Kæru íbúar Strandabyggðar,

 

Við þær aðstæður sem uppi eru, er mikið magn upplýsinga á ferð og flugi um samfélagið.  Það er því tilefni til að draga saman það helsta og gefa almennt yfirlit yfir stöðu mála.  Við munum gera það eins oft og við teljum þörf á.

Grunn-, leik- og tónskóli

Nú er unnið samkvæmt áætlun frá skólastjóra og starfsfólki skólanna og eiga foreldrar að hafa fengið ítarlegar upplýsingar um það fyrirkomulag sem er í gangi.  Skólahald er verulega breytt og mikilvægt að foreldrar og forráðamenn vinni með skólayfirvöldum að því að gera skóladaginn innihaldsríkan og uppbyggilegan þrátt fyrir takmarkaða skólasókn.  Heimalærdómur, fjarkennsla og eigin hugmyndaauðgi kemur nú til og fyllir í það bil sem myndast við skerta skólasókn.

Íþrótta- og tómstundastarf

Skert skólahald og þær nýju áherslur sem nú gilda, hafa bein áhrif á íþrótta- og tómstundastarf.  Öll íþrótta- og sundkennsla liggur því niðri, sem og starfsemi Geislans.  Forsvarsmenn Geislans munu tilkynna um breytingar á þeirra áætlun þegar þess gerist þörf. Frístundastarf liggur niðri, Ozon er því lokað þennan tíma.  Starfsemi eldri borgara liggur einnig niðri.

Aðgengi að stofnunum sveitarfélagsins

Almennt ætti að gilda sú regla, að ef íbúar eiga erindi við starfsmenn sveitarfélagsins, er rétt að hringja á undan sér og fá tíma fyrir fund, eða símtal.  Stofnanir sveitarfélagsins eru sem stendur ekki opnar fyrir almennar heimsóknir.

Skrifstofa Strandabyggðar er alfarið lokuð en símsvörun er frá kl 10 til 14, líkt og verið hefur.  Starfsmenn á skrifstofu skiptast á um að vinna heima og takmarka þannig viðveru allra í húsinu á sama tíma.

Íþróttamiðstöðin er opin, en líkt og tilkynnt hefur verið á heimasíðu íþróttamiðstöðvarinnar, eru búningsskápar lokaðir og strangari reglur gilda um hreinlæti, bil á milli einstaklinga og almenna umgengni.

Áhaldahúsið er almennt ekki opið þessa dagana, nema viðkomandi hafi boðað komu sína.  Starfsmenn Áhaldahúss skiptast á viðveru til að takmarka návígi.

Allt eru þetta aðgerðir til að lágmarka viðveru og návígi margra á sama tíma á sama stað. 

Höfum í huga að þetta er tímabundið ástand.  Við tökum þetta ástand hins vegar alvarlega og það er margt sem við getum gert sjálf til að draga úr áhættu á smiti. Það er líka margt sem við getum gert til að styðja við hvert annað.  Sumir eiga erfitt með að fara í búð, aðrir eru einmana og jafnvel óttaslegnir.  Börn og unglingar spyrja margra spurninga um ástandið og við þurfum að hlusta og svara eftir bestu getu.  Umfram allt gildir að vera jákvæð og róleg og styðja við hvert annað.  Þetta líður hjá.

Að lokum eru hér nokkrar ganglegar heimasíður fyrir þá sem vilja kynna sér málið betur. 

www.covid.is

https://www.landlaeknir.is/

https://www.samband.is/um-okkur/upplysingasida-vegna-covid-19

http://www.strandabyggd.is/grunnskolinn/

http://www.strandabyggd.is/leikskolinn/
https://www.facebook.com/Jakobinutuni/

Verkefnisstjóri á Ströndum

Vestfjarðastofa, með stuðningi Byggðastofnunar, auglýsir eftir verkefnisstjóra á Ströndum. Verkefnisstjóri gegnir hlutverki leiðtoga verkefnisins Brothættra byggða í Strandabyggð ásamt verkefnastjórn og starfar hann í umboði hennar að aðgerðum til eflingar byggðar og mannlífs í Strandabyggð. Önnur verkefni verkefnisstjóra miða að því að laða fjárfestingar til Vestfjarða og fjölga þar störfum.

Um er að ræða 100% starf sem skiptist í 50% stöðu verkefnisstjóra Brothættra byggða og 50% önnur verkefni Vestfjarðastofu.

Hæfniskröfur:

• Háskólamenntun sem nýtist í starfi, framhaldsmenntun æskileg
• Reynsla af ráðgjöf, fjárfestingum eða atvinnuþróun æskileg
• Haldbær starfsreynsla og reynsla af verkefnastjórnun æskileg
• Þekking, skilningur og reynsla af byggðamálum mikilvæg
• Reynsla af rekstri kostur
• Frumkvæði, jákvæðni, sköpunargleði, samstarfsfærni og sjálfstæð vinnubrögð eru mikilvægir eiginleikar

Helstu verkefni:

• Fylgja eftir ákvörðunum verkefnastjórnar
• Hafa frumkvæði að nýjum verkefnum í byggðunum
• Upplýsingamiðlun og skýrslugerð til íbúa og samstarfsaðila
• Íbúafundir og þátttaka í samfélagsverkefnum í sveitarfélaginu
• Gerð viðskiptaáætlana og markaðsgreininga
• Móta tækifæri til atvinnuskapandi fjárfestinga á Vestfjörðum

Viðkomandi þarf að geta hafið störf sem fyrst. Starfsstöð verkefnisstjóra verður á Hólmavík. Nánari upplýsingar má finna á www.vestfirdir.is Upplýsingar um verkefnið Brothættar byggðir er að finna á heimasíðu Byggðastofnunar (www.byggdastofnun.is).

Umsóknarfrestur er til 31. mars 2020.

Nánari upplýsingar veitir: Sigríður Ó. Kristjánsdóttir (sirry@vestfirdir.is)
Umsóknir ásamt ferilskrá skal senda á netfangið: sirry@vestfirdir.is merkt: Verkefnisstjóri á Ströndum.

Líkt og kom fram í færslu sveitarstjóra í gær, endurskoðum við stöðuna og þjónustustig daglega.  Nú hefur verið ákveðið að loka skrifstofu Strandabyggðar alfarið.  Símsvörun er hins vegar á bilinu 10-14, líkt og fyrri opnunartími var.  Þeim sem eiga erindi á skrifstofuna er bent á að hafa samband og bóka tíma með viðkomandi ef ekki er hægt að afgreiða viðfangsefnið símleiðis. 

Vinsamlegast hafið samband í síma 4513510 eða í tölvupósti á strandabyggd@strandabyggd.is.

Þessi ráðstöfun er gerð til að tryggja öryggi starfsmanna og koma þannig í veg fyrir röskun á starfsemi og þjónustu sveitarfélagsins.

Það eru skrýtnir og fordæmalausir tímar sem við lifum núna.  Samkomubann hefur verið sett á, viðburðum er frestað eða þeim aflýst, stofnunum er lokað fyrir heimsóknum og óviðkomandi aðgangur bannaður.  Framundan eru takmarkanir á skólahaldi, íþrótta- og tómstundahaldi og hvarvetna eru komnar verklagsreglur um umgengni á vinnustöðum og stofnunum.  Við fáum daglega nýjar upplýsingar um stöðu mála, en við fáum líka leiðbeiningar sem mikilvægt er að fylgja. 

 

Ég hvet foreldra til að kynna sér stöðu mála varðandi skólahald og má finna þær upplýsingar á heimasíðu Grunnskólans http://www.strandabyggd.is/grunnskolinn/

 

Eins hvet ég foreldra til að skoða heimasíðu Geislans varðandi takmarkanir á íþróttahaldi næstu daga, en þær upplýsingar eru á facebook síðu Geislans https://www.facebook.com/Geislinn-432791440074688/

 

Ákveðið hefur verið að skerða opnunartíma skrifstofu Strandabyggðar til að tryggja öryggi starfsmanna og koma í veg fyrir hugsanlega röskun á þessari starfsemi sveitarfélagsins.  Frá og með mánudeginum 16, mars 2020 er skrifstofa Strandabyggðar því opin frá kl 13-14, þar til annað verður ákveðið.

Að öðru leyti hafa ekki verið boðaðar breytingar á þjónustu sveitarfélagsins.  Við fylgjumst samt vel með og endurskoðum okkar áætlanir og þjónustu um leið og þörf krefur.

Umfram allt hvet ég þó alla til að halda ró sinni og sýna almenna skynsemi í einu og öllu, því það er margt sem við getum gert til að lágmarka alla áhættu.  Kynnum okkur málin, ræðum saman í rólegheitunum og veitum hvort öðru öryggi og stuðning.  Þetta mun líða hjá.