að drekkja sorgum sínum, open mic þar sem fólk getur lesið upp úr vandræðalegum unglingsdagbókum sínum, sorgarsöngvar, hörmungarbarsvar, svo ætlar fólk að spila “Hörmung hendir” (shit happens) og fýlupokaþraut er meðal þess sem er í boði....
Meira

Í gær var tilkynnt um kjör Íþróttamanns ársins 2021 og verðlaun afhent. Ennfremur voru veitt hvatningarverðlaun til íþróttamanns. Hrafnhildur Skúladóttir íþrótta- og tómstundafulltrúi afhenti verðlaunin og í inngangsorðum hennar kom m.a. fram hve mikilvægt sé að finna sig í gleðinni og lífsfyllingunni við þessar daglegu æfingar allt árið um kring því þá munu einstaklingar nái sem bestum árangri.

Báðir þessir verðlaunahafar sanni það enn einu sinni að afreksfólk þrífist jafnt á litlum stöðum sem og í  þéttbýli. Auðvitað þurfi að hafa fyrir hlutunum og lengra sé að sækja mót og þjálfun að einhverju leyti en grunnurinn er heima. Í aðstöðu og hugarfari þess sem stundar sína íþrótt af heilindum. Hér höfum við mikla möguleika til að vaxa enn frekar á sviði íþrótta. Jafnt almenningsíþrótta sem og afreksíþrótta. Við sem samfélag þurfum bara að vera meðvituð um að hlúa að fólkinu okkar, jafnt börnum sem fullorðnum, hér eftir sem hingað til og þá er framtíðin björt.

Íþróttamaður ársins

Íþróttamaður Strandabyggðar 2021 er Guðmundur Viktor Gústafsson en hann hlýtur þessa viðurkenningu fyrir afrek sín á sviði golfíþróttarinnar á síðasta ári en hann náði þeim árangri að komast í landsliðssæti eldri kylfinga í aldursflokknum 65+ með forgjöf. Hann er nú í 3.sæti yfir landið í þessum aldurshópi og við hlökkum til að sjá hann spila fyrir landsliðið á komandi árum. Guðmundur æfir á golfvellinum okkar á Skeljavíkurgrundum með Golfklúbbi Hólmavíkur og er einn af stofnmeðlimum klúbbsins frá 1994.

Hvatningarverðlaun Strandabyggðar, hlaut Þórey Dögg Ragnarsdóttir skíðakona.  Þórey hefur æft gönguskíðaíþróttina frá barnsaldri, sótt námskeið erlendis og keppt á mótum með góðum árangri. Hún æfir með Skíðafélagi Strandamanna og hefur einnig verið liðtæk við þjálfun og kennslu síðustu ár. 

 

Sveitarstjórn Strandabyggðar óskar Guðmundi og Þóreyju og aðstandendum þeirra, innilega til hamingju með þessar viðurkenningar og væntir enn meira af þeim í framtíðinni“

Nýverið valdi Tómstunda-iþrótta og menningarnefnd Strandabyggðar það fólk sem fær viðurkenningar vegna íþróttaafreka ársins 2021. Afhending viðurkenninga og verðlauna til íþróttamanns ársins verða afhent í Íþróttamiðstöðinni á Hólmavík á morgun kl. 16.45. 

Veitt verða verðlaunin íþróttamaður ársins en auk þess sem veitt eru hvatningarverðlaun. Tómstunda-, íþrótta- og menningarnefnd fylgir reglum við útnefningu á íþróttamanneskju árins og byggir á tilnefnningum almennings. Metfjöldi tilnefninga barst til nefndarinnar í ár.

Í fyrra brá tómstunda-, íþrótta- og menningarnefnd  út af vananum og veitti félagi en ekki einstakling viðurkenningu fyrir framlag sitt til íþróttamála. Handhafi viðurkenningarinnar og farandbikarsins í fyrra var Skíðafélag Strandamanna. Félagið virðist eflast með ári hverju og státar af metnaðarfullu, fjölbreyttu og skemmtilegu barna- og ungmennastarfi sem nú er allan árins hring með fjallgöngum, þrekæfingum og línuskautum auk skíðanna. Skíðafélagið býður fjölskylduna velkomna með í leik og æfingar og opnar á möguleika gestkomandi til að stunda íþróttir í okkar fallega umhverfi, hvort sem er í leik eða keppni. Skíðafélagið er nú að leggja lokahönd á skíðaskála í Selárdal sem er metnaðarfullt verkefni unnið með samtakamætti þeirra sem að félaginu koma. Skíðafélag Strandamanna ber af hvað varðar prúðmennsku, vinsemd og hvatningu og er samfélaginu til sóma.

Á fundi sveitarstjórnar í janúar voru samþykktar Reglur um snjómokstur og hálkueyðingu en um er að ræða breytingar á reglum fyrra árs.  Nú í tíð fannfergis og ótryggs veðurs er mikilvægt að íbúar kynni sér reglurnar sem finna má hér og á vef sveitarfélagsins undir stjórnsýsla og reglur og samþykktir.

Á fundi sveitarstjórnar í janúar var lögð fyrir til samþykktar Húsnæðisáætlun Strandabyggðar. Hlutverk húsnæðisáætlana er að draga fram mynd af því hver staða húsnæðismála er í hverju sveitarfélagi fyrir sig, greina framboð og eftirspurn eftir margvíslegum húsnæðisformum og setja fram áætlun um hvernig sveitarfélagið ætlar að mæta húsnæðisþörf heimila, bæði til skemmri og lengri tíma. Megin markmið með gerð húsnæðisáætlana er því að stuðla að auknu húsnæðisöryggi heimilanna.  

Eitt af hlutverkum Húsnæðis- og mannvirkjastofnunar er að halda utan um og aðstoða sveitarfélögin við gerð húsnæðisáætlana. Húsnæðisáætlanir sveitarfélaga verða stafrænar og á stöðluðu formi frá og með árinu 2022. Hér má sjá húsnæðisáætlun Strandabyggðar.