Kæru íbúar Strandabyggðar,

Það er mikið að gerast í Strandabyggð þessa dagana. 

Réttir

Eins og flestir sjálfsagt vita, voru tvær nýjar réttir teknar í notkun í september, Krossárrétt og Staðardalsrétt.  Þar unnu bændur í Strandabyggð mikið og gott verk og undirstrikuðu mikla framsýni, fagþekkingu og samvinnu.  Báðar hafa þegar sannað gildi sitt og menn hæstánægðir með útkomuna.

Sundlaugin

Meirihluti sveitarstjórnar tók þá ákvörðun á síðasta sveitarstjórnarfundi, að gera breytingar á framkvæmdaáætlun þessa árs, á þann hátt að hætt var við að byggja nýjan inngang á Grunnskólann en í stað þess verður gamli inngangurinn rifinn og honum lokað og fjármagn fært í staðinn í tækjakaup fyrir sundlaugina.  Því miður er ástand tækja í sundlauginni afar bágborið og hefur verið í áraraðir.  Í sumar var ástandið oft sérlega erfitt og má þar helst nefna ólag á hitastýringu, sveiflur í klórmagni ofl.  það er von okkar að nú skapist meira rekstraröryggi og þar með minni óþægindi fyrir gesti.  Sundlaugin og íþróttamiðstöðin eru okkar helsta afl í eflingu lýðheilsu og samveru íbúa.  

Leikskólinn

Það stóð til að ráðast í framkvæmdir á leikskólalóðinni á árinu og var verkefnið auglýst snemma í vor.  Enginn sótti þó um og því erum við á byrjunarreit.  Og þó ekki, því komin er af stað hugmyndavinna með starfsfólki leikskólans um tillögur að nýrri lóð, og framundan eru hugarflugsfundir með foreldrum og krökkunum í leikskólanum.  Markmiðið er að endanlegar hugmyndir liggi fyrir í lok október og þá verður verkefnið auglýst aftur.  Framkvæmdir hæfust svo í vor.  Í þessu sem og svo mörgu öðru, er mikilvægt að vita hvað þarf að gera áður en framkvæmdir hefjast.

Hótel, hleðslustöðvar, skipulagsmál, húsnæðismál ...

Eins og fram hefur komið, eru viðræður í gangi við aðila sem vilja reisa hótel á Hólmavík.  Þær viðræður ganga vel.  Einnig er rætt við aðila sem vilja setja upp hleðslustöðvar hér og er nú verið að vinna tillögur í þeim efnum.  Þá er mikilvæg vinna við endurskoðun Aðalskipulags Strandabyggðar í gangi og í þeirri vinnu er m.a. rætt um húsnæðismál og þá húsnæðisþörf sem blasir við í Strandabyggð.  Þar horfum við á Brandskjól sem framtíðaríbúðasvæði.  Einnig þarf að huga að framboði á iðnaðarlóðum, við ætlum að ræða endurskipulagningu á Tanganum við útgerðarmenn ofl. ofl. 

En þó svo umræðan sé víðfem, þá gerist þetta ekki allt í einu.  Það þarf hins vegar að hugað að þessu öllu núna, þannig að við getum fært þessa framtíðarsýn inn í næsta Aðalskipulag.

Hvernig Strandabyggð viljum við?  Í leit að svarinu, þurfum við að horfa til næstu áratuga og það er ótrúlega spennandi vinna.  Ég hvet alla til að hugleiða með sjálfum sér og öðrum; hvernig samfélag viljum við sjá?

Ég hvet einnig alla íbúa og aðra sem hafa áhuga á þróun og uppbyggingu í Strandabyggð, að senda okkur póst á strandabyggd@strandabyggd.is eða hafa samband við mig í síma 899-0020 og/eða á netfangið thorgeir@strandabyggd.is  Svo er líka alltaf gaman að fá fólk í heimsókn að Hafnarbraut 25.  Þið eruð velkomin!
 

Kveðja,

Þorgeir Pálsson

oddviti

Sorpsamlag Strandasýslu hefur glímt við rekstrarerfiðleika í nokkurn tíma. Ljóst er að ýmsar ástæðar liggja þar að baki. Ný stjórn hefur tekið við og hana skipa Þorgeir Pálsson, Sigríður Guðbjörg Jónsdóttir og Finnur Ólafsson. Stjórn Sorpsamlagsins mun leita allra leiða til að snúa rekstri Sorpsamlagsins við og um leið að aðlaga reksturinn að þeim kröfum og lagalegu forsendum sem að sorphirðu lýtur í dag. Í því felst að breytingar verða gerðar á gjaldskrá Sorpsamlagsins og öllu rekstrarformi. Framkvæmdarstjóri Sorpsamlagsins er Sigurður Marinó Þorvaldsson. 

Sorpsamlag Strandasýslu var viss brautryðjandi á Vestfjarðavísu hvað varðar aðgengi að flokkunarstöð og var og er þjónustustig hvað þetta varðar mjög hátt. Áfram verður reynt að halda háu þjónustustigi, en þó er ljóst að aðgengi og opnunartími Sorpsamlagsins eru til skoðunar. Það eru fáir söfnunarstaðir á landinu opnir allan sólarhringinn, allan ársins hring. Það má búast við breytingu á því fyrirkomulagi á næstunni.

Nánari upplýsingar um útfærslu og framkvæmd þessara breytinga verða gefnar á næstunni. Gert er ráð fyrir að ný gjaldskrá taki gildi frá og með 1. október n.k.  Nánari upplýsingar um starfsemi Sorpsamlags Strandasýslu má finna hér.

Með kveðju
Stjórnin

« 1 af 4 »

Kæru íbúar Strandabyggðar og aðrir hlutaðeigandi,

Í dag, sunnudaginn 18. september, var réttað í nýrri rétt í Staðardal. Þessi nýja rétt leysir af hólmi gömlu Staðarrétt sem er komin vel til ára sinna og orðin lúin, enda búin að þjóna vel í gegnum tíðina.  Þessi nýja rétt er önnur af tveimur nýjum réttum sem reistar hafa verið í haust og eru báðar gott merki um þá verkþekkingu og framsýni sem býr í bændum í Strandabyggð.

Þessi nýja rétt, sem er í landi Hrófbergs, er um margt nýstárleg og óhefðbundin.  Enda var haft á orði í dag, að nú gætu krakkarnir ekki lengur dregið í dilka líkt og áður.  Þessi rétt er með svokölluðum flokkunargangi, sem bændur hafa notað víða í fjárhúsum, en er ekki algengt form hvað réttirnar sjálfar varðar.  Hin nýja rétt er ein örfárra slíkra á landinu.  Þetta verklag tryggir betra flæði og minna álag á féð.

Heiðurinn að þessari uppbyggingu réttarinnar eiga þau hjón Magnús og Marta á Stað, sem að öðrum ólöstuðum hafa sýnt einstakan áhuga og eljusemi í þessu verkefni.  Hugmyndavinnan á sér langan aðdraganda sem í dag skilaði sér sérlega vel.  Þeim hjónum og börnum og tengdabörnum þeirra, sem einnig komu hingað til að vinna við réttarsmíðina, er þakkað einstakt framlag og framsýni.

Sömuleiðis fær Haraldur Jónsson smiður og bóndi góðar þakkir, en hann miðlaði af sinni miklu fagþekkingu og tók að sér hlutverk yfirsmiðs. 

Margir aðrir komu einnig að verkefninu og má þar nefna, Birki Þór Stefánsson í Tröllatungu, Þorvald Garðar Helgason, krakkana á efsta stigi í Grunnskólanum á Hólmavík og listakennarann þeirra, Diddu Hjartardóttur Leaman sem gerðu skiltið og marga fleiri.  Kærar þakkir til allra sem komu að gerð réttarinnar með einum eða öðrum hætti.

Síðast en ekki síst ber að nefna landeigandann, Einar Gottskálksson og fjölskyldu hans, sem frá upphafi hafa sýnt verkefninu mikinn skilning og stuðning.  Þeim þökum við sömuleiðis kærlega fyrir.  Það má með sanni segja að þess nýja rétt rísi með sterkt bakland, stuðning og áhuga margra.

Um leið og við þökkum gömlu Staðarrétt fyrir dygga þjónustu, tökum við í notkun Staðardalsrétt í landi Hrófbergs í Staðardal og það er einlæg ósk okkar allra að hún muni þjóna notendum sínum vel og lengi.

Til hamingju Strandabyggð!

Kveðja

Þorgeir Pálsson

Oddviti.