Hnallþóruhlaðborð hefur undanfarin ár verið eitt helsta stolt og sérkenni Hamingjudaga. Enda eru Strandakonur og menn rómuð fyrir gestrisni og glæsilegan kökubakstur. Nú eru allir sem vettlingi geta valdið hvattir til að "sletta í form" og leggja til köku á hlaðborðið. Á næstu dögum munu röskar konur ganga í hús á Hólmavík til að óska eftir kökum en hringt verður í þá sem búa í dreifbýlinu. Kökuhlaborðið stendur frá kl 20-22 á laugardeginum og verður í Klifstúni (fyrir neðan kirkjuna) ef veður leyfir.
Þá vantar sjálfboðaliða til að taka við kökunum, hella upp á kaffi og hafa umsjón með hlaðborðinu. Þeir sem sjá sér fært að taka þetta að sér (2-4 einstaklingar) geta sett sig í samband við framkvæmdastjóra í síma 8673164 eða gegnum netfangið stina@holmavik.is.

Gunnar Þórðarson verður með tónleika í Bragganum á Hólmavík kl 21:00 á föstudagskvöldi á Hamingjudögum. Það er vel við hæfi að fá Gunnar á svæðið en hann er eins og margir vita Hólmvíkingur að uppruna og heldur mikilli tryggð við æskuslóðirnar. Undanfarið hefur hann ferðast um með tónleika og fylgt eftir útgáfu ævisögu sinnar Hljómagangur og geisladisks sem fylgdi henni, en bókin kom út fyrir síðustu jól. Góður rómur hefur verið gerður að þessum tónleikum Gunnars og er því mikið tilhlökkunarefni fyrir gesti Hamingjudaga að hlýða á hann í Bragganum.

Íbúar Hólmavíkur eru farnir að ráða ráðum sínum með skreytingar fyrir Hamingjudaga. Frést hefur af vinnufundi rauða hverfisins í bílskúr einum í Vesturtúni í gærkveldi. Salbjörg Engilbertsdóttir skreytingastjóri rauða hverfisins verst hins vegar allra frétta og vill ekkert gefa upp um áform þeirra "rauðhverfinga". Sýnt þykir þó að þar stendur mikið til, enda var rauðum fána flaggað fyrir all nokkru á áberandi stað í hverfinu.
Í kvöld hefur svo verið boðað til vinnufundar bláa hverfisins í Kvenfélagshúsinu kl 20:30. Bláa hverfið blés til sóknar í fyrra og var í fyrsta sinn með sameiginlegt skreytingaátak sem þótti heppnast vel.

Fyrirtækið Strandahestar hefur nú hafið fullu starfsemi að nýju og ætlar að bjóða upp á stuttar hestaferðir frá Víðidalsá (rétt sunnan Hólmavíkur) á Hamingjudögum. Það er Victor Örn Victorsson sem nýverið tók sér ársleyfi sem skólastjóri við Grunnskólann á Hólmavík, sem er í forsvari fyrir Strandahesta. Þessa viku stendur yfir reiðnámskeið hjá honum svo þeir sem taka þátt í því ættu að vera komnir í góða þjálfun fyrir Hamingjudaga. Vefsíða strandahesta er strandahestar.is, netfangið strandahestar@strandahestar.is og símanúmerin 8623263 og 4513262.

Hrönn Friðriksdóttir spámiðill hefur staðfest komu sína á Hamingjudaga á Hólmavík. Hrönn heldur úti heimasíðunni spamidill.com og þar segir:
Ég hef verið skyggn frá fæðingu, og hef haft spámiðlun að aðalstarfi síðan 2000. Þó ég sé skyggn einbeiti ég mér að þeim einstaklingum sem til mín koma. Ég legg áherslu á að skoða nútíð og framtíð, leitast við að finna út hæfileika og styrkleika hvers og eins, og hvernig best er að nýta þá. Ástarmál, vinna, fjármál, heilsa, fjölskylda og framtíð barna eru skoðuð svo dæmi séu tekin. Við vinnu mína nota ég kristalskúlu og blóma-, sígauna- og zenspil.
Hrönn ætlar að bjóða upp á styttri og ódýrari tíma fyrir gesti hamingjudaga og verður með aðstöðu við Höfðagötu, í húsi Ásdísar Jónsdóttur. Hægt er að setja sig í samband við hana gegnum netfangið hronn@spamidill.com eða í síma 861 2505. Tímasetningar verða nánar auglýstar í dagskrá Hamingjudaga.

Dagskrá hamingjudag er nú óðum að mótast og eru uppfærslur á henni gerðar nánast daglega, jafnharðan og upplýsingar um viðburðir og atriði berast og eru staðfestar. Dagskrána er að finna undir hnappnum dagskrá, sem kemur í ljós þegar smellt er á hnappinn Hamingjudagar vinstra meginn á vefnum. Í byrjun næstu viku verður gengið endanlega frá tónlistaratriðum þeirra heimamanna sem færa okkur Hamingjutóna þetta árið. Ef einhverjir luma ennþá að tónlist eða öðrum skemmtiatriðum í pokahorninu eru þeir hinir sömu hvattir til að setja sig í samband við framkvæmdastjóra.
Prentaðri dagskrá verður dreift í 5000 eintökum í nágrannabyggðarlög í lok næstu viku og einnig verður henni dreift á hátíðinni. Þá stendur til að setja prentvæna útgáfu hér á vefinn þegar nær líður.

Skipaðir hafa verið skreytingarstjórar í hverju hverfi fyrir sig vegna Hamingjudaga. Undanfarin ár hefur það færst í vöxt að hverfin taki sig saman og skreyti í sameiningu, t.d. með veifum, máluðum steinum eða skiltum. Tilgangurinn með því að skipa skreytingastjóra er einkum sá að fela þeim frumkvæði að slíkri vinnu og jafnvel efnisöflun ef þarf. Eftir sem áður þurfa allir íbúar að vera virkir í þessari vinnu og eru hugmyndaríkir einstaklingar hvattir til að koma hugmyndum á framfæri í sínum hverfum.
Skreytingarstjórar eru:
Rauða hverfið: Salbjörg Engilbertsdóttir
Appelsínugula hverfið: Ingibjörg Fossdal
Bláa hverfið: Guðrún Guðfinnsdóttir
Eru allir hvattir til að vera tímanlega í skreytingum þetta árið, en á fimmtudegi hefst dagskrá sem verður tengd við dagskrá hamingjudaga, annars vegar keppnisgrein í Vestfjarðavíkingnum og hins vegar tónleikar með Svavari Knúti, Árstíðum og Helga Val.
Veittar verða viðurkenningar fyrir best skreytta húsið, best skreytta hverfið, best skreytta fyrirtækið/stofnunina og flottustu "fígúruna."

Blómakörfur þær sem prýða ljósastaura á Hólmavík hafa frá upphafi verið hluti af skreytingum á Hamingjudögum. Í körfunum eru blóm í einkennislit hvers hverfis og setja þær því skemmtilegan svip á staðinn ásamt öðrum skreytingum. Drífa Hrólfsdóttir hefur haft veg og vanda af undirbúningi blómakarfanna þetta árið og notið til þess aðstoðar Sigríðar Drífu Þórólfsdóttur og nokkurra blómarósa úr vinnuskólanum. Drífa smellti af nokkrum myndum fyrir vefinn og er hægt að fletta þeim hér til hliðar.

Hin vinsæla Kassabílasmiðja sem Hafþór Ragnar Þórhallsson handverksmaður hefur haft veg og vanda að undanfarna Hamingjudaga mun fara í gang 1.júlí. Kassabílarallý sem að venju fer fram á laugardagsmorgni á Hamingjudögum hefur löngum skipað sér sess sem ómissandi hluti af Hamingjudögum.

Hafþór vill koma því á framfæri að honum hefur ekki tekist að byrgja sig eins vel upp af dekkjum og áður og því ættu þeir sem vilja smíða nýja bíla frá grunni að horfa í kringum sig eftir dekkjum. Þá eru þeir sem kynnu að eiga dekk undan ónýtum reiðhjólum, sláttuvélum, barnavögnum eða öðru slíku beðnir um að leggja smiðjunni lið og koma dekkjunum til Hafþórs.
Einnig verður hægt að gera upp og gera við gamla kassabíla. Margir eiga góða bíla frá fyrri árum sem má nýta áfram.

Skráning í smiðjuna er á netfanginu hamingjudagar@holmavik.is Hún mun starfa eftir hádegi dagana 1.-3. júlí.

Staðfest hefur verið að KK og Magnús Eiríksson verða með tónleika í Bragganum á laugardegi um Hamingjudaga, eða 4. júlí. Tónleikarnir hefjast kl 21:00. Síðast voru þeir félagar með tónleika á Hólmavík á mikilli tónlistarveislu á vegum Café Riis og Braggans sem haldin var í ágúst 2003.  Á tónleikunum munu þeir án efa kynna ferðalög sín sem notið hafa mikilla vinsælda.